Read Tabaa Zapotec Salmos 25 Bible Online

Salmos 25 - Tabaa Zapotec bible

Salmos 25

¹Xran, dxennía' Lue' dute̱ lázrdawa'.

²Dxuxrén lazra' Lue', Dios chia'.Quebe gu'u lataj xedué'eda'.Quebe gu'u lataj benne' dxeledábague̱' neda' xuluzétaje̱' neda'.

³Da líqueze, benne' ca' dxelebeza lazre̱' Lue' quebe xeleque zréajene̱'.Xeledué'e benne' ca' dxeledábague̱' xrtizru'.

⁴Xran, ble'e neda' da dxaca lazru' guna'.Ble'e neda' da dxezaca ba lazru' guna'.

⁵Bse̱de neda' guna' ca naca da li chiu' lawe' da nacu' Dios dxuseláu' neda'.Tu dxebeza lázrezqueza' Lue'.

⁶Bsa lazre', Xran, gacu' zri'i lazre',ne xexache lazru' chia' cáte̱ze da dxúntequezu'.

⁷Quebe chajsá lazru' dul-la da be̱na' gate ne naca' benne' cuide', ne ca gudábaga' xrtizru'.Nen dute̱ xel-la' dxexache lazre' chiu', bsa lazre' neda',ne nen dute̱ xel-la' zri'i lazre' chiu', Xran.

⁸Xrlátaje, ne li lazre' naca Xránadxu Dios.Chee̱ le̱ na' gusé̱dene̱' benne' dul-la ca' da dxal-la' xelune̱'.

⁹Gulé'ene̱' benne' dxexruj lazre' ca' da xrlátaje da xelune̱',ne gusé̱dene̱' benne' zren lazre' ca' da xelune̱'.

¹⁰Lu xel-la' dxexache lazre',ne lu da li dxeché̱ Xránadxu benne' ca' dxelune̱'ca naca xel-la' wezría chee̱', ne ca da dxuse̱de Le̱'.

¹¹Lawe' da dxunu' ca da ba gunníu', Xran,gunite lau' ca naca dul-la nuna', da naca na zren.

¹²¿Nu benne' dxezrebe̱' Xránadxu Dios?Le̱' gusé̱dene̱' benne' nigá da dxal-la' gune̱'.

¹³Gaca chee̱' tu da ba neza zrente̱,na' zri'ine zre sue̱' gaca chee̱be' xe̱zr la xu.

¹⁴Xránadxu Dios naque̱' tuze nen benne' ca' dxelezrebe̱' Le̱',na' gune̱' xelúnbe'e̱ xel-la' wezría chee̱'.

¹⁵Tu dxennázqueza' Xránadxu Dioslawe' da guselé̱' neda' lu na' benne' ca' dxelaca lazre̱' xele̱l-le̱' neda'.

¹⁶Gunná' neda', ne bexache lazre' neda'lawe' da zua' tuza', ne dxezaca zi'a.

¹⁷Naxánle̱'e̱ da ste̱be da zaj zua lázrdawa'.Bselá neda' lu da ste̱be zua'.

¹⁸Gunná' ca dxezaca zi'a, ne ca dxunle̱'a zrin,na' bnite lau xúgute̱ dul-la da nabaga'.

¹⁹Gunná' benne' ca' dxeledábague̱' neda' ca naxánle̱'e̱ne̱',ne ca dxelecuídele̱'e̱ne̱' neda'.

²⁰Bxue bénne'du xu'a, ne bselá neda'.Quebe gu'u lataj xedué'eda' lawe' da dxuxrén lazra' Lue'.

²¹Zaj nuxru da xrlátaje, ne xel-la' li lazre' neda'lawe' da dxebeza lazra' Lue'.

²²Dios, bselá benne' Israel ca'lu xúgute̱ da dxelezaca zi'e̱.