Read Tabaa Zapotec Salmos 105 Bible Online

Salmos 105 - Tabaa Zapotec bible

Salmos 105

¹¡Le güe lá'ana Xránadxu Dios!¡Le gucá'ana szren La Le̱'!¡Le guzén bénneache dute̱ xe̱zr la xu ca naca da nune̱'!

²¡Le gul-la chee̱'!¡Le gul-la da güe lá'anale Le̱'!¡Le guchalaj chee̱ da zrente̱ ca' da nune̱'!

³¡Le be lu da naca chee̱'! Xúgute̱ benne' ca' dxelapa ba lá'ana Xránadxu dxal-la' xelebéle̱'e̱ne̱'.

⁴Le naba Xránadxu gácale̱ne̱' le'e.Tu zra tu zra le guxrén lazre' Xránadxu Dios.

⁵Le'e, zri'ine zre sua Abraham, we̱n zrin chee̱ Xránadxu.Le'e, zri'ine zre sua Jacob, bénnea' guqué̱'e̱,Le gusá lazre' xel-la' waca ca', ne da zrente̱ ca' da be̱ne̱',ne ca naca da bchi'e̱ chee̱le.

⁷Le̱' naque̱' Xránadxu, ne Dios chee̱dxu.Le̱' dxenná bé'ene̱' bénneache zaj zre̱'e̱ dute̱ xe̱zr la xu.

⁸Lácala te chee̱ chi gaxúa cuen bénneache,québequeze gal-la lazre̱' da guche̱be lazre̱' lu xel-la' wezría chee̱',

⁹xel-la' wezría na' bé̱nle̱ne̱' Abraham,da na' bzetaj cuine̱' guche̱be lazre̱' chee̱ Isaac,

¹⁰na' bzua chúchue̱' na ca tu da nadxixruj bea na, da gun Jacob,da gaca na tu xel-la' wezría da zeajlí canna nen benne' Israel ca',

¹¹da be̱ne̱' gate na' gunné̱': “Chiu' lue' gunna' xe̱zr la xu chee̱ benne' Canaán ca',da gaca na tu da xudele lu na' zri'ine zre súale.”

¹²Gate na' bábaze zaj naque̱'gulezré̱'e̱ lu xe̱zr la xu nigá ca benne' zitu' ca',

¹³ne guledée̱' tu xe̱zr la xu xetú xe̱zr la xu, ne tu xe̱zre xetú xe̱zre.

¹⁴Quebe be̱' Dios lataj nu benne' bi gune̱' chee̱ bénneache chee̱',na' ne̱ chee̱ benne' ca' gudil-le̱' benne' wenná bea ca'.

¹⁵Guzre̱' le̱': “Quebe bi gunle chee̱ benne' ca' gucá'a,ne quebe gunle da cale̱la chee̱ benne' ca' dxuluchalaje̱' waláz chia'.”

¹⁶Be̱ne̱' guta' tu gubina' lu xe̱zr la xu na',na' gudúe̱' ca naca xeta xelawe̱'.

¹⁷Gusel-le̱' tu benne' cuía lawe̱' lau benne' chie̱' ca',bénnea' naque̱' José, bi na' belutie̱'-be' chee̱ gácabe' we̱n zrin chee̱ benne' zitu'.

¹⁸Buluzré̱'e̱ ní'abe' lu xe̱dxu chee̱ cuaga da be̱xru na ní'abe',gate na' gulu'e̱-be' lizre xia lu xe̱zr la xu Egipto,

¹⁹ca bzrin zra guca li ca da gunná José dxal-la' gaca.Caní guca, ble'e xrtizra' Xránadxu cúnnabe' da li.

²⁰Nadxa benne' wenná bea chee̱ Egipto gusel-le̱' nu gusán José na'.Bénnea' dxenná bé'ene̱' zánete̱ cue' xe̱zr la xu bsane̱'-be'.

²¹Bzue̱'-be' gácabe' xrana benne' zaj zre̱'e̱ lizre̱',ne chee̱ nna be'ebe' ca naca da xu'u lu ne̱'e̱,

²²chee̱ tíl-labe' benne' szren ca' chee̱ wenná bea cáte̱ze dxaca lázrebe',ne chee̱ guzéajni'ibe' benne' gula chee̱ xe̱zr la xu Egipto chee̱ xelaque̱' benne' sina.

²³Gudé na' gulu'e̱ benne' Israel ca' lu xe̱zr la xu Egipto,na' guzúa Jacob lu xe̱zr la xu chee̱ zri'ine zre sua Cam.

