Read Tabaa Zapotec Salmos 59 Bible Online

Salmos 59 - Tabaa Zapotec bible

Salmos 59

¹Bselá neda' lu na' benne' ca' dxeledábague̱' neda', Dios chia'.Bselá neda' lu na' benne' ca' dxelune̱' chia' da cale̱la.

²Bselá neda' lu na' benne' ca' dxelune̱' da zrinnaj.Bselá neda' lu na' benne' ca' dxelutie̱' benne',

³lawe' da dxelilaj lazre̱' xelútie̱' neda'.Zaj nazraga benne' wal-la ca' chee̱ xeledíl-lale̱ne̱' neda',quegá lawe' da bi zria nabaga', ne quegá ne̱ chee̱ dul-la nuna' neda', Xran.

⁴Lácala quebe bi be̱na' chee̱ benne' ca',zá'aca chégüe̱', ne dxulucueze̱' bi xelune̱' chia'.Bebán chee̱ xidu' naga zua', na' le'enu' da dxelune̱'.

⁵Lue', Xran, Dios chee̱ benne' zan dxjaque̱' wedil-la, ne Dios chee̱ benne' Israel ca',bebán chee̱ gudéu' ba xa' benne' xúgute̱ cue' xe̱zr la xu.Quebe xexache lazru' xúgute̱ benne' ca' dxeledábague̱' Lue', ne dxelune̱' da zrinnaj.

⁶Xelelé̱'e̱ gate cuía gubizra, ne xelebezre xe̱'e̱ca dxelún becu', na' xeléchaje̱' xe̱zre.

⁷Gunná' xque, da dxuluchálaje̱' naca na ca da dxelexexe̱be̱'.Dizra' dxelenné̱' zaj naca na ca xia zaj nalá na, lawe' da dxelenné̱': “¿Nuzra xene?”

⁸Lue', Xran, guzrizru' chee̱ benne' ca'.Gun lau' chee̱ benne' xúgute̱ cue' xe̱zr la xu ca'.

⁹Zaj naca wal-la benne' ca' dxeledábague̱' neda'.Cueza lazra' Lue' lawe' da dxucu'uju' neda', Dios.

¹⁰Dios, Bénnea' dxexache lazre̱' neda', cuía lawe̱' lawa' neda'.Dios gune̱' le'eda' gaca chee̱ benne' ca' dxeledábague̱' neda' ca da dxezá lazra'.

¹¹Quebe gutiu' benne' ca', chee̱ quebe xelal-la lazre' bénneache chia' ca da gunu'.Be̱se dinnaj benne' ca' nen xel-la' waca chiu'.Lue', Xran, Benne' dxucu'uj netu', ben cheajlecházie̱'.

¹²Be̱n xeledule̱' lu xel-la' dxulucá'ana szren cuine̱',ne̱ chee̱ dul-la dxelune̱' lu da dxuluchálaje̱',ne ne̱ chee̱ dizra' schanni', ne da we̱n lazre' da dxelenné̱'.

¹³Bzria xi'e̱ lu xel-la' dxezrá'a chiu'.Bzria xi'e̱ chee̱ québedxa xelezúe̱'.Dios, be̱n xeleque be'ene̱' dxenná be'enu' zri'ine zre sua Jacob.Dxenná be'u du ca naca xe̱zr la xu.

¹⁴Dxelelé̱'e̱ gate dxebía gubizra, ne dxelebezre xe̱'e̱ ca dxelún becu', ne dxeléchaje̱' xe̱zre.

¹⁵Dxeledé̱' ca benne' dxeledaze̱', dxelílaje̱' da xelawe̱',na' che quebe dxeléljane̱', na' du xe̱la dxelawe̱' zria tue̱' xetúe̱'.

¹⁶Neda' gúl-laqueza' chee̱ xel-la' waca chiu',na' che zílala güe lá'ana' xel-la' dxexache lazre' chiu', lawe' da gúcale̱nu' Lué'queze neda',ne bcu'uju' neda' gate guzúa' lu da sté̱bele̱'e̱.

¹⁷Lue' dxutipu' lazra', na' gúl-laqueza' chiu',lawe' da nacu' Lue', Dios, Bénnea' dxucu'uje̱' neda', ne Dios, dxexache lazru' neda'.