Read TAITA BIBLE – Biblia Ilagho Jiboie Kwa Wandu Wose RUTHU 4 Bible Online

RUTHU 4 - TAITA BIBLE – Biblia Ilagho Jiboie Kwa Wandu Wose bible

RUTHU 4

¹Boazi ukaghenda hata andu kokwania mbengenyi ya muzi, ukasea kidombo aho. Nao uo mundu wa ifwa ja Elimeleki oremghoragha ukacha. Niko Boazi ukaghamba, “Ghaluka iichia mghenyi wapo kusee kidombo aha.” Ukaghaluka, ukasea kidombo.

²Nao Boazi ukawada waghosi wa muzi ikumi, ukawilomba nawo weni wisee kidombo aho; nawo wikasea kidombo.

³Niko ukamzera uja mundu wa ifwa, “Naomi uja uwurie kufuma isanga ja Moabu wawuyauza ija ndoe erekoghe ya mkichuku odu Elimeleki.

⁴Kwa huwo nawona nikughorie kupate kuighua imbiri ya awa wandu wiko kidombo aha, na imbiri ya waghosi wa wandu wapo. Iji kwawona kuikombua ni nicha, nako iji kusekunde kunighorie nimanye. Angu ndekuwadie mndungi oikombua ela oho, na nyuma ya oho ni ini.” Nao ukaghamba, “Nichaikombua.”

⁵Niko Boazi ukaghamba, “Kumanye ituku kuchaaighua kufuma kwa Naomi, kuchakaia kukimghua uja Ruthu M'moabu wori, uja muka mkiwa, kupate kummbusiria marehemu irina ja ifwa jake.”

⁶Nao uja mundu wa ifwa ukaghamba, “Kwa ilagho ijo, naiinjikia iyo hachi yapo eghua iyo ndoe; kwa kukaia wana wapo weni ndewichaaipata ifwa iyo ndoe. Ighuo oho, ini siikunde.”

⁷Matuku agho, mzango ghoretumilwagha ni Waisraeli ghwa kuuza angu kuindana vilambo, uo uuzagha, suti ufunye chadu chake na kuchineka uja mundu ughuagha. Kwa chia ihi Waisraeli werekoghe wikirumiria angu maza ramerelwa.

⁸Kwa huwo, uja mundu wa ifwa uendaghora wei kuighuo oho, ukafunya chadu chake na kumneka Boazi.

⁹Boazi ukawizera waja waghosi na wandu wose werekoghe aho, “Inyo mwakaia washahidi idime angu naghua kwa Naomi kula kilambo cherekoghe cha Elimeleki na icho chose cherekoghe cha Kilioni na Mahaloni.

¹⁰Aighu ya agho, uja Ruthu M'moabu, mka mkiwa wa Mahaloni, namghua ukaie mkwapo. Eri irina ja marehemu jipate kudua andenyi ya ifwa jake, sena jisakesia aghadi ya waruna, na mzinyi kwawo. Inyo mmbose mwakaia washahidi idime.”

¹¹Waghosi na wandu wose werekoghe aho wikaghamba, “Ee, isi dakaia washahidi. Mlungu ndem'bonye uo muka uchagha nyumbenyi kwako ukaie sa Raheli na Lea awo weremvaieghe Jakobo wana wengi. Kuchurikie na kukaia m'baa kwa kichuku cha Efrata na kukaia na sare iboie Bethlehemu.

¹²Awo wana Mlungu uchaakuneka kwa muka uhu ndewikaie sa wana wa Perezi uo Tamari oremvaieghe Juda.”

¹³Niko Boazi ukammbusa Ruthu, ukamdwa cha mzinyi ukaie mkwake. BWANA ukamrasimia, nao ukapata kifu, ukava mwana wa womi.

¹⁴Waka wikamzera Naomi, “BWANA ukaso, uo usekusighie idime kukaie kusewadie mundu wa ifwa; irina ja mwana ndejikaie ibaa andenyi ya Israeli.

¹⁵Uchakubonya kukaie na ndighi mbishi, na kukuhoresha ngelo ya wukeku ghwako; angu mka-mwanwako uo uvae mwana, wakukunde; nao waboie kuchumba wana wa womi mfungade.”

¹⁶Naomi ukammbwadia uo mwana laghenyi kwake, ukakaia ukimlela.

¹⁷Waka wiko kaavui wikakaia wikiwighoria wandu, “Naomi wavailo mwana wa womi;” nawo wikammbanga Obedi. Obedi nuo ndee wake Jese uo ucheewuya ndee wake Daudi.

¹⁸Ichi nicho kivalwa kufuma Perezi hata Daudi; Perezi orekoghe ndee wake Hezroni,

¹⁹Hezroni oremvaeghe Ramu, Ramu ukamva Aminadabu,

²⁰Aminadabu ukamva Nahshoni, Nahshoni ukamva Salmoni,

²¹Salmoni ukamva Boazi, Boazi ukamva Obedi,

²²Obedi ukamva Jese, na Jese ukamva Daudi.