Read Tabaa Zapotec Salmos 38 Bible Online

Salmos 38 - Tabaa Zapotec bible

Salmos 38

¹Xrana' Dios, quebe til-lu' neda' lu xel-la' dxezrá'a chiu'.Quebe gudéu' neda' da ba xa' lu xel-la' snia chiu',

²lawe' da belúe xaga nalá xéche'ze chiu' neda',na' be̱ na'u neda'.

³Quebe bi chawe' zua be̱la' dxen chia' lawe' da dxezra'u neda',ne quebe zaj zua zrita xu'a cháwedau' lawe' da nuna' dul-la.

⁴Ca naca da zrinnaj da nuna' ba zria cháqueze na xíchaja'.Zaj naca na chia' ca tu xua' zí'ile̱'e̱.

⁵We̱' da zaj zria be̱l-la' dxen chia' ba dxelelá na, ne ba dxeluzru na,da na' dxaca chia' lawe' da be̱na' da cale̱la.

⁶Nucache lawa', ne dxexedué'ele̱'e̱da',ne dxebezre xacha' te zra chizrela,

⁷lawe' da ca naca be̱l-la' dxen chia' dxelá na,ne quebe bi chawe' zua be̱la' dxen chia'.

⁸Nate ni'a na'a, ne dxéqueda' ba naxúzrujne zrita xu'a.Dxebezre lazra' lawe' da zua ste̱be lázrdawa'.

⁹Xran, ca naca da dxezá lazra' zaj zua na nen Lue',na' da dxebezre lazra' dxelé'equeznu' Lue'.

¹⁰Dxate̱ lázrdawa', ne ba bedú lazra',ne québedxa dxelé'eda' cháwedau'.

¹¹Dxelexebiga ljwezra', ne le sa' ljwezra' ca' zítu'la ne̱ chee̱ xízrawe̱' chia',na' benne' walízr chia' ba belexecuase̱' zítu'la.

¹²Benne' ca' dxelaca lazre̱' xelútie̱' neda' dxuluzale̱' xralaj,na' benne' ca' dxelúe lazre̱' bi gaca chia' dxelenné̱' chia'wabía xi'a, ne tu zaj zúaze̱' bi xulusaque̱' neda'.

¹³Neda' quebe dxenda' ca dxaca chee̱ tu benne' cuezru,ne naca' ca tu benne' quebe dxaca nne̱', benne' quebe dxexrá dxu'e̱.

¹⁴Naca' ca tu benne' quebe dxenne̱',bénnea' quebe dxexeche̱be̱',

¹⁵lawe' da dxebeza lazra' Lue', Xrana' Dios.Lue' xeche̱bu' waláz chia', Xrana' Dios.

¹⁶Gunnia': Quebe gu'u lataj xelebene̱' ne̱ chee̱ da dxaca chia'.Gate dxeajchazia', quebe gu'u le̱' lataj xulucá'ana szren cuine̱' lawe' da zua' lu da baxache'.

¹⁷Ba zua' cheajcházia',ne tu dxelázqueze dute̱ be̱l-la' dxen chia'.

¹⁸Chee̱ le̱ na' xrúale̱pequeza' da cale̱la da be̱na',ne xewine lazra' ca naca dul-la da nabaga'.

¹⁹Benne' ca' dxeledábague̱' neda' zaj zúaqueze̱' chawe', ne zaj naque̱' benne' wal-la.Zaj naxánle̱'e̱ benne' ca' dxelecuídene̱' neda',ne quebe bi de̱ da dxagu na zria chia' lau le̱'.

²⁰Benne' ca' dxelune̱' da cale̱la chee̱ benne' ca' dxelune̱' da xrlátajezaj naque̱' benne' dxeledábague̱' neda' lawe' da tu dxúnzqueza' da xrlátaje.

²¹Quebe gusanu' neda', Xrana' Dios.Dios chia', quebe su' zitu' naga zua'.

²²Be̱n ba xuzre gácale̱nu' neda', Xran.Nacu' Benne' dxuselé̱' neda'.