Read Tabaa Zapotec Salmos 37 Bible Online

Salmos 37 - Tabaa Zapotec bible

Salmos 37

¹Quebe su' ste̱be ne̱ chee̱ da dxelún benne' ca' dxelune̱' da cale̱la,ne quebe se̱ lazru' da zaj nápale̱'e̱ benne' dxelune̱' da zrinnaj,

²lawe' da xeledé chee̱ benne' ca' ca dxaca chee̱ xíxre'du ca',na' gaca chee̱ benne' ca' ca dxaca chee̱ xixre' da nadxugu, dxebizre na.

³Bxren lazre' Xránadxu Dios, ne be̱n da xrlátaje,na' súaquezu' lu xe̱zr la xu, ne sí'quezu' ba neza da li.

⁴Bezaca ba lazre' nen Xránadxu,na' Le̱' gúnnaqueze̱' chiu' da dxezá lazru'.

⁵Bzua cuinu' lu na' Xránadxu,ne bxren lazre' Le̱', na' Le̱' gune̱' ca da dxenabu'.

⁶Gulé'ene̱' da xrlátaje chiu' ca tu xel-la' naxaní',ne da li lazre' chiu' ca lawe' zra.

⁷Guzúa zrize lau Xránadxu, ne guleza lazre Le̱'.Quebe su' ste̱be ne̱ chee̱ benne' dxezi'e̱ ba neza, bénnea' dxúnqueze̱' da cale̱la.

⁸Bsan xel-la' xichaj zra'a, ne quebe cuídenu'.Quebe sa lazru' bi xusacu' benne' ca' dxelune̱' da cale̱la,

⁹lawe' da guzría xi' Dios benne' ca' dxelune̱' da cale̱la.Benne' ca' dxelebeza lazre̱' Xránadxu, gaca chee̱' xe̱zr la xu.

¹⁰Chadite te chee̱ benne' ca' dxelune̱' da cale̱la.Le'enu' lizre lataj benne' ca', san québedxa zaj zre̱'e̱ na'.

¹¹Benne' dxexruj lazre' ca' gaca chee̱' xe̱zr la xu,na' xelexezaca ba lazre̱' lu xel-la' dxebeza zri lazre' zrente̱.

¹²Benne' dxelún da cale̱la dxelilaj lazre̱' bi xelune̱' chee̱ benne' xrlátaje,ne lu xel-la' dxelezrá'a chee̱' xelagu lazxa benne' ca'.

¹³Xránadxu Dios guzrízrequeze̱' chee̱ benne' ca' dxelune̱' da cale̱lalawe' da nézene̱' ba za zra cheajsé̱ chee̱ benne' ca'.

¹⁴Benne' dxelune̱' da zrinnaj dxelebéaje̱' xia chee̱',ne dxuluzé̱' xaga nalá xéche'ze chee̱',chee̱ xuluzría xi'e̱ benne' xache' ca', ne benne' dxelexazrje̱',chee̱ xelútie̱' benne' ca' dxelune̱' da li lazre'.

¹⁵Xia nalá chee̱ benne' ca' chaze na lu lazrdáuqueze̱',na' gáchajqueze xaga nalá xéche'ze chee̱'.

¹⁶Cháwedxa naca da du da de̱ chee̱ benne' xrlátajeca da gunní'a da zaj napa zánete̱ benne' dul-la ca',

¹⁷lawe' da welátequeze ni'a na' benne' dxelúne̱' da zrinnaj.Xránadxu ná'queze dxuxúe̱' benne' xrlátaje ca'.

¹⁸Nunbea Xránadxu ca zaj naca zra xelezúa benne' du lazre' ca',na' da zaj napa benne' ca' xelezúa na chadía chacanna.

¹⁹Quebe xelexedué'ene̱' gate quebe dxaca chawe' chee̱ bénneache,na' lu zra chee̱ gubina' gata' da xelawe̱'.

²⁰Xelebía xi' benne' dxelúne̱' da zrinnaj,na' benne' ca' dxeledábaga' Xránadxu, ca dxaca chee̱ xiaj xixre' ca'.Xeledé chee̱', ne xelexenitie̱' ca zren chee̱ xi'.

