Read Tabaa Zapotec Salmos 26 Bible Online

Salmos 26 - Tabaa Zapotec bible

Salmos 26

¹Bchi'a chia', Xran, lawe' da nuna' da xrlátaje.Bxren lazra' Lue', Xrana' Dios, ne quebe be̱n chupa lazra'.

²Gunná' xanne' lázrdawa', Xran, ne bxue ca da nuna'.Gunná' xanne' da xu'u lu xichaj lázrdawa'

³lawe' da dxeque be'eda' dxexache lazru' neda',ne dxuna' ca naca da li chiu'.

⁴Quebe ne guna' tu zren benne' ca' dxelune̱' da xrlátaje cúzreze,ne quebe ne guna' tuze benne' ca' dxululé'e cuine̱' xrlátaje.

⁵Dxecuídeda' da dxelún benne' ca' dxelune̱' da cale̱la naga dxelezrague̱',ne quebe ne chu'a tu zren benne' ca' dxuluzúe̱' Dios chalá'ala.

⁶Dxelé'enu' quebe bi zria nabaga',na' waca biga' lu cugu chiu', Xran,

⁷chee̱ cuezre xa'a, xapa' Lue': “Xcalenu'”,ne chee̱ guzenda' bénneache ca naca da zren ca' da nunu'.

⁸Xran, nazrí'ida' lizru' naga zu',ne lataj lá'azxa naga zua da xabáa chiu'.

⁹Quebe guzría xi'u neda' tu zren nen benne' dul-la ca',ne quebe gutiu' neda' tu zren nen benne' ca' dxelútie̱' benneáche,

¹⁰benne' ca' dxelune̱' da cale̱la,ne tu dxulunézrujzqueze̱' dumí chee̱ xelelé̱' lu da zaj nune̱'.

¹¹Neda' tu gúnzqueza' da naca li lazre'.Bselá neda', ne bexache lazre' neda'.

¹²Tu núnzqueza' da xrlátaje, na' güe lá'anaqueza' Xránadxu Dioslau benne' ca' zaj nazrague̱' chee̱'.