Read Tabaa Zapotec Salmos 11 Bible Online

Salmos 11 - Tabaa Zapotec bible

Salmos 11

¹Dxuxrén lazra' Xrana' Dios.Ájazra che̱n' dxi'u bénne'du xu'a:“Bzrunnuj, guxíaj lu xí'ala ca tu bxinne?”

²Le na' xque, dxulucuéza benne' ca' dxelune̱' da cale̱la xaga nalá xéche'ze.Ba zaj naxrúe̱' xaga nalá xéche'ze chee̱' lu du chee̱ na, chee̱ xelútie̱' bagácheze benne' xrlátaje ca'.

³Chete ca' xelexinnaj da dxulusé̱ chuchu da xrlátaje,¿ájazra xelún benne' xrlátaje ca'?

⁴Xránadxu Dios zúaqueze̱' lataj lá'azxa chee̱'.Xabáaqueze zua lataj blau naga dxe' Dios.Dxelenná' xanne xiaj lawe̱'.Dxelé'ene̱' ca da dxelún bénneache.

⁵Xránadxu Dios dxudée̱' chawe' benne' xrlátaje ca' lu da ste̱be.Dxecuídene̱' benne' ca' dxelune̱' da cale̱la,ne benne' dxelune̱' da zrinnaj.

⁶Gudée̱' benne' ca' dxelune̱' da cale̱la lu da zi' da xa',da zaj naca na xi', ne da dxuzézrele̱'e da dxala na ca xedxe,ne tu be' lále̱'e̱, da ca' sel-le̱' lawe' benne' ca'.

⁷Caní gune̱' lawe' da naca xrlátaje Xránadxu Dios,ne nazrí'ine̱' da naca na xrlátaje.Benne' li lazre' ca' xelelé'ene̱' lawe̱'.