Read Tabaa Zapotec Salmos 103 Bible Online

Salmos 103 - Tabaa Zapotec bible

Salmos 103

¹Be̱ lá'ana Xránadxu Dios, lue', bénne'du xu'a.Be̱ lá'ana Le̱' lá'azxa, dute̱ da naca'.

²Be̱ lá'ana Xránadxu, lue', bénne'du xu'a,ne quebe gal-la lazru' ca da chawe' da nune̱' chiu'.

³Dxunite lawe̱' chee̱ xúgute̱ dul-la nabaga'a.Dxexune̱' neda' ca naca xúgute̱ xízrawe̱' da xu'a.

⁴Dxuxúe̱' neda' chee̱ quebe gatia'.Lu xel-la' zri'i lazre' chee̱', ne xel-la' dxexache lazre' chee̱' dxune̱' chawe' chia'.

⁵Dxuzánle̱'e̱ da chawe' da dxaca chia' chee̱ xegá'ana' benne' cuide',ne benne' wal-la ca dxaca chee̱ tu bsia.

⁶Xránadxu Dios dxuchi'e̱ chee̱ da dxaca chee̱ benne' dxeledée̱' da ba xa',ne dxucá'ana chawe̱' da dxaca chee̱'.

⁷Blé'ene̱' Moisés da ca' gulú'u lazre̱' gune̱',ne be̱'e̱ lataj benne' Israel ca' belelé'ene̱' da ca' be̱ne̱'.

⁸Naca Xránadxu Benne' dxexache lazre', ne Benne' zri'i lazre'.Quebe dxezrá'azie̱', san zrente̱ naca xel-la' zri'i lazre' chee̱'.

⁹Quebe nníaqueze̱', ne quebe zrá'aqueze̱'.

¹⁰Quebe dxudée̱' dxi'u lu da ba xa' ca naca zria da nabágadxu,ne quebe ne guzría xi'e̱ dxi'u ne̱ chee̱ dul-la da nabágadxu.

¹¹Ca sibe naca xabáa lawe' xe̱zr la xu,caníqueze naca xel-la' zri'i lazre' zren chee̱' nen benne' ca' dxelape̱' Le̱' ba lá'ana.

¹²Ca zitu' naca naga dxalaj gubizra, ne naga dxebía na,caníqueze dxucuase̱' zitu' dul-la da nabágadxu.

¹³Ca zri'i lazre' naca xra bidu ca' nen zrí'inequeze̱',caníqueze naca zri'i lazre' Xránadxu nen benne' ca' dxelape̱' Le̱' ba lá'ana.

¹⁴Le̱' nézene̱' ca nácadxu lu be̱la' dxen chee̱dxu.Dxajsá lazre̱' nácadxu xu xrte.

¹⁵Ca naca xel-la' nabán chee̱dxu, nácadxu ca tu xixre'.Dxegúladxu ca tu xiaj xixre',

¹⁶na' dxedé be' dxua na le̱ na, na' dxexenite na,na' québedxa nu dxelé'equeze le̱ na.

¹⁷Ca naca chee̱ benne' ca' dxelape̱' ba lá'ana Xránadxu,zúale̱ xel-la' zri'i lazre' chee̱' benne' ca' chadía chacanna,na' xel-la' xrlátaje chee̱' zúale̱queze na xúgute̱ zri'ine zre sua benne' ca',

¹⁸benne' ca' dxelúnqueze̱' ca naca xel-la' wezría nune̱',ne benne' ca' dxelune̱' ca zaj naca da nadxixruj be'e̱.

¹⁹Nuzúa Xránadxu lataj chee̱' xabáa naga dxe'e̱ dxenná be'e̱.Nácaqueze̱' Wenná Bea lawe' xúgute̱ da zaj zua.

²⁰Le güe lá'ana Xránadxu, le'e, gubáz chee̱ xabáa ca',Nácale benne' wal-la, ne benne' chúchule̱'e̱,na' dxunle ca dxenná Le̱', ne dxuzé̱ nágale ca dxe̱'e̱ le'e.

²¹Le güe lá'ana Xránadxu, le'e, dxenná beale xabáa.Nácale we̱n zrin chee̱', ne dxunle ca dxaca lazre' Le̱'.

²²Le güe lá'ana Xránadxu, xúgute̱le le'e ba nun Dios le'e,zrale xúgute̱ lataj naga dxenná bea Le̱'.¡Be̱ lá'ana Xránadxu, lue', bénne'du xu'a!