Read Tabaa Zapotec Salmos 51 Bible Online

Salmos 51 - Tabaa Zapotec bible

Salmos 51

¹Gúcale̱ neda', Dios, lu dute̱ xel-la' dxexache lazre' chiu'.Dute̱ xel-la' dxexache lazre' chiu' bsula zria da nabaga'.

²Gudibe neda' ca naca da cale̱la da nuna',ne bca'ana chawe' neda' chee̱ dul-la da be̱na',

³lawe' da dxexúnbe'a ca be̱na' gudábaga' Lue',ne ca naca dul-la chia' tu dxáguze na zria neda'.

⁴Lau' Lue' be̱na' dul-la.Awe', lau' Lué'queze, ne ba be̱na' da cale̱la lau' Lue'.Caní dxaca na chia' chee̱ gaca bea nacu' xrlátaje lu da dxenníu',ne nacu' du lazre' ca da dxuchi'u chee̱ bénneache.

⁵Gunná' xque, báchequeze nabaga' dul-la gate gúlajtea',ne lu dul-la zúaqueza' gate guzrán xrna'a neda'.

⁶Lue' dxezá lazru' sua da li lu xichaj lázrdawa',ne lu xichaj lázrdawa' ba bzéajni'inu' neda' da naca sina.

⁷Bca'ana chawe' neda' nen da na' dxuchínenu', na' xegá'ana' xrlátaje.Gudibe neda', na' gaca' chíchedxa ca tu bezxe'.

⁸Be̱n xenda' xel-la' dxebé, ne da ba neza,na' xelexezí' le dipa zrita xu'a, da ba gudíchaju'.

⁹Quebe gusá lazru' ca naca dul-la da be̱na',na' bsula xúgute̱ da cale̱la da nuna'.

¹⁰Dios, bzua neda' tu lázrdawa' xrlátaje,ne bzua tu be' li lazre' lu xichaj lázrdawa'.

¹¹Quebe gucuasu' neda' lau' Lue',ne quebe xeca'u lu xichaj lázrdawa' be' lá'azxa chiu'.

¹²Bexunna neda' xel-la' dxebé chee̱ xel-la' weselá chiu',ne bzua chuchu be' chawe' da xu'a.

¹³Nadxa gusé̱deda' benne' ca' dxelune̱' da zrinnaj ca dxaca lazru' xelune̱',na' benne' dul-la ca' xelexexaque̱' chiu' Lue'.

¹⁴Bselá neda' lu zria da nabaga', be̱tia' benne'.Lue' Dios, nacu' Dios dxuseláu' neda',na' gúl-laqueza' chee̱ da xrlátaje nacu' Lue'.

¹⁵Xran, gusalaj dxu'a,na' guzenda' bénneache da dxue lá'ana' Lue'.

¹⁶Quebe dxaca lazru' béadu ca' gutia'-ba' lau',ne quebe dxaca lazru' béadu ca' guzézxea' lau'.

¹⁷Da guzúadxu lau Dios da dxaca lazre̱' naca na tu lázxdau dxexruj lazre'.Tu lázxdau dxexruj lazre', ne da dxexíaje lazre' quebe guzú' chalá'ala, Dios.

¹⁸Dute̱ xel-la' zri'i lazre' chiu', be̱n gaca chawe' chee̱ xe̱zre Sión.Bsegula ze'e da nazechaj na xe̱zre Jerusalén.

¹⁹Nadxa xezaca ba lazru' nen béadu ca' gútentu' lau' dute̱ da naca xrlátaje chee̱ntu',ne béadu ca', ne da du ca' guzézxentu' lau'.Nadxa xelútie̱' béadu ca' lu cugu chiu'.