Read Tabaa Zapotec Salmos 109 Bible Online

Salmos 109 - Tabaa Zapotec bible

Salmos 109

¹¡Dios, dxue lá'ana' Lue'!Quebe xegá'anu' zrize

²lawe' da dxelenná benne' ca' dxelune̱' da cale̱la,ne benne' we̱n lazre' ca' chia' neda'.Dxelenné̱' chia' da naca da we̱n lazre'.

³Lu xel-la' dxelecuide chee̱' zaj naxéchaje̱' neda', ne dxelenné̱' chia'.Dxeledíl-lale̱ne̱' neda', ne quebe bi nuna' chee̱ benne' ca'.

⁴Lácala bzri'ida' benne' ca', na'a dxeledábague̱' neda',san neda' dxenaba' gaca da chawe' chee̱ benne' ca'.

⁵Lácala be̱na' neda' da chawe' chee̱ benne' ca', dxelune̱' chia' da cale̱la,ne lácala bzri'ida' le̱', dxelecuídene̱' neda'.

⁶Bzua tu benne' we̱n da zrinnaj chee̱ guchi'e̱ chee̱ benne' we̱n da cale̱la ca',ne be̱n sua tu benne' nnie̱' chee̱ benne' ca',benne' guzúe̱' ca naca da cale̱la belún benne' ca'.

⁷Gate na' zri'a chee̱', be̱n gaca bea na zaj nabague̱' zria.Ble'e da xelenabe̱' lau' ca tu dul-la da dxelune̱'.

⁸Bzache zra xelaca ban benne' ca',ne be̱n xelú'u xezica' benne' waláz chee̱'.

⁹Bca'ana zrí'ine̱' ca' bidau' we̱ze̱be,ne xelaca zru'ule̱' nu'ula tuze ca'.

¹⁰Be̱n xelaca zrí'ine̱' bi dxeledaze chee̱ xelenábabe' guna',ne be̱n xelezrélebe' xeta xelágube' zitu' naga zaj zua lízrebe' da zaj naxinnaj.

¹¹Be̱n xelú'u da ca' zaj nape̱' lu na' bénne' ca' bulusane̱' le̱' dumí.Be̱n xelexúa benne' zitu' ca' da ca' zaj nune̱'.

¹²Be̱n quebe nu zrel-la benne' xexache lazre̱' le̱',ne quebe nu benne' zrel-la xexache lazre̱' bidau' we̱ze̱be chee̱' ca'.

¹³Be̱n xelebía xi' zri'ine zre sua benne' ca',ne québedxa nu cha' zri'ine zre sue̱',si' le̱' ca zaj nazi'i la benne' ca'.

¹⁴Bsa lazre' ca da cale̱la da belún xra xrtawe̱', Xran,ne quebe xusulu' dul-la da gulún xrne̱'e̱ ca'.

¹⁵Tu chí'izqueze bsa lazre' ca da cale̱la da zaj nune̱'.Québedxa cheajsá lazru' benne' ca'

¹⁶lawe' da quebe xeleajsá lazre̱' xelexache lazre̱' le sa' ljwezre̱' ca',san bulusaca zi'e̱ benne' baxache' ca', benne' dxelexázrjene̱',ne benne' dxexruj lazre' ca', na' belútie̱' bénne'du ca'.

¹⁷Beledánene̱' da dxugú'u na de', na' da caníze guca na chee̱'.Quebe gulaca lazre̱' xelenabe̱' gaca chawe' chee̱ bénneache,na' da chawe' bebiga na naga zaj zue̱'.

¹⁸De' da gulegú'e̱ bénneache guca na ca tu da gulacu cuine̱',na' guxú'u na le̱'e̱ ca nisa gulé'aje̱',ne guxú'u na zrita chee̱' ca da za.

¹⁹Tu chí'izqueze be̱n gaca na chee̱' ca xicha da dxelácue̱',ne gaca na ca tu xpádxue̱' dxuluchela le̱'e̱.

²⁰Gaca da nigá da quizruj Xránadxu Dios benne' ca' dxelenné̱' cale̱la chia',ne da quízruje̱' benne' ca' dxelune̱' da cale̱la,ne dxelenné̱' cale̱la chee̱ bénne'du xu'a.

²¹Xrana' Dios, be̱n culuén chia' chee̱ xegá'ana' xrlátaje lau'.Bselá neda' lawe' da dxexache lázrele̱'u bénneache,

²²ne lawe' da dxezaca zi'a, ne dxexázrjeda', ne dxeque zi' lázrdawa'.

²³Dxedé chia' ca dxedé chee̱ tu zrul-la gate dxebía gubizra.Dxaca chia' ca dxaca chee̱ biche xuaj gate dxua be' le̱ba'.

²⁴Dxelate zriba' lawe' da dxuna' gubasa,ne nazrítale̱'a lawe' da quebe bi dxawa'.

²⁵Naca' ca tu da dxulucá'ana dítaje̱'.Dxelenné̱'e̱ neda', ne dxelún le̱' chia', dxulutá xíchaje̱'.

²⁶Gúcale̱ neda', Xrana' Dios.Bselá neda' lawe' da dxexache lazru' bénneache.

²⁷Be̱n xeleque be'ene̱' Lué'queze dxácale̱nu' neda'.Lué'queze, Xrana' Dios, ba nunu' da nigá.

²⁸Dxelegu'e̱ neda' de', san be̱n Lue' gaca chawe' chia'.Guxasa, be̱n xelexedué'e benne' ca' dxeledábague̱' neda', san be̱n beda' neda'.

²⁹Be̱n xelezrá' lu xel-la' stu' benne' ca' dxelenné̱' da cale̱la chia'.Be̱n xeleque zréajene̱' tu chí'izqueze.

³⁰Du lazra' gúl-laqueza' da güe lá'anale̱'a Xránadxu Dios.Ládujla benne' zan ca' güe lá'ana' Le̱'.

³¹Le̱' zue̱' cuita xabe̱la chee̱ benne' xache' ca'chee̱ guselé̱' bénne'du zaj xu'e̱ lu na' benne' ca' dxuluchi'e̱ chee̱'.