Read Tabaa Zapotec Salmos 107 Bible Online

Salmos 107 - Tabaa Zapotec bible

Salmos 107

¹¡Le güe lá'ana Xránadxu, Benne' xrlátaje!¡Chadía chacanna naque̱' Benne' zri'i lazre'!

²Da nigá dxal-la' xelenná benne' ca' ba naxá'awe Xránadxu le̱',benne' ca' bselé̱' lu na' benne' guledábague̱' Le̱'.

³Beche̱'e̱ le̱' naga gulezrá' benne' xe̱zr la xu zitu' ca',da zaj zua naga dxalaj gubizra, ne naga dxebía na,ne naga za' be' zaga, ne naga dxedé gubizra beu' zaga ca'.

⁴Bal-la benne' ca' guledé̱' le̱'e̱ xixre' naga quebe bi neza zua,ne quebe belezrelne̱' xe̱zre naga xelezúe̱'.

⁵Guledune̱', ne gulebílene̱',ne québedxa bi gulebeza lazre̱'.

⁶Nadxa lu da dxelezaque̱' gulenné̱' Xránadxu,na' bselé̱' benne' ca' lu da dxelezaque̱'.

⁷Na' buzre̱'e̱ le̱' tu neza li,chee̱ chjaque̱' tu xe̱zre naga xelezúe̱'.

⁸Dxal-la' xelúe lá'ane̱' Xránadxu lawe' da bexache lazre' Xránadxu le̱',ne lawe' da be̱ne̱' chee̱' da ca' da dxebánedxu.

⁹Dxuxí'aje̱' benne' ca' dxelebile lazre',ne dxugawe̱' benne' ca' dxeledún nen da chawe' chee̱'.

¹⁰Bal-la benne' caní gulezúe̱' lu da chul-la, ne lu da ste̱be chee̱ xel-la' gute.Gulaque̱' ca benne' zaj xu'e̱ lizre xia,ne zaj nadxéaj du xia, ne dxeledée̱' ba xa',

¹¹lawe' da guledábague̱' xrtizra' Xránadxu,ne buluzúe̱' chalá'ala da bzéajni'i Dios zrente̱ le̱'.

¹²Belexedú lazre̱' lu zrin zí'ite̱ da dxelune̱'.Xeleajcházie̱' zran xua da zaj nu'e̱,ne quebe nu chilá' gácale̱ne̱' le̱'.

¹³Nadxa lu da dxelezaque̱' gulenné̱' Xránadxu,na' bselé̱' benne' ca' lu da dxelezaque̱'.

¹⁴Nadxa bebéaje̱' benne' ca' lu da chul-lane lu da ste̱be chee̱ xel-la' gute,ne bzúzruje̱' du xia ca' da zaj nadxéaje̱'.

¹⁵Dxal-la' xelúe lá'ane̱' Xránadxu lawe' da bexache lazre̱' le̱',ne lawe' da be̱ne̱' chee̱' da ca' da dxebánedxu.

¹⁶Bchínnaje̱' dxa xu'u ca' zaj naca na xia gache,ne bzúzruje̱' xia ca' da zaj naxechaj na benne' ca'.

¹⁷Bal-la benne' ca' gulaque̱' benne' xala,ne guledée̱' xel-la' zi' ne̱ chee̱ dul-la da zaj nabague',ne ne̱ chee̱ da zrinnaj ca' da belune̱'.

¹⁸Belexegútene̱' da dxelé'aj dxelawe̱',na' xáteze ca gulátie̱'.

¹⁹Nadxa lu da dxelezaque̱' gulenné̱' Xránadxu,na' bselé̱' benne' ca' lu da dxelezaque̱'.

²⁰Gusel-le̱' dizra' chee̱' chee̱ benne' ca',na' bexune̱' le̱', ne bselé̱' le̱' lu xel-la' gute.

²¹Dxal-la' xelúe lá'ane̱' Xránadxu lawe' da bexache lazre̱' le̱',ne lawe' da be̱ne̱' chee̱' da ca' da dxebánedxu.

