Read Tabaa Zapotec Salmos 145 Bible Online

Salmos 145 - Tabaa Zapotec bible

Salmos 145

¹¡Gucá'ana szrena' Lue', Dios chia', ne Wenná Bea chia'!¡Tu güe lá'anazqueza' Lau' Lue' chadía chacanna!

²¡Tu zra tu zra güe lá'ana' Lue'!¡Tu güe lá'anazqueza' Lau' Lue' chadía chacanna!

³¡Szrente̱ naca Xránadxu Dios, ne naca chee̱' tu güe lá'anazquezdxu Le̱'!¡Québequeze séquedxu gúnbeadxu ca szrente̱ naque̱'!

⁴Xúgute̱ cuen bénneache chiu' xelúe lá'ane̱' da be̱nu' Lue',ne xuluzenne̱' benne' xe̱zr la xu ca' ca naca da zrente̱ da be̱nu'.

⁵Gulaba lazra' ca naca da xrtante̱ chee̱ da xabáa chee̱ xel-la' szren chiu', ne ca naca da zrente̱ da nunu'.

⁶Xúgute̱ bénneache xuluchálaje̱' ca naca xel-la' waca chee̱ da zrente̱ da nunu',na' neda' guzenda' le̱' ca naca xel-la' szren chiu'.

⁷Xuluzenne̱' le sa' ljwezre̱' ca naca xel-la' zri'i lazre' zren chiu',ne tu xelúl-lazqueze̱' chee̱ da xrlátaje da nacu' Lue'.

⁸Xránadxu Dios naque̱' zri'i lazre', ne dxexache lazre̱' bénneache chee̱'.Dxezrene̱', ne quebe dxezrá'aze̱', na' dxexache lázrele̱'e̱ dxi'u.

⁹Dxun Xránadxu Dios da chawe' chee̱ xúgute̱ bénneache,ne dxexache lazre̱' xúgute̱ da zaj naca ban da nune̱'.

¹⁰Xúgute̱ da ca' nunu' xelúe lá'ana na Lue', Xran,na' bénneache chiu' xulucá'ana szrene̱' Lue'.

¹¹Dxelenné̱' ca szrente̱ naca xel-la' dxenná bea chiu'.Dxuluchálaje̱' ca naca xel-la' waca zrente̱ chiu',

¹²chee̱ xuluzenne̱' xúgute̱ bénneache ca naca da zrente̱ ca' da nunu',ne ca naca da xabáa chee̱ xel-la' szren chee̱ xel-la' dxenná bea chiu'.

¹³Xel-la' dxenná bea chiu' tu súazqueze na,ne nna be'enu' xúgute̱ cuen bénneache.

¹⁴Nuxru Xránadxu Dios xúgute̱ benne' ca' dxeajlecházie̱',ne dxechise̱' xúgute̱ benne' ca' zaj nada'u lu zrin wal-la.

¹⁵Xúgute̱ bénneache dxelenné̱'e̱ Lue' chee̱ gácale̱nu' le̱',na' Lue' gunézruju' da xelawe̱' ca zrin zra chee̱ na.

¹⁶Dxuzé̱ na'u, ne dxunézruju' ca naca da chawe'da dxelexázrje xúgute̱ da zaj naca ban.

¹⁷Xlátaje̱ naca Xránadxu Dios lu xúgute̱ da dxune̱',ne dxexache lazre̱' xúgute̱ da zaj naca ban da nun Le̱'.

¹⁸Xránadxu Dios zúate̱queze̱' gácale̱ne̱' xúgute̱ benne' ca' dxululáwizre̱' Le̱',xúgute̱ benne' ca' du lazre̱' dxululáwizre̱' Le̱'.

¹⁹Gune̱' ca dxelezá lazre' benne' ca' dxelezrebe̱' Le̱'.Cá'anqueze xenne̱' chee̱' gate xululáwizre̱' Le̱', ne guselé̱' benne' ca'.

²⁰Xránadxu Dios dxuxúequeze̱' xúgute̱ benne' ca' zaj nazrí'ine̱' Le̱',san guzría xi'e̱ xúgute̱ benne' ca' dxelebéaj xíchaje̱' Le̱'.

²¹Du lazra' güe lá'ana' Xránadxu Dios.Xúgute̱ benne' dxal-la' tu xelúe lá'anazqueze̱' Le̱' lá'azxa chadía chacanna.