Read Tabaa Zapotec Salmos 104 Bible Online

Salmos 104 - Tabaa Zapotec bible

Salmos 104

¹Be̱ lá'ana Xránadxu Dios, lue', bénne'du xu'a. ¡Xrana' Dios, szrente̱ nacu' Lue'!Nacu' zra lanu' da xabáa, ne da xrtante̱.

²Dxugacu cuinu' xel-la' naxaní' ca zra lanu'.Dxechilju' xabáa ca tu xu'u ladxe' chiu'.

³Nunu' lizru' lawe' nisa da ze̱ ná'ala.Dxuchínenu' beuj ca' ca tu da dxudé xua naga dxe'u Lue', da dxedá na lu be'.

⁴Dxuchínenu' be' ca' ca gubáz chiu' ca',ne xesa ca' ca we̱n zrin chiu' ca'.

⁵Bzua chuchu' xe̱zr la xu nigá lu lane na,na' quebe nu gaca gutá le̱ na.

⁶Bgacu' xe̱zr la xu nigá nen nísadau' ca dxun tu benne' dxacue̱' zra lane̱',na' nisa na' bgacu na xi'a ca'.

⁷Gate gudil-lu' nisa na', na' bzrunnuj na.Bebiga na gate ben na chi'u zizraj.

⁸Nisa na' bgacu na xi'a ca' xajxedxé na dxu'a xe̱gu ca',lataj ca' ba nunu' chee̱ nisa na'.

⁹Bzu' naga ze lau cheajsé̱ na, naga québedxa gaca te na,chee̱ québedxa gacu na xe̱zr la xu bizre na'.

¹⁰Dxunu' beaj ca' dxelalaj na dxu'a xé̱gudu ca',ne xe̱gu ca' dxeledé na ládujla xi'a ca'.

¹¹Lu xe̱gu ca' dxelé'aj be̱ xixre' ca' nisa,na' dxegúa na xel-la' dxelebile chee̱ burro xixre' ca'.

¹²Lu xaga zaj nnita dxu'a xe̱gu ca' zaj zra' béadu ca' zaj zua xrila.Dxelúl-laba' ládujla zruze na ca'.

¹³Zran xabáa dxesel-lu' xiuj da dxaca na lu xi'a ca',na' dxezrate̱ xe̱zr la xu na' ca naca da xrlátaje da dxunu'.

¹⁴Dxusegulu' xixre' da dxelagu be̱zre ca',ne xíxre'du ca' da dxelagu bénneache,ne da ca' dxuluchine bénneache dxelune̱' xel-la' wagu,

¹⁵ne uva ca' da dxelune̱' xrise uva wal-la da dxuzúa na bénneache ca' xel-la' dxelebé,ne olivo ca' da dxelune̱' da za da dxelegú'e̱ xíchaje̱',ne zrua' da dxelune̱' xeta chee̱ xelaca bane̱'.

¹⁶Xaga cedro ca' da zaj zua na xi'a Líbano dxelezíle̱'e̱ na nisa xiuj.Zaj naca na xaga chee̱ Xránadxu Dios, da ca' guza Le̱'.

¹⁷Lu xaga ca' dxuluzría bxínnedu ca' xrú'uneba',na' lu zruze na ca' zaj zua lizre bxuze' ca'.

¹⁸Zaj zua chivo xi'a ca' lu xi'a zri'a ca',na' lu bluaj ca' chee̱ xi'a ca' zaj zua bzrizru' ca'.

¹⁹Be̱nu' beu' da dxulé'e na tu beu' tu beu' chee̱ iza,na' gubizra núnbea na gate dxal-la' cuía na.

²⁰Be̱nu' dxe̱la, na' gate bache nachul-la,na' dxeledxúaj be̱ dxe̱la ca'.

²¹Dxelebezre xa'a be̱zre xixre' ca', zaj nauba' be̱ xeláguba'.Dxelílajba' da nun Dios xeláguba'.

²²Gate dxalaj gubizra, na' dxelexezrinba' lu bluaj chee̱ba', naga dxeláseba' te zra.

²³Nadxa dxeledxúaj bénneache dxelune̱' zrin,na' dxelúnqueze̱' zrin ca dxebía gubizra.

²⁴Xran, da zante̱ zaj naca da be̱nu'.Dute̱ xel-la' sina chiu' be̱nu' da ca'.Nazrate̱ xe̱zr la xu nigá da ca' be̱nu'.

²⁵Na' zua nísadau', da zri'a, ne da laga,naga zaj xu'u zánete̱ bea ca', béadu ca', ne be̱ zri'a ca'.

²⁶Lu nísadau' na' zaj zra' da dxeledá lawe' nísadau' ca'.Zua be̱ zri'a na' be̱nu' Lue', nazí' laba' leviatán.

²⁷Xúgute̱ bea ca' dxuluxrén lázreba' Lue',chee̱ gunézruju' da xeláguba' ca zrin chee̱ na.

²⁸Dxunézruju' le̱ba', na' dxelecá'aba' na.Dxunézruju' da dxeláguba', na' dxeléljeba'.

²⁹Gate quebe dxenná'u-ba', na' dxelezrébeba'.Gate dxucuasu' be' dxelecá'aba', na' dxeláteba', ne dxelexácaba' xu xrte.

³⁰Gate dxesel-lu' be' chiu', na' xelexaca banba'.Dxunézruju' xel-la' nabán cube chee̱ da ca' zaj zua xe̱zr la xu nigá.

³¹¡Chadía chacanna gaca ba Xránadxu Dios!Dxezaca ba lazre' Xránadxu chee̱ da ca' ba núnqueze̱'.

³²Dxenné̱'e̱ xe̱zr la xu nigá, na' dxezrú' na.Dxuté̱' xi'a ca', na' dxeledxúaj na zren.

³³Gúl-laqueza' chee̱ Xránadxu dxácate̱ na' naca bana'.Xúgute̱ zra zúaqueza' neda' gul-la' da güe lá'ana' Dios chia'.

³⁴Chawe' naca chia' da ca' dxulaba lazra' ca naca chee̱',na' dxebéle̱'e̱da' ne̱ chee̱ Xrana' Dios.

³⁵Welebía xi' benne' dul-la ca' zaj zre̱'e̱ lu xe̱zr la xu nigá,Na' québedxa cha benne' ca' dxelebéaj xíchaje̱' Dios. ¡Be̱ lá'ana Xránadxu Dios, lue', bénne'du xu'a!¡Le güe lá'ana Xránadxu!