Read Tabaa Zapotec Salmos 138 Bible Online

Salmos 138 - Tabaa Zapotec bible

Salmos 138

¹Xrana' Dios, dute̱ lázrdawa' güe lá'ana' Lue'.Tu dxúl-lazqueza' da dxue lá'ana' Lue' lau dios ca' chee̱ benne' zitu' ca'.

²Dxuzú zriba' lau xudau' lá'azxa chiu',ne dxue lá'ana' Lau' lawe' da nacu' li lazre',ne dxexache lazru' bénneache chiu',ne lawe' da blé'enu' nacu' Benne' szrente̱,na' szrente̱ naca xrtizru'.

³Gate bláwizra' Lue', na' gúcale̱nu' neda'.Nen dute̱ xel-la' waca chiu' btipu' lazra'.

⁴Xúgute̱ benne' wenná bea du gabí'i xe̱zr la xuxelúe lá'ane̱' Lue', Xrana' Dios.Caní xelune̱' lawe' da ba belenne̱' ca naca xrtizru'.

⁵Xelúl-le̱' chee̱ da ba nune̱' Xránadxu Dios,lawe' da zrente̱ naca xel-la' ba chee̱ Xránadxu.

⁶Szrente̱ naca Xránadxu Dios, ne dxácale̱ne̱' benne' baxache' ca',na' quebe dxu'e̱ lataj benne' dxucá'ana szren cuine̱' zrine̱' lau Le̱'.

⁷Lácala zua' lu da ba xa', Lue' dxutipu' lazra'.Dxedábagu' benne' ca' dxeledábague̱' neda',ne dute̱ xel-la' waca chiu' dxuseláu' neda'.

⁸Gun Xránadxu Dios da guche̱be lazre̱' chia'.Xrana' Dios, tu dxexache lázrezquezu' bénneache chiu'.Quebe gusanu' dxunu' zrin da guzú lau' dxunu'.