Read Tabaa Zapotec Salmos 58 Bible Online

Salmos 58 - Tabaa Zapotec bible

Salmos 58

¹Le'e dxenná beale ¿da li dxuchálajle da naca xrlátaje?¿Dxuchí'ale ca naca da li chee̱ bénneache chia'?

²¡Cabíze̱'!¡Lu lázrdaule dxugú'u beale da zrinnaj!¡Sté̱bele̱'e̱ dxuzúale bénneache lu xe̱zr la xu chia'!

³Zaj nazrinnaj lázxdau benne' ca' zaj nabéaj xíchaje̱' neda' gate gulálajte̱'.Belexase dínnaje̱' dxelún lazre̱' gate gulezante̱ xrne̱'e̱ le̱'.

⁴Dizra' da dxelenné̱' zaj naca na da dxelute bénneache ca da zria zran lazxa be̱la'.Zaj naca na ca be̱la' snia, be̱ nácaba' be̱ cuezru.

⁵Quebe dxenba' chi'i benne' dxunné̱' le̱ba'lácala dxenné̱le̱'e̱ xrtandau'.

⁶Dios, gudichaj lazxa benne' ca'.Gudichaj, Xran, lazxa benne' ca' zaj naque̱' ca be̱zre xixre' ca'.

⁷Be̱n xelexenítie̱' ca nisa da dxelalaj na lu xu.Gate dxulusane̱' xaga nalá xéche'ze chee̱', be̱n xeledé na chalá'ala.

⁸Be̱n xeledé chee̱' ca dxaca chee̱ be̱ zaga dxelexexúnaba'.Be̱n québedxa xelelé'ene̱' gubizra ca tu bidau' dxálajbe' ba nátebe'.

⁹Nédxula gate quebe ne la xesu' lu xi'xecá'a Dios benne' ca' tu lu be' bdunu',benne' zaj naca bane̱', ne benne' ca' zaj zua xelatie̱'.

¹⁰Wabé benne' xrlátaje gate lé'ene̱' xebéaj lazre' Dios benne' ca' dxelune̱' da cale̱la.Guchuchu guléaje̱' dxen chee̱ benne' zaj nabéaj xíchaje̱' Dios.

¹¹Nadxa nne̱ bénnea': “Da líqueze de̱ lazruj chee̱ benne' xrlátaje.Da líqueze zua Dios, Bénnea' dxuchi'e̱ chee̱ bénneache zaj zre̱'e̱ lu xe̱zr la xu.”