Read Tabaa Zapotec Salmos 106 Bible Online

Salmos 106 - Tabaa Zapotec bible

Salmos 106

¹¡Gaca ba lá'azxa Xránadxu Dios!¡Le xe̱ Xránadxu Dios: “Xcalenu'!”Caní dxal-la' gunle lawe' da naque̱' xrlátaje,ne lawe' da tu chí'izqueze dxexache lazre̱' dxi'u.

²¿Núzraqueze seque' gulé'ene̱' ca naca xel-la' waca zrente̱ ca' da nune̱' Xránadxu?¿Núzraqueze seque' güe lá'ane̱' Le̱' ca dxal-la' gundxu?

³Ba neza zrente̱ naca na chee̱ benne' ca' dxelune̱' da xrlátaje,benne' ca' tu dxelúnzqueze̱' da naca xrlátaje.

⁴Bsa lazre' chia', Xrana' Dios, gate dxunu' da chawe' chee̱ bénneache chiu'.

⁵Gudá bselá neda' chee̱ gaca le'eda' da chawe' gunu' chee̱ benne' ca' ba guca'u Lue',ne chee̱ beda' gate xelezrá' bénneache chiu' lu da ba neza, ne chee̱ béle̱na' bénneache chiu'.

⁶Ba be̱ntu' dul-la cáqueze belún xra xrtáuntu' ca'.Be̱ntu' da cale̱la, ne be̱ntu' da zrinnaj.

⁷Gate gulezrá' xra xrtáuntu' lu xe̱zr la xu Egipto,quebe bululaba lazre̱' ca naca xel-la' waca ca' chee̱ xabáa da be̱nu'.Quebe xeajlesá lazre̱' ca bexache lázrele̱'u le̱'.Guledábague̱' Lue' dxu'a nísadau' da nazí le na Xrna.

⁸Le̱' bselé̱' benne' ca' chee̱ gaca ba lá'ana La Le̱',ne chee̱ gulé'e lau ca naca xel-la' waca chee̱'.

⁹Gudil-le̱' nísadau' Xrna na', na' bebizre na,na' guledé bénneache chee̱' laduj nísadau' na' lu xu bizre.

¹⁰Bselé̱' benne' ca' lu na' benne' guledábague̱' Le̱',ne bebéaje̱' le̱' lu na' benne' ca' bulusaca zi'e̱ le̱'.

¹¹Nadxa nísadau' na' bgacu na benne' ca' guledábague̱' le̱'.Netú benne' ca' quebe nu begá'ana.

¹²Nadxa benne' chee̱' ca' guléajle̱'e̱ dizra' chee̱',ne belul-le̱' da belúe lá'ane̱' Le̱'.

¹³Chadí gulal-la lazre̱' ca da be̱ne̱'.Quebe gulebeze̱' ca la' dizra' chee̱ Dios.

¹⁴Gulezá lazre̱' tu da cale̱la le̱'e̱ xixre' lawe' lataj na',na' buluché̱'e̱ Dios le̱'e̱ xixre' na'.

¹⁵Gudé na' bnezruj Dios ca da gulenabe̱',san gusel-le̱' ládujla le̱' tu da gute na bal-la benne' ca'.

¹⁶Gulaque̱' xa lazre' chee̱ Moisés naga zaj zre̱'e̱,ne chee̱ Aarón, Bénnea' gucá'a Xránadxu Dios.

¹⁷Nadxa bzra xe̱zr la xu na', ne gude̱be na Datán,ne bgacu na benne' ca' zaj de̱'e̱ Abiram.

¹⁸Nadxa guxalaj xi' naga zaj nazraga benne' ca',na' bzezxe na benne' ca' dxelune̱' da cale̱la.

¹⁹Belune̱' tu bedáu' be̱zre da naca na oro lu xi'a Horeb,na' buluzú zribe̱' lau bedáu' oro na'.

²⁰Caní bulucá'ane̱' Dios, Benne' xabáa,chee̱ xulucá'ana szrene̱' tu bedáu' be̱zre,da naca na ca tu be̱zre dxáguba' xixre'.

²¹Gulal-la lazre̱' Dios, Bénnea' bselé̱' le̱',Bénnea' be̱ne̱' xel-la' waca zrente̱ ca' lu xe̱zr la xu Egipto,

²²ne be̱ne̱' xel-la' waca ca' chee̱ xabáa lu xe̱zr la xu chee̱ zri'ine zre sua Cam,ne da ca' buluchebe na dxi'u dxu'a Nísadau' Xrna.

²³Nadxa guca lazre' Dios guzría xi'e̱ bénneache chee̱',san Moisés, bénnea' gucá'a Dios, bzua cuine̱' lau Dioschee̱ guzúa zrie̱' xel-la' dxezrá'a chee̱ Dios,na' be̱ne̱' quebe guzría xi' Dios benne' ca'.

²⁴Buluzúe̱' chalá'ala xe̱zr la xu xrtante̱ da gunezruj Dios le̱',ne quebe guléajle̱'e̱ dizra' chee̱'.

²⁵Tu gulenné̱zqueze̱' chee̱ Dios lu xu'u xide chee̱' ca',ne quebe buluzé̱ nague̱' da gunná Xránadxu Dios.

