Read TAITA BIBLE – Biblia Ilagho Jiboie Kwa Wandu Wose WUFUNUO 5 Bible Online

WUFUNUO 5 - TAITA BIBLE – Biblia Ilagho Jiboie Kwa Wandu Wose bible

WUFUNUO 5

¹Nani nerewonieghe chuo chiko mkonunyi ghwa kiwomi ghwa uo oreserieghe kidombo aighu ya icho kifumbi cha nguma, chiandikilo andenyi na nanyuma, chifungilo na kukabwa mihuri mfungade.

²Ngawona malaika uwadie ndighi, ukichila na lwaka lubaa ukighamba, “Nani ufwanagha kufungua mihuri ya icho chuo na kuchikuchua?”

³Ela ndekorekoghe na mndungi mlungunyi, angu ndoenyi, hata andoenyi na kosi, oredimieghe kuchikuchua icho chuo na kuchizighana andenyi anduangi.

⁴Nani ngalila na ndighi, kwa kuwona angu mndungi nderewonekieghe ufwanagha kuchikuchua icho chuo, angu kuchizighana andenyi yaro.

⁵Niko umu wa awo waghosi ukanizera, “Leka lila; hoja uo Shimba wa mbari ya Juda, wa kivalwa cha Daudi, uo wamerie kusima; nao wadima kuifungua iyo mihuri mfungade, na kuchikuchua icho chuo.”

⁶Niko neremmbonieghe Mwana wa Ng'ondi uko kimusi ghadi na ghadi ya icho kifumbi cha nguma, na iro nyamandu riko moyo inya, na awo waghosi. Nao orekoghe ukiwoneka seji odebwaghwa; orekoghe na mbembe mfungade, na meso mfungade, nagho ni roho mfungade ra Mlungu ridumilo ndoenyi kose.

⁷Ukaghenda na kuchiwada icho chuo kufuma mkonunyi ghwa kiwomi, ghwa uo oreserieghe kidombo aighu ya icho kifumbi cha nguma.

⁸Hata iji wameria kuchiwada icho chuo, iro nyamandu riko moyo inya, na awo waghosi mirongo iwi na bana, wikaghwa imbiri ya uo Mwana wa Ng'ondi; kula umu uko na zeze, na bakuli ra dhahabu richue marumba, nagho ni malombi gha waeli.

⁹Wikabora lumbo luwishi wikighamba, “Kwafwana oho kuchiwada icho chuo na kuifungua mihuri yaro; angu oho korebwaghiloghe, na kwa bagha yako, kukamkombuya Mlungu wandu kufuma kula kichuku, kiteto, wandu, na mbari.

¹⁰Kukawibonya wikaie wazuri, na wakohani wemdumikia Mlungu odu; nawo wichabonya nguma ndoenyi.”

¹¹Niko ngazighana, nani ngasikira chwaka ra weke malaika wengi na ndighi, maelfu na maelfu, wiko mbai mbai ya icho kifumbi cha nguma, na iro nyamandu riko moyo, na awo waghosi, wikighamba kwa lwaka lubaa,

¹²“Uo Mwana wa Ng'ondi ubwaghilo, nuo ufwanagha kuwusa kudima, mali, hikima, ndighi, ishima, wubaa, na makaso.”

¹³Nao ngasikira kula kindo chiumbilo chiko mlungunyi, na ndoenyi, na andoenyi na kosi, na andenyi ya bahari, vilambo vose viko vikighamba, “Kwa uo useagha kidombo aighu ya kifumbi cha nguma, na kwa Mwana wa Ng'ondi, ndeghikaie makaso, ishima, wubaa, na kudima kwa kala na kala.”

¹⁴Na iro nyamandu riko moyo inya rikaghamba, “Amen”, na awo waghosi wikaghwa kijimijimi na kutasa.