Read TAITA BIBLE – Biblia Ilagho Jiboie Kwa Wandu Wose 1 SAMUELI 26 Bible Online

1 SAMUELI 26 - TAITA BIBLE – Biblia Ilagho Jiboie Kwa Wandu Wose bible

1 SAMUELI 26

¹Niko Wazifu wikamchea Sauli aja Gibea wikighamba, “Daudi waawuyakuvisa mghondinyi ghwa Hakila, ghuko cha mashariki ya Jeshimoni.”

²Sauli ukawuka na kusea cha kireti cha Zifu, ukwanye na masikari ghisaghulo gha Waisraeli, wandu elfu idadu, wipate kumlola Daudi aho kireti cha Zifu.

³Sauli ukabonya kambi yake aighu ya mghondi ghwa Hakila, mbai na mbai ya chia, mashariki ya Jeshimoni. Ela Daudi orekaieghe ahoeni kireti; nao uendawona kukaia Sauli wamnugha cha kireti,

⁴ukaduma washeki, upate kumanya loli ngera Sauli wachee.

⁵Niko Daudi ukawuka ukaghenda andu Sauli orebonyereghe kambi, ukazighana andu Sauli orelalieghe chiaimweri na Abneri mwana wa Neri, uo orekoghe m'baa wa majeshi gha Sauli. Sauli ukalala andenyi kambinyi na majeshi ghake ghikammara chia rose.

⁶Nao Daudi ukamkotia Ahimeleki, Mhiti, na Abishai mruna Joabu mwana wa Seruia, “Nani useanyagha nani cha kambinyi kwa Sauli?” Abishai ukaghamba, “Ini niseanya na oho.”

⁷Niko Daudi na Abishai wikasea cha ijeshinyi nakio, wikamkua Sauli walala ghadi na ghadi ya kambi, na ifumu jake jadungwa andoenyi cha chongonyi; na Abneri chiaimweri na majeshi ghalala kummara chia rose.

⁸Nao Abishai ukamzera Daudi, “Linu niko Mlungu wamngira m'maiza wako mikonunyi kwako; idana leka nimdunge na ifumu hata jiide na ndonyi indo jimweri tu, siwuriagha ja kawi.”

⁹Ela Daudi ukamzera Abishai, “Kusem'bonye ilagho jingi; kwani nani udimagha kum'bonya kiwiwi mshingwa mavuda wa BWANA uke usewadie makosa?”

¹⁰Nao Daudi ukaghamba, “Sa iji BWANA ukaiagha moyo, uchamkaba moni, angu ituku jake jefwa jivika, angu kewada ungie wudenyi nao ufue aho.

¹¹BWANA ndenitesie, jingi nisem'bonye kiwiwi mshingwa mavuda wa BWANA. Ela idana shoa ijo ifumu jiko chongonyi, na kiriba cha machi, dighende.”

¹²Daudi ukadwa ijo ifumu na kiriba cha machi verekoghe cha chongonyi kwa Sauli, wikaghenda. Mndungi nderewonieghe hata kumanya, angu kuwuka koni; kwa kukaia wose werekoghe walala dilo rilemere rerefumieghe kwa BWANA.

¹³Nao Daudi ukaruwuka chija kimonu, ukajoka hata mudo ghwa mghondi; na aho korekoghe na wulalo mshapa aghadi kwawo.

¹⁴Daudi ukawanga ghaja majeshi na Abneri mwana wa Neri ukighamba, “Wele ndekunidikagha Abneri?” Niko Abneri ukatumbulia, “Nani oho kummbangagha mzuri?”

¹⁵Daudi ukamzera Abneri, “Wele nechi ko mndwawomi? Nani umu uko sa oho andenyi ya Israeli? Kwaki sena kusemlindirie bwana wako mzuri? Kwa kukaia mndumu wachee kambinyi nakio upate kumtotesha bwana wako mzuri.

¹⁶Kwabonyere ilagho jizamie nandighi. Sa iji BWANA ukaiagha moyo, yakufwana kufwa; kwa kukaia ndekoremlindirieghe bwana wako, uo mshingwa mavuda wa BWANA. Zighana, ifumu jake na chija kiriba cherekoghe kaavui na chongo chake veko hao?”

¹⁷Sauli ukalumanya lwaka lwa Daudi ukakotia, “Welee ni oho kumoni mwanwapo Daudi?” Daudi ukatumbulia, “Ni ini moni ee bwana wapo mzuri.”

¹⁸Ukachuria kughora, “Kwaki bwana wapo kunidiwagha huwu ini mdumiki wako? Kwani nabonyere wada? Ni kiwiwiki kuchiwonie kwapo?

¹⁹Kwa huwo idana bwana wapo sikira malagho ghapo ini mdumiki wako. Ikakaia ni BWANA ukubonyere kunidiweghe huwu, nderumirie kizongona; ela ikakaia ni wadamu, ndewiwado ni njowe imbiri ya BWANA; kwa kukaia waniwinga nisepate iwaghio jingi ja ifwa ja BWANA; wikinizera, ‘Ghenda kuidumikie milungu mizima.’

²⁰Kwa huwo idana, kusakenibwagha andenyi ya isanga jiseko na Mlungu; kwaki mzuri wa Israeli uchaabwagha sawa sa ini? Kwaki kunidiwagha sa mundu udiwagha ngwale mighondinyi?”

²¹Niko Sauli ukaghamba, “Nakosa; wuya mwanwapo Daudi, angu sichaakubonya ilagho iwiwi sena, kwa kukaia irangi japo jekoghe ja zoghori kwako idime. Ola nabonya wukelu, nakosa nandighi.”

²²Nao Daudi ukatumbulia, “Ola ifumu jako heji ee mzuri; mndumu wa irika nderuwuke ujiwuse.

²³BWANA wadamlipa kula mundu kunughana na hachi na wuloli ghwake; kwa kukaia BWANA wakungirieghe mikonunyi kwapo idime, ela nalegha nisem'bonye kiwiwi chingi mshingwa mavuda wa BWANA.

²⁴Ola sa iji koni irangi jako jikoghe ja zoghori kwapo idime, wokoni irangi japo ndejikaie ja zoghori mesonyi kwa BWANA, nao unikire na matiriro ghose.”

²⁵Niko Sauli ukamzera Daudi, “Mwanwapo Daudi kurasimilo! Kuchabonya maza nyingi naro richakaia nicha.” Daudi ukaghenda chia yake, na Sauli ukaghala.