²¹Benne' ca' dxelún da cale̱la tu da dxelenabe̱' tu chí'idauze, ne quebe dxuluxunézruje̱' na,na' benne' xrlátaje dxexache lazre̱' le̱', ne dxunézruje̱' chee̱'.

²²Benne' ca' dxelé'e Xránadxu le̱' chawe', gaca chee̱ benne' ca' xe̱zr la xu,na' benne' ca' quebe dxelé'ene̱' chawe', xelebía xí'queze̱'.

²³Da dxelún benne' xrlátaje ca' zaj naca na da ble'eXránadxu le̱', na' dxelé'ene̱' cháwedau' ca da dxelune̱'.

²⁴Gate dxeleajchaze benne' xrlátaje ca' quebe cheajlechaze̱'tu chi'ize lawe' da nuxru Xránadxu na' benne' ca'.

²⁵Benne' cuide' guca', ne na'a ba gúxrua',ne cabata' ble'eda' tu benne' xrlátaje gusán Dios le̱',na' quebe xeledá zri'ine zre sue̱' xelebéaje̱' guna'.

²⁶Benne' xrlátaje nigá tu dxexache lázrezqueze̱', ne dxunézruje̱' bi dxexazrje nu benne',na' zri'ine zre sue̱' zaj naque̱' da ba neza chee̱ bénneache.

²⁷Québedxa gunu' da cale̱la, san be̱n da xrlátaje,na' gaca bánquezu' chadía chacanna,

²⁸lawe' da nazrí'i Xránadxu da naca li lazre',ne quebe dxusane̱' benne' zaj de̱'e̱ Le̱'.Chadía chacanna tu guxúezqueze̱' benne' ca',san guzría xi'e̱ xrtia ljwezre benne' ca' dxelune̱' da cale̱la.

²⁹Benne' xrlátaje ca' gaca chee̱' xe̱zr la xu nigá,na' xelezrá'queze̱' chadía chacanna lu xe̱zr la xu.

³⁰Benne' xrlátaje dxuchálajqueze̱' da naca sina,na' ca dxuchi'e̱ naca na xrlátaje.

³¹Da nadxixruj bea Dios tu xú'uzqueze na xichaj lázrdawe̱'.Chee̱ le̱ na' quebe cheajchaze bénnea'.

³²Benne' we̱n da zrinnaj dxenné̱'e̱ benne' xrlátaje,ne dxune̱' ba xuzre gutie̱' le̱'.

³³Quebe gusán Xránadxu le̱' lu na' benne' we̱n da cale̱la na',ne quebe guzría xi'e̱ le̱' gate dxuchi'e̱ chee̱'.

³⁴Guleza lazre' Xránadxu, ne be̱n ca da ba gunné̱',na' Le̱' chísaqueze̱' Lue' chee̱ gaca chiu' xe̱zr la xu nigá.Gate xelebía xi' benne' dul-la ca', na' lé'enu' na.

³⁵Ble'eda' tu benne' we̱n da zrinnaj, nagá'ane̱' szrente̱,na' guxánle̱'e̱ da de̱ chee̱' ca dxegula tu xaga zrente̱.

³⁶Na' gudé chee̱', na' québedxa zue̱' na'a.Bexílaja' le̱', san quebe nu bezrelda'.

³⁷Blaba lazre' ca naca chee̱ benne' li lazre', ne gunná' benne' xrlátajelawe' da naga cheajsé̱ gaca tu da ba neza chee̱ benne' dxebeze̱' zri lazre'.

³⁸Benne' dxelune̱' da cale̱la xelebía xí'queze̱'.Quebe nu cha' xrtia ljwezre benne' dxelune̱' da zrinnaj.

³⁹Xránadxu Dios guseláquezé̱' benne' xrlátaje ca',na' Le̱' gutipe̱' lazre' benne' ca' lu zra chee̱ da ste̱be.

⁴⁰Xránadxu Dios gácale̱ne̱' le̱', ne guselé̱' le̱'.Guselé̱' le̱' lu na' benne' ca' dxelune̱' da cale̱la,na' gune̱' gaca chawe' chee̱' lawe' da buluxrén lazre̱' Le̱'.