Read Tabaa Zapotec Salmos 34 Bible Online

Salmos 34 - Tabaa Zapotec bible

Salmos 34

¹Tu güe lá'anazqueza' Xránadxu Dios te zra chizrela.Tu gúl-lazqueza' da güe lá'ana na Le̱'.

²Xezaca ba lázrele̱na' Xránadxu Dios.Xelén benne' dxexruj lazre' da caní, na' welebéle̱'e̱ne̱'.

³Le gucá'ana szren Xránadxu Dios tu zren nen neda',na' tu zren gucá'ana szrendxu La lá'azxa chie̱'.

⁴Bláwizra' Xránadxu Dios, na' Le̱' benne̱' chia',ne bselé̱' neda' lu xúgute̱ da buluchebe na neda'.

⁵Benne' ca' gulebeza lazre̱' Le̱' belelé'ene̱' da xabáa chee̱',ne quebe belexedué'ene̱'.

⁶Neda', benne' xache', bláwizra',na' ben Xránadxu Dios chia',ne bselé̱' neda' lu xúgute̱ da dxezaca zi'a.

⁷Gubáz chee̱ Xránadxu zue̱' cuita benne' ca' dxelezrebe̱' Le̱',na' dxucu'uje̱' benne' ca'.

⁸Le guxúe xque, na' lé'ele naca xrlátaje Xránadxu Dios.Ba neza zrente̱ naca na chee̱ bénnea' dxuxrén lazre̱' Le̱'.

⁹Le zrebe Xránadxu Dios, le'e, nácale benne' chee̱ Lé̱queze̱',lawe' da quee bi dxelexazrje benne' ca' dxelezrebe̱' Le̱'.

¹⁰Be̱zre xíxre'du ca' dxelexázrjeba', ne dxeledunba'.Benne' ca' dxelebeza lazre̱' Xránadxu Dios quebe bi da chawe' xelexázrjene̱'.

¹¹Le da, bidau', ne le xen chia'.Gusé̱deda' le'e chee̱ zrébele Xránadxu Dios.

¹²¿Nu benne' ládujla le'e dxaca lazre̱' xegá'ane̱' lu xel-la' nabán,bénnea' dxaca lazre̱' sue̱' zane' iza chee̱ lé'ene̱' da chawe'?

¹³Bxue xanne' ca dxuchálaju' chee̱ quebe nneu' da cale̱la,ne chee̱ quebe guchálaju' da we̱n lazre'.

¹⁴Bsan da cale̱la da dxunu', na' be̱n da xrlátaje.Be̱n ba xuzre gapu' xel-la' dxebeza zri lazre', ne be̱n ca naca chee̱ na.

¹⁵Dxuxúe Xránadxu Dios benne' ca' zaj naque̱' xrlátaje,ne dxuzé̱ nague̱' da dxululáwizre̱' Le̱'.

¹⁶Dxezrá'a Xránadxu Dios benne' ca' dxelune̱' da cale̱la,chee̱ quebe sua nu benne' chajsá lazre̱' benne' we̱n da cale̱la ca'.

¹⁷Benne' xrlátaje ca' dxululáwizre̱' Xránadxu Dios, na' Le̱' dxenne̱' chee̱',ne dxuselé̱' benne' ca' lu xúgute̱ da dxelezaca zi'e̱.

¹⁸Gágute̱ zua Xránadxu Dios naga zaj zra' benne' ca' dxelexewi'ine lazre̱',ne dxuselé̱' benne' ca' dxelexewi'ine lazre̱'.

¹⁹Da zante̱ da dxezaca zi' benne' xrlátaje.Dxuselá Xránadxu Dios bénnea' lu xúgute̱ da ca'.

²⁰Le̱' dxuxúequeze̱' xúgute̱ zrita xu'e̱,na' netú zrita chee̱' quebe gachaj na.

²¹Dul-la da dxun benne' we̱n da cale̱la gute na le̱',na' xelebía xi' benne' ca' dxelecuídene̱' benne' xrlátaje.

²²Xránadxu Dios dxexá'awe̱' bénne'du xu'u benne' we̱n zrin chee̱' ca',na' xúgute̱ benne' ca' dxuluxrén lazre̱' Le̱' québequeze xelebía xi'e̱.