²⁴Gulánle̱'e̱ bénneache chee̱ Xránadxu lu xe̱zr la xu na',na' be̱ne̱' gulaque̱' wál-ladxa ca benne' guledábague̱' Le̱'.

²⁵Bcha Dios lázxdau benne' Egipto ca' chee̱ xelecuídene̱' bénneache chee̱',chee̱ xelegú'u lazre̱' xelune̱' da cale̱la chee̱ we̱n zrin chee̱' ca'.

²⁶Nadxa gusel-le̱' Moisés, we̱n zrin chee̱', lau bénneache chee̱' ca', ne Aarón, bénnea' guqué̱'e̱.

²⁷Benne' caní be̱'e̱ Dios lataj belune̱' xel-la' waca ca' chee̱ xabáa,ne xel-la' waca zrente̱ ca' lu xe̱zr la xu chee̱ zri'ine zre sua Cam.

²⁸Gusel-la Dios tu da chul-la da bgacu na dute̱ xe̱zr la xu na',san benne' Egipto ca' quebe buluzúe̱' dizra' da gunná be'ene̱' le̱'.

²⁹Nadxa be̱ne̱' bexaca nisa xe̱gu chee̱ benne' ca' dxen,ne be̱tie̱' xúgute̱ bela zaj zraba' xe̱gu ca'.

³⁰Busezrate̱' xe̱zr la xu chee̱' bluzru ca' ga bzrinte̱ gulezraba'xu'u lizre benne' wenná bea chee̱ benne' Egipto ca'.

³¹Gunnaze Dios, na' belelá' zánete̱ be'a chee̱ be̱zre,ne be'a lase ca' dute̱ lu xe̱zr la xu chee̱ benne' ca'.

³²Waláz chee̱ nisa xiuj gusel-le̱' xiaj bezxe' lu xe̱zr la xu chee̱ benne' ca',ne xi' da bzezxe na ca naca xe̱zr la xu chee̱'.

³³Bzria xi'e̱ ca zaj naca lba uva chee̱', ne ca zaj naca xaga higo chee̱',na' bzúzxuje̱' ca zaj naca xaga zaj ze̱ lu xe̱zr la xu chee̱'.

³⁴Gunnaze̱', na' belelá' biche zu ca',da quebe nu seque' gulaba le̱ba',

³⁵na' guláguba' dute̱ xixre' xa'a lu xe̱zr la xu chee̱',ne guláguba' dute̱ lina da dxunna xe̱zr la xu na'.

³⁶Nadxa be̱tie̱' xúgute̱ bi biu nedxu chee̱ benne' Egipto ca', bi zaj nácabe̱' bi blau chee̱'.

³⁷Bebéaje̱' bénneache chee̱' na' zaj nu'e̱ dumí plata, ne dumí oro,na' quebe nu chilá' benne' ládujla le̱', benne' quebe chawe' zue̱'.

³⁸Gulebé benne' Egipto ca' gate beledxúaj benne' ca' ga na', lawe' da belezrébele̱'e̱ le̱'.

³⁹Bzalaj Dios tu beuj da gulú'u na benne' ca' zrul-la,ne tu xi' da bsaní na chee̱' chizrela.

⁴⁰Gulenabe̱' Dios, na' gusel-le̱' chee̱' btau ca',ne be̱ne̱' gulélajene̱' xeta da bdxuaj na xabáa.

⁴¹Gule̱'e̱ tu xiaj xre, na' gulaj nisada gudé na lu xe̱zr la xu bizre na' ca tu xe̱gu nisa.

⁴²Caní be̱n Dios lawe' da bsa lazre̱' xrtizre̱' lá'azxada guche̱be lazre̱' gune̱' chee̱ Abraham, we̱n zrin chee̱'.

⁴³Bebéaje̱' bénneache chee̱' lu xe̱zr la xu Egipto, dxelebene̱'.Lu da ba neza gulezrá' benne' ca' guqué̱'e̱.

⁴⁴Bnézruje̱' benne' ca' xe̱zr la xu chee̱ benne' xezica ca',na' da belún benne' xe̱zr la xu ca' bexaca na chee̱ benne' chee̱' ca',

⁴⁵chee̱ xulupá'ane̱' ca naca xrba chee̱' ca',ne xelune̱' ca naca da gunná bé'ene̱' ca'. ¡Gaca ba lá'azxa Xránadxu Dios!