Read Tabaa Zapotec Salmos 121 Bible Online

Salmos 121 - Tabaa Zapotec bible

Salmos 121

¹Chisa xíchaja' nna'a da dxelún bénneache lu xi'a ca'.¿Gazra za' da gácale̱ na neda'?

²Da gácale̱ na neda' za' lu na' Xránadxu Dios,Bénnea' be̱ne̱' xabáa, ne xe̱zr la xu.

³Quebe gu'e̱ lataj cheajcháziu'.Quebe gase Bénnea' dxuxúequeze̱' lue'.

⁴Gunná' xque, quebe te bchigala chee̱ Bénnea'.Québequeze gase Bénnea' dxuxúequeze̱' benne' Israel ca.

⁵Xránadxu Dios dxucú'uje̱' lue'.Xránadxu Dios zue̱' cuitu' xabe̱la dxegu'e̱ lue' zrul-la.

⁶Quebe guzezxe gubizra lue' te zra,ne quebe bi gune beu' lue' chizrela.

⁷Xranu' Dios guxúequeze̱' lue' chee̱ quebe bi da cale̱la gaca na chiu'.Guxúequeze̱' bénne'du xu'u.

⁸Xránadxu Dios guxúequeze̱' lue' gate dxedxúaju',ne gate dxexú'u, na'a zra, ne chadía chacanna.