Read Tabaa Zapotec Salmos 44 Bible Online

Salmos 44 - Tabaa Zapotec bible

Salmos 44

¹Dios, bache bénentu' lawe' da buluzén Xra xrtáuntu' netu'ca naca da be̱nu' lu zra chee̱', da naca na iza ba guledé na.

²Bzria xi'u bénneache xe̱zr la xu xezícadxa ca' lau xra xrtauntu' ca', na' bzu' le̱' xlataj benne' ca'.Bsaca zi'u benne' xe̱zr la xu ca', san bzua chachu' bénneache chiu' lu xe̱zr la xu nigá.

³Xra xrtáuntu' ca' quebe gulezi'e̱ xe̱zr la xu nigá nen xia nalá cheé̱queze̱',Ne quebe buluselá cuine̱' nen xel-la' wal-la da zaj nape̱'.Lue' bseláuquezu' le̱' nen xel-la' waca chiu', ne nen xel-la' wal-la chiu',ne nen xel-la' naxaní' chiu', lawe' da bezaca ba lazru' nen le̱'.

⁴Dios, nacu' wenná bea chia'.Bselá zri'ine zre sua Jacob.

⁵Nen xel-la' waca chiu' xebéajntu' benne' ca' dxeledábague̱' netu'.Lu Lau' Lue' guchuchuj guléajntu' benne' ca' dxeledábague̱' netu'.

⁶Quebe guxrén lazra' xaga nalá xéche'ze chia',ne quebe guselá xia chia' neda'.

⁷Lue' bcu'uju' netu' lau benne' ca' dxeledábague̱' netu',ne be̱nu' belexedué'e benne' ca' belecuídene̱' netu'.

⁸Ne̱ chee̱ Dios tu súazquezentu' lu da ba neza,na' chadía chacanna güe lá'anantu' Lau' Lue'.

⁹Nusán lazru' netu', ne nunu' dxexedué'entu',ne quebe dxéajle̱nu' benne' chee̱ntu' ca' dxjaque̱' wedil-la.

¹⁰Be̱nu' buzrúnnujntu' lau benne' ca' dxeledábague̱' netu',na' benne' ca' dxelecuídene̱' netu' gulegüe̱' ca naca da nápantu'.

¹¹Bdeu' netu' ca zrila' ca' lu na' benne' xelútie̱' netu',ne ba be̱se dínnaju' netu' ládujla benne' xe̱zr la xu ca'.

¹²Bdéu' netu', benne' chiu' ca' cá'aze, ne quebe bi guzi'u.

¹³Dxunu' dxelún la benne' walízre chee̱ntu'.Benne' zaj naxéchaje̱' netu' dxelún le̱', ne dxuluzrizre̱' chee̱ntu'.

¹⁴Nuzú' netu' ca tu da dxelenná benne' xe̱zr la xu ca' naca na da baxáchele̱'e̱.Xúgute̱ benne' dxelelé'ene̱' netu' dxulutá xíchaje̱',ne dxelexebánene̱' ca da baxache' nácantu'.

¹⁵Tu zra tu zra tu dxexedué'ezquezda',ne tu zúazqueza' lu da sté̱bele̱'e̱

¹⁶lawe' da dxelenné̱' schanni' chia', ne dxuluzúe̱' neda' chalá'ala,ne dxulutíl-lale̱ neda' benne' ca' dxeledábague̱' neda',nen benne' ca' dxelexebeaj lazre̱' neda'.

¹⁷Xúgute̱ da caní dxaca chee̱ntu', ne quebe ne gal-la lazrentu' Lue',ne quebe ne guzúantu' chalá'ala xel-la' wezría chiu'.

¹⁸Quebe ne gusán lázrentu' Lue',ne quebe ne xecuásantu' lu da gunná be'enu' netu'.

¹⁹¿Bizr chee̱ na' nuzú' netu' chalá'ala tu lataj chee̱ be̱ snia ca',ne nuzú' netu' naga xelaze gátentu'?

²⁰La gul-la lázrentu' La Dios chee̱dxu,ne bca'ana szrentu' tu dios da quebe bi zaca,

²¹¿quebe dxal-la' zra'a Dios netu' ne̱ chee̱ da nigá?Le̱' nézquezne̱' da zaj zua lu xichaj lázxdau bénneache.

²²Lawe' da nácantu' chiu', tu zra tu zra ba zaj zúatequeze̱' xelútie̱' netu'.Zaj nune̱' netu' ca zrila' ca' ba zua xelútie̱'-ba'.

²³¡Bebán, Xran!¿Bizr chee̱ na' dxasiu'?¡Bebán!¡Quebe su' zitu' tu chi'ize!

²⁴¿Bizr chee̱ na' nucache cuinu',ne quebe dxeque be'enu' ca dxezaca zí'intu',ne ca dxuluchine benne' ca' netu'?

²⁵Ba nate ni'a na' bénne'du xú'untu', ne dxeajcházete̱ntu' lu xu,na' ba dé̱te̱ntu' sudxú'ala lu xe̱zr la xu.

²⁶¡Guxasa, gúcale̱ netu',ne dute̱ xel-la' dxexache lazre' chiu', bselá netu'!