Read TAITA BIBLE – Biblia Ilagho Jiboie Kwa Wandu Wose 1 SAMUELI 3 Bible Online

1 SAMUELI 3 - TAITA BIBLE – Biblia Ilagho Jiboie Kwa Wandu Wose bible

1 SAMUELI 3

¹Ngelo iro, uo mwana Samueli, orekoghe ukimdumikia BWANA aisi ya Eli. Na ilagho ja Mlungu jerekoghe jahora modo nandighi matuku agho; kwa kukaia ndekorekoghe na mawono ghangi shwa kwa shwa.

²Ngelo iyo, meso gha Eli gherezoeghe kufwa, hata nderedimieghe kuwona; ukakaia ukilala chumbenyi kwake.

³Samueli orekoghe ukilala andenyi ya hekalu ya BWANA[2] andu Sanduku ya Ilaghano erekoghe ikikaia, na taa ya Mlungu erekoghe iserimishiro.

⁴BWANA ukammbanga Samueli, “Samueli! Samueli!” Ukadika “Neko aha!”

⁵Ukakimbia cha kwa Eli ukamzera, “Nacha seji kwaniwanga.” Ela Eli ukaghamba, “Sikuwangie kungi ghenda kulale.” Niko Samueli ukaghenda ukalala.

⁶BWANA ukawanga sena, “Samueli!” Nao Samueli ukawuka ukaghenda kwa Eli ukaghamba, “Nacha seji kwaniwanga.” Ela ukaghamba, “Mwanwapo sikuwangie kungi ghenda kulale.”

⁷Ngelo iro, Samueli nderekoghe wammanya BWANA, hata ilagho jake ndejeremtambukieghe anduangi.

⁸BWANA ukammbanga Samueli indo ja kadadu. Nao ukawuka ukaghenda kwa Eli ukamzera, “Nacha seji kwaniwanga.” Niko Eli ukamanya kukaia ni BWANA wawuyammbanga uja mwana.

⁹Kwa huwo Eli ukamzera Samueli, “Ghenda kulale; nao ukakuwanga sena kumzere, ‘Ghora BWANA, angu ini mdumiki wako nawuyasikira.’” Niko Samueli ukawuya na kulala andu koni orekoghe.

¹⁰Nao BWANA ukacha ukakaia kimusi na kummbanga sena, “Samueli! Samueli!” Niko Samueli ukadika, “Ghora BWANA angu mdumiki wako nawuyasikira.”

¹¹Niko BWANA ukamzera Samueli, “Ola nalighisa kubonya ilagho andenyi ya Israeli, mundu uo ose uchaajisikira, jichamturusa.

¹²Ituku ijo nichakatisha malagho ghose nereghighorieghe aighu ya Eli na nyumba yake kufuma kuzoya hata kutua;

¹³seji neremzerieghe kukaia, nichairedia nyumba yake ikabo ja kala na kala kwa wundu ghwa ugho wuwiwi ughumanyire; kwa kukaia wana wake werekoghe wikimsholia Mlungu, nao nderewikanieghe anduangi.

¹⁴Kwa huwo naghema aighu ya nyumba ya Eli kukaia wandu wake ndewichaeleshwa kwa kizongona hata kwa mafunyo kwa kala na kala.”

¹⁵Nao Samueli ukalala hata ndoe ikaela; niko ukairughua minyango ya nyumba ya BWANA. Ela ukaobua kumghoria Eli agho mawono.

¹⁶Niko Eli ukammbanga Samueli ukamzera, “Samueli mwana wapo;” nao ukadika, “Neko aha.”

¹⁷Eli ukamzera, “BWANA wakuzerie wada? Kusenivise ilagho jingi ja agho ghose ukughorie. Kukanivisa, kukabwa ni Mlungu kuchumba.”

¹⁸Niko aho Samueli ukamghoria agho ghose oreghoreloghe ni BWANA, hata nderemvisireghe ilagho jingi anduangi. Nao Eli ukaghamba, “Uo ni BWANA, ndebonye sa iji koni wawona nicha moni.”

¹⁹Samueli ukazoghua, na BWANA ukakaia andwamweri nao, hata nderesighieghe ilagho jingi jake usejikatishire anduangi.

²⁰Na Waisraeli wose kufuma Dani hata Beer-sheba wikamanya kukaia Samueli wamerie kuwikwa ukaie mlodi wa BWANA.

²¹BWANA ukachuria kukufunukua sena aho Shilo, angu orekoghe wakufunukua kwa Samueli kwa chia ya ilagho jake.