Read Tabaa Zapotec Salmos 22 Bible Online

Salmos 22 - Tabaa Zapotec bible

Salmos 22

¹Dios chia', Dios chia', ¿bizr chee̱ na' nusán lazru' neda'?¿Bizr chee̱ na' quebe dxennu' da dxenaba' Lue' chee̱ guseláu' neda'?

²Dios chia', dxuláwizra' Lue' te zra, ne quebe dxexeche̱bu' chia'.Dxuláwizra' Lue' chizrela, ne quebe dxezí'i lazra'.

³Lá'azxa nacu' Lue'.Nacu' Benne' dxebeze̱' naga dxelúe lá'ana benne' Israel Lue'.

⁴Xra xrtáuntu' gulebeza lazre̱' Lue'.Gulebeza lazre̱', na' bseláu' le̱'.

⁵Bululáwizre̱' Lue', na' belelé̱'.Buluxrén lazre̱' Lue', na' quebe belexedué'ene̱'.

⁶Neda' naca' ca tu be̱la' gúna'dau', ne quegá bénneache.Dxelecuide bénneache neda', ne dxuluzúe̱' neda' chalá'ala.

⁷Xúgute̱ benne' dxelelé'e neda' dxelún le̱' chia'.Lu da dxelún le̱' chia' dxelexrá dxu'e̱,ne dxulutá xíchaje̱', dxelenné̱':

⁸“Bzua cuine̱' lu na' Xránadxu chee̱ guselé̱' le̱'.Guselé̱' le̱' che dxezaca ba lázrele̱ne̱' le̱'.”

⁹Lue' nacu' Bénnea' be̱xru' neda' gate gúlaja'.Be̱nu' bxren lazra' Lue' gate na' ne dxázretea'.

¹⁰Guxu'a lu na'u gate quebe ne gálajtea'.Gate ne xu'a lu le̱'e̱ xrna'a, báchequeze nacu' Dios chia'.

¹¹Quebe xebigu' naga zua' lawe' da zua gágute̱ da gusaca zi na neda',ne quebe nu chilá' benne' gácale̱ne̱' neda'.

¹²Zaj naxechaj benne' dxeledábague̱' neda' ca be̱zre ca'.Zaj naxechaj benne' neda' zaj naque̱' ca be̱zre wal-la ca' chee̱ Basán.

¹³Gulaca lazre̱' xuluzría xi'e̱ neda'ca tu be̱zre xixre' dxedunba', ne dxebezre xa'aba'.

¹⁴Bebizre lazra' ca nisa da nalalaj na lu xu,na' ca naca zrita xu'a bulusán ljwezre na.Lázrdawa' guca na ca xina' da bxuna na lu le̱'a ca nisa.

¹⁵Bexaca xel-la' wal-la chia' ca tu xé'ena xu la'a, na' luzra' bedá' na chichja'.Nuzú' neda' lu xu xrte chee̱ xel-la' gute.

¹⁶Zaj naxéchaje̱' neda' ca becu' ca'.Zaj naxechaj benne' we̱n da zrinnaj ca' neda'.Gulídue̱' ni'a na'a.

¹⁷Waca gulaba' ca naca zrita xu'a,na' benne' ca' dxelenné̱'e̱ neda', ne dxelenná' xánnie̱' neda'.

¹⁸Belexelé̱'e̱ zra lana' late' weaj,na' lawe' zra lana' gulebeje̱' da gaca bea na.

¹⁹Quebe xebigu' naga zua', Xran.Nacu' xel-la' wal-la chia'.Gudázega gácale̱nu' neda', Xran.

²⁰Bselá bénne'du xu'a lu na' benne' gu'e̱ neda' xia.Bénnea' guzría xi'e̱ neda' gune̱' ca dxun becu'.

²¹Bselá neda' lu dxu'a be̱zre xixre'.Bselá neda' lu luzu be̱zre wal-la ca'.

²²Guzenda' bi bícha'dau' ca' lau' Lue'.Güe lá'anaqueza' Lue' ladaj benne' zaj nazrague̱' lau'.

²³Le'e, dxezrébele Xránadxu, le güe lá'ana Le̱'.Le gucá'ana szrene̱', le'e, zri'ine zre sua Jacob.Le zrebe Le̱', le'e, zri'ine zre sua Israel.

²⁴Quebe bzua Dios chalá'ala, ne quebe gucuídene̱'da zi' da xa' da guledé benne' xache' ca',ne quebe bcache lawe̱' lau benne' ca'san gate bululáwizre̱' Le̱', benne̱' chi'e̱.

²⁵Güe lá'anaqueza' Lue' laduj benne' zan zaj nazrague̱' lau'.Ca da guche̱be lazra' gúnqueza' lau benne' ca' dxelezrebe̱' Lue'.

²⁶Xelagu benne' dxexruj lazre', ne welélajquezne̱'.Benne' ca' dxelebigue̱' lau Xránadxu xelúe lá'anaqueze̱' Le̱'.Tu gácazqueze da ba neza chee̱ benne' ca'.

²⁷Cheajlesá lazre' benne' dute̱ xe̱zr la xu Xránadxu, na' xelexebí'e̱ lau Le̱'.Xúgute̱ cue' benne' chee̱ xúgute̱ cue' xe̱zr la xu xelúe lá'anaqueze̱' Le̱',

²⁸lawe' da xu'u lu na' Xránadxu xel-la' dxenná bea,na' nna bé'ene̱' xúgute̱ benne' xe̱zr la xu ca'.

²⁹Xeláguqueze xúgute̱ benne' zren ca' chee̱ xe̱zr la xu nigá,ne xelúe lá'anaqueze̱' Dios.Xuluzú zribe lau Le̱' xúgute̱ benne' ca' xelate,benne' ca' quebe xelezéquene̱' xelegú'u chawe̱' bénne'du zaj xu'e̱ chee̱ quebe xelatie̱'.

³⁰Zri'ine zre sua benne' ca' xelunbe' zrin chee̱ Xránadxu.Xuluzenne̱' zrí'ine̱' ca' ca naca chee̱ Xránadxu cadxa cheajse̱te̱ chee̱ bénneache.

³¹Xelezrine̱', ne xuluzenne̱' bénneache ca naca da xrlátaje da dxun Dios.Xuluzenne̱' benne' quebe ne xelálaje̱' be̱n Dios da caní.