Read TAITA BIBLE – Biblia Ilagho Jiboie Kwa Wandu Wose 1 SAMUELI 31 Bible Online

1 SAMUELI 31 - TAITA BIBLE – Biblia Ilagho Jiboie Kwa Wandu Wose bible

1 SAMUELI 31

¹Nao Wafilisti wikalwa na Waisraeli, hata Waisraeli wikakimbia; wikabwaghwa aighu ya mghondi ghwa Gilboa.

²Na Wafilisti wikawivikia Sauli na wana wake. Wikam'bwagha Jonathani na Abinadabu, na Malkishua, awo wana wa Sauli.

³Nao wuda ghukabia nandighi aighu ya Sauli, na wandu wekumba ndana wikamlasa, wikamshoghonua nandighi.

⁴Nao Sauli ukamzera uja mdawana oremdukiagha maswagha ghake, “Kua lufu lwako kunidunge nalo nisechewadwa ni awandu wiseshamishiro, nao winidunge na kuniseka.” Ela uja mdawana ukalemwa angu oreobueghe nandighi. Kwa huwo Sauli ukaludegha lufu lwake, ukalughuya na kukudunga nalo.

⁵Uja mdawana oremdukiagha maswagha uendawona huwo, nao moni ukaludegha lufu lwake, ukalughuya na kukudunga nalo; ukafwa chiaimweri na Sauli.

⁶Huwo niko Sauli orefueghe na wana wake wadadu, na uja mdawana oremdukiagha maswagha, na wandu wake wose wikafwanya kwa ituku jimweri.

⁷Waisraeli awo werekoghe kimonu cha vololo ya Jezreeli na awo wamu wa kimonu cha Jordani wiendasikira kukaia Waisraeli wakimbia, na Sauli na wana wake wafwa, wikaisigha mizi yawo na kukimbia. Wafilisti wikacha wikaingia, wikakaia aho.

⁸Nakesho yaro, iji Wafilisti werechieghe kuwirua nguwo awo werebwaghiloghe, wikamkua Sauli na wana wake wadadu wifue aighu ya mghondi ghwa Gilboa.

⁹Wikamdumbua chongo chake na kumrua maswagha ghake, wikaduma wandu isanga jose ja Wafilisti kueresha agho malagho mecha kwa milimu yawo na kwa wandu.

¹⁰Wikawika maswagha ghake andenyi ya Hekalu ya mlungu ghwa waka Ashtorethi, na mumbi ghwake wikaghuwamba wurighenyi ghwa Beth-shani.

¹¹Ela iji wandu wa Jabeshi-gileadi wasikira seji Wafilisti wim'bonyere Sauli,

¹²wandu wose wiko mang'oni wikalalaghenda chee, wikacha na kughuwusa mumbi ghwa Sauli na ya wana wake kufuma wurighenyi ghwa Beth-shani, wikaireda Jabeshi na kuikora aho.

¹³Wikadwa maindi ghawo na kughirika aisi ya mudi ghwa kireti ghuwangwagha tamariski aho Jabeshi; wikafunga tumu kwa matuku mfungade.