Read TAITA BIBLE – Biblia Ilagho Jiboie Kwa Wandu Wose 1 SAMUELI 11 Bible Online

1 SAMUELI 11 - TAITA BIBLE – Biblia Ilagho Jiboie Kwa Wandu Wose bible

1 SAMUELI 11

¹Niko Nahashi Muamoni ukajoka na kughurughaia muzi ghwa Jabeshi-gileadi. Wandu wose wa Jabeshi wikamzera Nahashi, “Bonya mapatano na isi, nesi dichakudumikia.”

²Ela uo Nahashi, Muamoni ukawizera, “Neko tayari dibonye mapatano kwa masharti agha: Kula umu onyu urumirie kukulwa iriso jake ja kiwomi, na kwa chia iyo nichawibonya Waisraeli wiwoneke kukaia si kindo chingi.”

³Vilongozi va Wajabeshi wikamzera, “Dineke wulalo ghwa matuku mfungade, dipate kudumia Waisraeli wose momu. Iji dasowa mndungi odikira, niko dichaakufunya konyu.”

⁴Nao iji awo wadumwa wavika muzi ghwa Gibea kwa Sauli, wikaghora agho malagho kwa wandu; na wose wikaarisa mchungu na kulila.

⁵Ahoeni Sauli orekoghe ukicha na ng'ombe rake kufuma mbuwenyi; ukakotia, “Wandu wawonaki wililagha huwu?” Nao wikammanyisha agho malagho gharedwa ni wandu wa Jabeshi.

⁶Nao iji Sauli wasikira maza iro, Roho wa Mlungu ukamchea aighu kwake kwa ndighi mbaa, ukajokwa ni machu mabaa.

⁷Ukawada ng'ombe iwi, ukaridumbua-dumbua na kuduma vipande va nyama isangenyi jose ja Israeli ukighamba, “Uo ose usefumagha na kuwinugha Sauli na Samueli, ng'ombe rake richabonywa woruwo.” Nao kiture cha BWANA chikawiseria awo wandu, nawo wose wikafuma kwa ngolo imweri.

⁸Hata iji Sauli orewikwanyireghe aho Bezeki, mtalo ghwaro ghukawoneka kukaia wandu wa Israeli elfu maghana adadu, na wandu wa Juda elfu mirongo idadu.

⁹Wikawizera awo wandu weredumiloghe, “Muwizere wandu wa Jabeshi-gileadi huwu, ‘Kesho ngelo iruwa jabia, mchapata kukia.’” Wandu wa Jabeshi wiendasikira huwo, wikaboilwa;

¹⁰wikamzera Nahashi, “Kesho dichakufunya kwako kupate kudibonya sa iji kuwonagha nicha oho kumoni.”

¹¹Nao nakesho yaro, Sauli ukawiwagha wandu mafungu adadu; wikaichea kambi ya Waamoni ndoe yalighisa kuela, wikawibwagha hata iruwa jikabia; na awo weresigharikieghe, wikakimbia kula mundu chia yake, kuseko na kunughana.

¹²Niko wandu wa Israeli wikamzera Samueli, “Waja wandu wereghoragha wei Sauli ndedimagha kudibonyera nguma weko hao? Wiredenyi aha diwibwaghe.”

¹³Ela Sauli ukaghamba, “Ii hata, mndungi ndebwaghwaa idime, kwa kukaia ituku iji BWANA wawiredia Israeli kukia.”

¹⁴Niko Samueli ukawizera wandu, “Nndokonyi dighende Gilgali dipate kughumangisha wuzuri aho.”

¹⁵Nao wandu wose wikaghenda Gilgali, wikam'bonya Sauli ukaie mzuri imbiri ya BWANA; wikafunya vizongona va mapatano kwa BWANA, Sauli na wandu wose wa Israeli wikaboilwa na ndighi.