Read TAITA BIBLE – Biblia Ilagho Jiboie Kwa Wandu Wose WUFUNUO 8 Bible Online

WUFUNUO 8 - TAITA BIBLE – Biblia Ilagho Jiboie Kwa Wandu Wose bible

WUFUNUO 8

¹Hata iji uo Mwana wa Ng'ondi oreghufungueghe ugho muhuri ghwa mfungade, mlungunyi korenyamieghe kima sa kwa nusu saa.

²Niko ngawona awo weke malaika mfungade, wikaiagha kimusi imbiri ya Mlungu, nawo wikanekwa tarumbeta.

³Na malaika mzima ukacha ukakaia kimusi madhabahunyi, uko na luwigha lwa dhahabu lofukira marumba; nao orenekeloghe marumba mengi upate kughiranganya na malombi gha waeli wose aighu ya agho madhabahu gha dhahabu, ghiko imbiri ya icho kifumbi cha nguma;

⁴na ugho mosi ghwa marumba ghiranganyiro na malombi gha waeli, ghukajoka imbiri ya Mlungu kufuma mikonunyi kwa uo malaika.

⁵Niko uo malaika ukaluwada ulo luwigha lofukira marumba, ukaluchura modo kufuma madhabahunyi, na kulukumba andoenyi, ghukakaia mrurumo ghwa lukuwa, chwaka, kukaba kwa chuhehia, na msughusiko ghwa ndoe.

⁶Niko awo weke malaika mfungade wikakaia tayari kurikaba iro tarumbeta werekoghe naro.

⁷Uo malaika wa imbiri ukaikaba tarumbeta yake, kukakaia na vua ya magho na modo, viranganyiro na bagha, na ifungu ja kadadu ja ndoenyi jikakorwa, ifungu ja kadadu ja midi jikakorwa, na nyasi mbishi rose rikakorwa.

⁸Uo malaika wa kawi ukaikaba tarumbeta yake, na kilambo chimu chiko sa mghondi m'baa ghuakagha modo, chikakumbwa baharinyi;

⁹na ifungu ja kadadu ja bahari jikawuya bagha, na ifungu ja kadadu ja ivo vose viumbilo viko moyo baharinyi vikafwa, na ifungu ja kadadu ja meli jikanonwa.

¹⁰Uo malaika wa kadadu ukaikaba tarumbeta yake, nyerinyeri mbaa nandighi ikapotoka kufuma mlungunyi ikiaka sa kilaya cha modo, ikapotokia ifungu ja kadadu ja meda, na ndoria ra machi.

¹¹Iyo nyerinyeri yawangwagha Kuwawa. Na ifungu ja kadadu ja machi jikawawa, na wandu wengi wikafwa kwa wundu ghwa agho machi, angu gherewawiroghe.

¹²Uo malaika wa kana ukaikaba tarumbeta yake, ifungu ja kadadu ja iruwa, na ja mori, na ja nyerinyeri jikakabwa, hata ifungu ja kadadu ja miengere yaro jikawuya kira; na ifungu ja kadadu ja dime hata ja kio ndejeredimieghe kufunya miengere yaro anduangi.

¹³Niko ngazighana, nani ngasikira indu ikikema na lwaka lubaa ngelo erekoghe ikiburuka koighu mbeonyi, “Ni bugha! Ni bugha! Ni bugha kwa awo wandu wikaiagha ndoenyi, ingelo weke malaika wamu wadadu wakakaba tarumbeta rawo!”