²⁶Chee̱ le̱ na' bzetaj cuine̱' gunné̱' ca da gune̱' chee̱ benne' ca'.Gunné̱' gune̱' xelate benne' ca' le̱'e̱ xixre' lawe' lataj na',

²⁷ne gusi'e̱ bénneache chee̱' lu xel-la' stu' lau benne' xe̱zr la xu ca',ne guse dínnaje̱' le̱' ládujla benne' xe̱zr la xu ca'.

²⁸Nadxa belune̱' tuze benne' ca' dxulucá'ana szrene̱' bedáu' xia nazí le na Baal-peor,ne gulawe̱' béadu ca' belútie̱' lau dios gate ca'.

²⁹Buluche̱'e̱ Dios ne̱ chee̱ da belune̱',na' guxalaj tu xízrawe̱' zren da be̱te na benne' zan benne' ca'.

³⁰Nadxa guxasa Finees, ne be̱tie̱' bénnea' be̱ne̱' dul-la,na' guleza xízrawe̱' zren na'.

³¹Da na' be̱n Finees guzí' Dios ca tu da dxucá'ana xrlátaje na bénnea',da gulé'e lawe na lau xúgute̱ cuen bénneache ca'.

³²Cá'anqueze buluché̱'e̱ Dios dxu'a beaj nisa nazí le na Meriba,na' guca da cale̱la chee̱ Moisés ne̱ chee̱ benne' ca',

³³lawe' da ne̱ chee̱ da belune̱' guca Moisés xichaj zra'a,na' bexúbete̱ Moisés da gunné̱'.

³⁴Gate gulu'e̱ lu xe̱zr la xu nigá quebe buluzría xi'e̱ bénneache zaj nite̱' ga na'.Caní guca, quebe belune̱' ca da guzre Dios le̱' xelune̱'.

³⁵Gulaque̱' tuze benne' xe̱zr la xu ca',ne bulusé̱die̱' benne' Israel ca' xelune̱' ca dxelún benne' ca',

³⁶na' bulucá'ana szrene̱' bedáu' xia xaga ca' chee̱ benne' ca',da na' be̱n na bxrinnaj Dios bénneache chee̱'.

³⁷Belútie̱' zrí'ine̱' bi biu, ne bi nu'ula chee̱'lau bedáu' chee̱ da xriwe̱' ca',

³⁸ne bululálaje̱' dxen chee̱ bi dxé'enedu ca', bi quebe zaj nunbe' dul-la,da naca na dxen chee̱ zrí'ine̱' bi biu, ne bi nu'ula,bi ca' belútie̱' lau bedáu' xia xaga ca' chee̱ bénneache Canaán,na' guca sban xe̱zr la xu na' ne̱ chee̱ dxen chee̱ bidu ca'.

³⁹Da ca' belune̱' be̱n na le̱' sban,na' gulebéaj xíchaje̱' Dios lu da belune̱'.

⁴⁰Chee̱ le̱ na' bzrá'ale̱'e̱ Dios bénneache chee̱',na' gucuídene̱' benne' ca' zaj naca chee̱'.

⁴¹Nadxa bdee̱' benne' ca' lu na' benne' xe̱zr la xu ca',na' benne' ca' dxelecuide bénneache chee̱ Dios gulenná bé'ene̱' le̱'.

⁴²Benne' ca' guledábague̱' le̱' bulusaca zi'e̱ bénneache chee̱ Dios,ne buluxrínnaje̱' le̱' lu xel-la' dxenná bea chee̱'.

⁴³Zánete̱ lasa Dios bselé̱' bénneache chee̱' ca',san guledábague̱' ca da bsízrene̱' le̱',na' gulape̱' xel-la' stu' lawe' da belune̱' da cale̱la.

⁴⁴Lácala caní belune̱', gate gulezré̱'e̱ lu da ste̱be,Dios gunné̱'e̱ ca da dxelezaque̱',ne benne̱' ca da bululáwizre̱' Le̱',

⁴⁵na' xeajsá lazre̱' xel-la' wezría da bé̱nle̱ne̱' benne' ca',na' bexíaje lazre̱' chee̱ xel-la' dxezrá'a chee̱'lawe' da nácale̱'e̱ benne' dxexache lazre'.

⁴⁶Cá'anqueze be̱ne̱' belexache lazre' benne' ca'benne' ca' guleché̱'e̱ le̱' ca benne' zaj nada'u.

⁴⁷¡Bselá netu', Xránantu', nacu' Dios chee̱ntu'!¡Becá'a netu' ládujla benne' xe̱zr la xu ca',chee̱ güe lá'anantu' Lau' lá'azxa,ne chee̱ béle̱'e̱ntu' lu da dxúl-lantu' chiu'!

⁴⁸Cháwedau' naca Xránadxu, Bénnea' naque̱' Dios chee̱ benne' Israel ca' nédxudaute̱, ne chadía chacanna.Xúgute̱ bénneache dxal-la' xelenné̱': ¡Ca'an gaca na!¡Gaca ba lá'azxa Xránadxu Dios!