Read TAITA BIBLE – Biblia Ilagho Jiboie Kwa Wandu Wose 1 SAMUELI 30 Bible Online

1 SAMUELI 30 - TAITA BIBLE – Biblia Ilagho Jiboie Kwa Wandu Wose bible

1 SAMUELI 30

¹Ituku ja kadadu, Daudi na wandu wake wikavika Siklagi. Wikakua Waamaleki wajokeria chia ya Negebu; wikaghungiria ugho muzi ghwa Siklagi na kughukora.

²Wikadwa wunyika waka werekoghe aho, chiaimweri na wose werekwanyeghe wabaa na watini; ndewerebwaghieghe mndungi, ela wedewidwa, na kughenda chia rawo.

³Daudi na wandu wake wiendavika, wikakua muzi ghwakorwa, na waka wawo, na wana wawo wa womi na wa waka wameria kuwadwa na kudwalwa wunyika.

⁴Daudi na wandu wake wikaarisa mchungu na kulila hata wikasilwa ni ndighi.

⁵Waka wa Daudi wose wawi wikadwalwa; Ahinoamu uja wa isanga ja Jezreeli, na Abigaili uja muka mkiwa wa Nabali wa isanga ja Karmeli.

⁶Daudi ukaja wasi nandighi, kwa kukaia wandu werezoeghe kuja malagho ghemlasa na magho, angu werekoghe na luwawo lubaa rohonyi kwa wundu ghwa wana wawo wa womi na wa waka. Ela Daudi ukafungishwa ndighi ni BWANA Mlungu wake.

⁷Nao Daudi ukamzera mkohani Abiathari, mwana wa Ahimeleki, “Niredie naivera.” Abiathari ukamredia Daudi iyo naivera.

⁸Daudi ukamlomba BWANA ukighamba, “Wele BWANA, niwinughe awa wandu? Nidima kuwiwada?” BWANA ukamtumbulia, “Winughe; loli kuchawiwada sena kuvuvuo wandu wako.”

⁹Nao Daudi ukawuka na wandu wake maghana arandadu awo orekwanyeghe nawo, wikaghenda wikavika kamoda ka Besori; na aho wandu wamu wake wikasigharika nanyuma.

¹⁰Ela Daudi chiaimweri na wandu maghana ana wikachuria kuwinugha. Wandu maghana awi werekoghe wasilwa nandighi wikasigharika aho kamoda ka Besori.

¹¹Nao wandu wa Daudi wikamkua Mmisri umu a mlambenyi, wikamreda kwa Daudi. Wikamneka vindo ukaja; na machi, ukanywa;

¹²wikamneka kibelele cha keki ya tini na vanga viwi va zabibu. Uendameria kuja ivo vindo, ukaelwa ni meso; kwa kukaia orekaieghe njala usejie hata kunywa kwa matuku adadu kio na dime.

¹³Daudi ukamzera, “Oho nani, na kwafuma hao?” Ukatumbulia, “Ini ne mdawana Mmisri; ne mdumiki wa Muamaleki umu, na bwana wapo odenisigha niendawuya mkongo matuku adadu ghiidie.

¹⁴Daafuma kukaba mizi ya Negebu ya Wakerethi, isanga ja wandu wa Juda, na isanga ja Negebu ya Kalebu; na muzi ghwa Siklagi dikaghukora.”

¹⁵Daudi ukamzera, “Kwadima kunighenja kwa ijo ijeshi?” Ukaghamba, “Nibonyere ighemi kwa irina ja Mlungu kukaia ndekuchaanibwagha, hata ndekuchaanifunya kwa bwana wapo; nani nichakughenja kwa ijo ijeshi.”

¹⁶Nao iji Daudi waghenjwa ukawikua waja wandu wasasarika isangenyi kose, wikija na kunywa na kuvina kwa wundu ghwa ivo vilambo vingi wavidwa wunyika kufuma isanga ja Wafilisti, na isanga ja Juda.

¹⁷Nao Daudi ukawikaba kufuma lumisimisi hata luma lwa kenyi ituku ja kawi. Mndungi nderedimieghe kufufunuka, ela wandu wa irika maghana ana awo werejokieghe ngamila wikakimbia.

¹⁸Daudi ukawunja vilambo vose veredwaloghe ni Waamaleki, na kuwivuvua waka wake wawi.

¹⁹Ndekuwadie kilambo chingi cherelagharieghe, chikaiagha kitini angu kibaa; ikaiagha wana wa womi angu wana wa waka; vilambo veredwaloghe wunyika angu icho chose cheredukiloghe. Daudi ukaviwunja vose.

²⁰Wokoni Daudi ukawada mfugho rose na ng'ondi na ng'ombe. Wandu wikaridwa na kurilongoza iro ng'ombe imbiri kwake, wikighamba, “Ivi ni vilambo va Daudi wavidwa.”

²¹Nao Daudi ukawichea waja wandu maghana awi werekoghe wasilwa na kusigharika aja ndoria ya Besori; nawo wikafuma kwendammara Daudi chiaimweri na wandu werekwanyeghe. Hata iji Daudi wavika kaavui nawo, ukawiroghua.

²²Niko awo wandu wawiwi na wa kisha, aghadi ya awo wereghendanyeghe na Daudi wikaghamba, “Awandu ndewipatagha kilambo chingi dachidwa wunyika, ela kula umu wawo uchanekwa mkake na wana wake ughende; kwa kukaia ndewereghendanyeghe nesi.”

²³Ela Daudi ukaghamba, “Ii hata wanidu, msebonye huwo na vilambo danekwa ni BWANA. Wadilindirie ukadisimia ijo ijeshi werechieghe kulwa nesi.

²⁴Mndungi ndedimagha kurumiriana na malagho ghenyu; mundu wasighwanya na vilambo uchawaghilwa karakara na uo ughendieghe wudenyi.”

²⁵Nao kufuma ngelo iyo, Daudi ukaibonya ikaie sharia ya Waisraeli hata idime.

²⁶Daudi uendavika Siklagi, ukawiwaghia waghenyi wake ivo vilongozi va Juda ivo vilambo wavidwa wunyika ukighamba, “Wadenyi zawadi ya vilambo vawadwa wunyika kufuma kwa wamaiza wa BWANA.”

²⁷Vilambo ivo ukaviwaghia wandu wa Betheli, na wandu werekoghe Ramothi ya Negebu, na wandu wa Jatiri,

²⁸na wa Aroeri, na wa Sifmothi, na wa Eshtemoa;

²⁹na wa Rakali, andenyi ya mizi ya wa Jerahimeeli, na mizi ya Wakeni;

³⁰andenyi ya Horma, na Borashani, na Athaki;

³¹na Hebroni, na andu kose Daudi orekoghe ukimara na wandu wake.