²²Dxal-la' xelé̱'e̱ Le̱': Xcalenu'.Dxal-la' xelú'e̱ da xulunézruje̱' Le̱',na' lu xel-la' dxelebé chee̱' dxal-la' xelúl-le̱',ne xuluzenne̱' bénneache ca zaj naca da nune̱'.

²³Bal-la benne' ca' guledée̱' lu nísadau'lu da zren ca' da dxedá lawe' nísadau'.Belezi'e̱ dumí zren lu zrin dxelune̱' lu nísadau'.

²⁴Belelé'ene̱' ca naca da ca' dxun Xránadxu,da ca' dxune̱' lu nísadau' da zaj naca na da dxebánedxu.

²⁵Gunné̱ze̱', na' guzú lau dxaca be' bdunu',na' gulasa xeajxruza zren lu nísadau'.

²⁶Belegüén da dxedá lawe' nísadau' ca' ca lu xi'a zri'a da naca na nísadau',na' belexexetaj na lu da situj lawe' nísadau' na'.

²⁷Gulechégüe̱', ne xeajleté̱' ni xeajleté̱' na' ca benne' dxelezuzre,na' guca dácheze ca da zaj nusé̱die̱'.

²⁸Nadxa lu da dxelezaque̱' gulenné̱' Xránadxu,na' bselé̱' benne' ca' lu da dxelezaque̱'.

²⁹Bzua zrie̱' be' bdunu' na' da dxaca na,ne gulezúa zri xeajxruza chee̱ nísadau' na'.

³⁰Gulebéle̱'e̱ne̱' lawe' da zaj zua zri xeajxruza ca',na' guché̱'e̱ Dios le̱' cháwedau' naga zjaque̱'.

³¹Dxal-la' xelúe lá'ane̱' Xránadxu lawe' da bexache lazre̱' le̱',ne lawe' da be̱ne̱' chee̱' da ca' da dxebánedxu.

³²Dxal-la' xuluzenne̱' ca naca xel-la' szren chee̱' naga zaj nazraga bénneache chee̱',ne xelúe lá'ane̱' Le̱' naga zaj nazraga benne' gula ca', benne' dxelenná be'e̱.

³³Be̱n Xránadxu gulebizre xe̱gu nisa ca',ne busú'aje̱' beaj nisa ca'.

³⁴Xu xa'a bexune̱' na xu bizre,ne̱ chee̱ da cale̱la da belún benne' ca' zaj zre̱'e̱ na'.

³⁵Naga naca xu bizre bexune̱' na xu nisa,na' xu xiaj bexune̱' na naga dxalaj nisa.

³⁶Bzre̱'e̱ ga na' benne' ca' benne' dxeledún,na' belune̱' tu xe̱zre naga xelezúe̱'.

³⁷Gulaze̱' xe̱zr la xu na', na' belexaze̱' lba uva ca',na' belexezí'le̱'e̱ lina chee̱ na.

³⁸Be̱ne̱' da chawe' chee̱ benne' ca', na' gulánle̱'e̱ bidu chee̱' ca',ne quebe be̱'e̱ lataj xelelase ca zaj naca be̱ xixre' chee̱' ca'.

³⁹Gate buludé benne' dxelenná bea benne' ca' lu xel-la' zi', ne bulusaca zi'e̱ le̱',ne gulenná bé'edxene̱' le̱', ne belune̱' le̱' da cale̱la, ne buludée̱' le̱' lu da ba xa',

⁴⁰bca'ana ditaj Dios benne' xíchaje̱ ca',ne be̱ne̱' guledée̱' le̱'e̱ xixre' lawe' lataj naga quebe bi neza de̱.

⁴¹Bselé̱' benne' xache' ca' lu da zi' da xa' da dxeledée̱',ne bzánle̱'e̱ zri'ine benne' ca' ca dxelán zrila' ca'.

⁴²Gate dxelelé'e benne' xrlátaje ca' da caní, na' dxelebéle̱'e̱ne̱',na' benne' ca' dxelune̱' da cale̱la quebe bi gaca xelenné̱'.

⁴³Benne' ca' zaj naque̱' sina dxal-la' xulaba lazre̱' ca zaj naca da caní,ne dxal-la' xelexúnbe'e̱ ca naca xel-la' zri'i lazre' chee̱ Xránadxu.