Read Tabaa Zapotec Salmos 140 Bible Online

Salmos 140 - Tabaa Zapotec bible

Salmos 140

¹Xrana' Dios, bselá neda' lu na' benne' ca' dxelune̱' da cale̱la.Bxue neda' chee̱ quebe bi xelún benne' xichaj zra'a ca' chia' neda'.

²Benne' caní dxuluwía lazre̱' da cale̱la ca' da xelune̱'.Tu zra tu zra dxulutíl-lale̱ne̱' bénneache.

³Da dxelenné̱' naca na ca lazxa be̱la' da zaj nalále̱'e̱.Xrtizra' benne' ca' zaj naca na ca nisa snia chee̱ be̱la'.

⁴Xrana' Dios, bxue neda' chee̱ quebe bi xelún benne' ca' dxelune̱' da cale̱la chia' neda'.Bselá neda' lu na' benne' xichaj zra'a ca',benne' ca' dxelune̱' ba xuzre cheajcházia'.

⁵Benne' ca' dxulucá'ana szren cuine̱' zaj nabeque̱' tu da que̱l-la na neda'.Ba zaj nuzale̱' xralaj dxu'a neza.Ba zaj nabeque̱' da ca' xele̱l-la na neda'.

⁶Gucha' Xrana' Dios: Lue' nacu' Dios chia'.Xrana' Dios, bene chi'a dxuláwizra' Lue'.

⁷Xrana' Dios, nacu' weselá chia'.Lue' bcu'uju' xíchaja' lu zra guca wedil-la.

⁸Xran, quebe gu'u lataj gaca ca da dxelezá lazre' benne' ca' dxelune̱' da cale̱la.Quebe gu'u lataj chepe ban da dxuluwía lazre̱' xelune̱',chee̱ quebe xulucá'ana szren cuine̱'.

⁹Zaj naxechaj benne' ca' dxelune̱' da cale̱la neda'.Be̱n gaca chee̱ benne' ca' ca de' da dxelaca lazre̱' gaca chee̱ benne' xula.

¹⁰Be̱n xexruj xi' lawe' benne' ca'.Bzra benne' ca' lu xi'.Bzra benne' ca' lu da sítujle̱'e̱ naga cabátadxa xelexedxúaje̱'.

¹¹Quebe gu'u lataj xegá'ana lu xe̱zr la xu bénnea' dxenné̱' da cale̱la.Be̱n gaca da cale̱la chee̱ benne' xichaj zra'a, da guzría xi na le̱'.

¹²Nezda' xeche̱be Xránadxu Dios waláz chee̱ benne' baxache',ne guzé̱ chache̱' da zaj xu'u lu na' benne' xache' ca'.

¹³Da líqueze benne' xrlátaje ca' xelúe lá'ane̱' Lau' Lue',na' benne' li lazre' ca' xelezúe̱' naga zu' Lue'.