Read Tabaa Zapotec Salmos 35 Bible Online

Salmos 35 - Tabaa Zapotec bible

Salmos 35

¹Xran, bsizre benne' ca' dxelenné̱' chia'.Gudíl-lale̱ benne' ca' dxeledíl-lale̱ne̱' neda'.

²Gudá gucu'uju' neda' lu wedil-la,ne gúcale̱ neda'.

³Gude̱l-la xia chee̱ wedil-la chee̱ guzagu' benne' ca' dxululague̱' neda'.Guzre neda' nacu' Benne' dxuselé̱' neda'.

⁴Be̱n xelexedué'e, ne xeleque zréaje benne' ca' dxelaca lazre̱' xelútie̱' neda'.Be̱n xuluzrunnuj, ne xelexedué'e benne' ca' dxelaca lazre̱' xelune̱' chia' da cale̱la.

⁵Be̱n xelaque̱' ca tu xizre be̱be da dxua be',ne gusel-la gubáz chee̱ xabáa chiu' chee̱ gulague̱' benne' ca'.

⁶Be̱n chul-la neza naga xeledée̱', na' gaca na naga xelebile̱',ne gusel-la gubáz chee̱ xabáa chiu' chee̱ gulague̱' benne' ca'.

⁷Bulucache̱' tu xralaj chee̱ que̱la na neda', ne quegá bi nuna' chee̱'.Gule̱ne̱' tu xe̱dxu naga cheajcházia' neda', ne quegá bi de̱ da dxagu na zria chia'.

⁸Gusel-la da guzría xi na benne' ca', ne quebe xeleque be'ene̱'.Be̱n que̱la xralaj chee̱' na' lé̱queze̱', ne cheajlecházie̱' naga xelebía xi'e̱.

⁹Nadxa béle̱'e̱quezda' ca naca da nun Xránadxu Dios.Sua' lu da ba neza lawe' da bselé̱' neda'.

¹⁰Xúgute̱ zrita xu'a xelenná na: Xran, ¿núzraqueze naca ca nacu' Lue'?Dxuseláu' benne' xache' lu na' benne' wál-ladxa ca le̱',ne benne' dxexazrje lu na' benne' dxebane̱' da du de̱ chee̱'.

¹¹Belasa benne' dxelexeche̱be̱' da we̱n lazre'.Gulawe̱' zria neda' chee̱ tu da quebe dxaca be'eda'.

¹²Belexebi'e̱ neda' da cale̱la chee̱ tu da xrlátaje da be̱na',chee̱ xuluzúe̱' neda' lu da ba xa'.

¹³Neda', gate quebe chawe' gulezúe̱', bewi'ine lazra'.Be̱na' gubasa da bsaca zi na neda',ne du lazra' bláwizra' Dios chee̱ xexune̱' benne' ca'.

¹⁴Bewi'ine lazra' chee̱ benne' ca' ca dxuna' chee̱ le sa' ljwezra', u chee̱ bi bíchequeza'.Guzúa' lu da baxache' ca dxun benne' chee̱ xrne̱'e̱ gate dxatie̱'.

¹⁵Gulebé benne' ca' gate zua' lu da ba xa', ne belezrague̱'.Belezraga benne' dxeledábague̱' neda', benne' we̱n da cale̱la, na' chadite̱ gule̱l-le̱' neda'.Tu belúezqueze̱' neda', ne quebe gulezúa zrie̱'.

¹⁶Bulusaca zi'e̱ neda', ne belún le̱' chia',ne gulagu lazxe̱' lu xel-la' dxelezrá'a chee̱' neda'.

¹⁷Xran, ¿ájate̱ scha' gu'u latja da dxelune̱'?Bselá neda' lu na' benne' caní dxuluzría xi'e̱ neda',benne' zaj naque̱' ca be̱zre xixre' ca'.

¹⁸Xapa' Lue': Xcalenu', láwela benne' zan ca' zaj nadupe̱' chiu' Lue'.Tu güe lá'anazqueza' Lue' ládujla benne' zan ca'.

¹⁹Quebe gu'u lataj xelebé benne' ca' dxeledábague̱' neda', ne quebe bi nuna' chee̱'.Quebe gu'u lataj xelún la benne' ca' chia', benne' dxelecuídene̱' neda',ne quebe bi de̱ da dxagu na zria chia'.

²⁰Benne' caní quebe dxelaca lazre̱' xelezúe̱' lu xel-la' dxebeza zri lazre',na' lu xel-la' dxelezí xe̱ chee̱' dxelenné̱' chee̱ benne' ca' dxelebeza zri lazre̱' lu xe̱zr la xu nigá.

²¹Belún le̱' chia'.Gulenné̱': “¡E! ¡E! ¡Ba blé'entu' da nune̱'!”

²²¡Xran, ba blé'equeznu' da dxelune̱'!¡Quebe sua zriu'!¡Xran, quebe gusanu' neda'!

²³¡Guxasa, guzúa guchi'u chia'!¡Gudá, Xrana' Dios, chee̱ gácale̱nu' neda'!

²⁴¡Bchi'a chia' lu da xrlátaje chiu', Xrana' Dios!¡Quebe gu'u benne' ca' lataj xuluzrizre̱' chia'!

²⁵¡Quebe gu'u lataj xelenné̱': “Ba guca da dxezá lázredxu!”¡Quebe xelenné̱': “Ba bendxu chie̱'!”

²⁶Be̱n xelexedué'e, ne xeleque zréaje xúgute̱ benne' ca' dxelebene̱' gate bi dxaca chia'.Bsi'e̱ xel-la' stu', ne be̱n xelaca xala benne' ca' dxeledábague̱' neda'.

²⁷Be̱n xelúl-la, ne xelebé benne' ca' zaj de̱'e̱ neda',chee̱ xelennáqueze̱': “Tu xegá'ana szrénzqueze Xránadxu,Bénnea' dxezá lazre̱' sua lu xel-la' dxebeza zri lazre' benne' we̱n zrin chee̱'!”

²⁸Tu guchálajzqueza' chee̱ da xrlátaje chiu',ne chee̱ da dxue lá'anaqueze na Lue' te zra chizrela.