Read TAITA BIBLE – Biblia Ilagho Jiboie Kwa Wandu Wose WUFUNUO 9 Bible Online

WUFUNUO 9 - TAITA BIBLE – Biblia Ilagho Jiboie Kwa Wandu Wose bible

WUFUNUO 9

¹Niko uo malaika wa kasanu ukaikaba tarumbeta yake, nani ngawona nyerinyeri yapotoka kufuma mlungunyi, nayo erenekeloghe mfunguo ghwa kina cha abuso.

²Nayo ikarughua icho kina cha abuso, ghukajoka mosi kufuma kwa icho kina, sa mosi ghwa iwiwi ibaa; iruwa na mbeonyi kukatuwirwa kira ni ugho mosi ghorefumieghe kinenyi.

³Na zighe rikafuma kwa ugho mosi, na kucha ndoenyi; rikanekwa ndighi sa rija ra weke mwambandenyi wa ndoenyi.

⁴Naro rerezereloghe riseribonye nyasi ra ndoenyi ilagho jingi, hata malemba, hata mudi ghungi, ela awo wandu weni wisewadie muhuri ghwa Mlungu chamunyi kwawo.

⁵Rererumiriloghe riwikoronge awo wandu meri misanu, ela risewibwaghe; na luvia lwa makorongo ghawo, lorekoghe sa luvia lwa weke mwambandenyi iji wamluma mundu.

⁶Matuku agho wandu wichalola kifwa, ela ndewichaachiwona anduangi, wichakunda nandighi wifo, ela kifwa chichawikimbia.

⁷Iro zighe rerekoghe rikiwoneka sa farasi riwikilo tayari kwa wuda, na vongonyi kwawo korekoghe na vilambo viwonekagha sa virumbu va dhahabu; rerekoghe na mawushu sa gha wadamu,

⁸naro rerekoghe na maridia sa gha waka, na maghegho ghawo gherekoghe sa gha shimba.

⁹Rerekoghe na makoko ghiko sa ngao ra laghenyi ra chuma, na lwaka lwa mawawa ghawo, lorekoghe sa lwa magare gha farasi righendagha wudenyi.

¹⁰Iro zighe rerekoghe na vikomba sa va weke mwambandenyi viko na luvia, na ndighi yawo etirira wandu kwa meri misanu, eeka vikombenyi kwawo.

¹¹Reko na mzuri aighu yawo, uo malaika wa kina cha abuso; irina jake kwa Kiebrania wawangwa Abaddoni na kwa Kigriki ni Apolioni.

¹²Bugha ya imbiri yameria kuida, ola reko bugha iwi richagha sena.

¹³Niko uo malaika wa karandadu ukaikaba tarumbeta yake, ngasikira lwaka kufuma kwa iro mbembe inya ra madhabahu ya dhahabu iko imbiri ya Mlungu,

¹⁴lukimzera uo malaika wa karandadu orekoghe na tarumbeta, “Wifunguo awo weke malaika bana wifungilo ugho moda m'baa ghwa Eufrate.”

¹⁵Aho niko awo weke malaika wikafungulwa, awo werewikiloghe tayari kwa wundu ghwa iyo ngelo ya ijo ituku ja ugho mori na ugho mwaka; wipate kubwagha ifungu ja kadadu ja wadamu.

¹⁶Nani neresikireghe mtalo ghwa agho majeshi ghorekoghe milioni maghana awi.

¹⁷Na huwu niko nereriwonieghe iro farasi andenyi ya mawono ghapo: awo wirijokagha, wererwaeghe ngao ra laghenyi riko na rangi sa ya modo ghwa buluu, na ya mkungo sa modo ghwa kibiriti. Vongo va farasi verekoghe sa va shimba; na memunyi kwawo korefumieghe modo, mosi, na kibiriti.

¹⁸Ifungu ja kadadu ja wadamu jikabwaghwa kwa agho makabo adadu gha modo, na mosi, na kibiriti ivo verefumieghe memunyi kwawo.

¹⁹Iro ndighi ra iro farasi redeeka memunyi kwawo, na vikombenyi kwawo, vikomba vawo veko na vongo sa choka, naro rawishoghonua wandu navo.

²⁰Awo wandu weresigharikieghe wisebwaghilo ni agho makabo, ndewereherieghe na kurisigha kazi ra mikonu yawo na kutasa pepo, na milimu ya dhahabu, feza, shaba, magho na ya midi; iyo isedimagha kuwona angu kusikira, hata kughenda anduangi.

²¹Hata ndewereherieghe na kusigha kubwagha kwawo, wusawi ghwawo, kulaka kwawo, angu wutoi ghwawo anduangi.