Read Tabaa Zapotec Salmos 60 Bible Online

Salmos 60 - Tabaa Zapotec bible

Salmos 60

¹Dios, Lue' ba bzu' netu' chalá'ala, ne be̱nu' xeajcházentu'.Bzrá'ale̱'e̱nu' netu'.Na'a bedá gácale̱nu' netu'.

²Be̱nu' guzrú' xe̱zr la xu, ne be̱nu' bxalaj na.Bexún na naga bxalaj na lawe' da dxebía xi na.

³Be̱nu' blé'entu' netu', benne' chiu', da naca sté̱bele̱'e̱.Be̱nu' guca chee̱ntu' ca güé'entu' tu da be̱n na xeajcházentu'.

⁴Bnézruju' tu da dxulé'e lau chee̱ benne' dxelezrebe̱' Lue',Da xeluxre̱' chee̱ gulé'e lau da naca li.

⁵Chee̱ xelelá benne' ca' nazrí'iqueznu' Lue',bsel-la le̱' dute̱ xel-la' waca chiu', ne bene chia'.

⁶Dios gunné̱' lu lataj lá'azxa chee̱': “Wabéquezda' neda'.Gunna' late weaj chee̱le xe̱zr la xu chee̱ benne' Siquem,ne gudxixra' chee̱le xe̱zr la xu de̱ cuita xe̱gu Sucot.

⁷Chia' naca xe̱zr la xu Galaad, ne chia' naca xe̱zr la xu chee̱ zri'ine zre sua Manasés.Xe̱zr la xu chee̱ zri'ine zre sua Efraín naca na ca tu da napa chi'i na xíchaja'.Xe̱zr la xu chee̱ zri'ine zre sua Judá naca na naga dxenná be'a.

⁸Xe̱zr la xu chee̱ benne' Moab naca na ca tu zriga' da xuzru nisa guná'a,na' xe̱zr la xu chee̱ benne' Edom guchichan' nen zrela'.Si'a ba neza xe̱zr la xu chee̱ benne' Filistea.”

⁹¿Nuzra che̱' neda' chee̱ guzétaja' xe̱zre da naxechaj na ze'e sibe?¿Nuzra che̱' neda' chee̱ guzétaja' benne' Edom ca'?

¹⁰¿Quegá Lue' na' che̱'u neda', Dios, nacu' Bénnea' bzue' netu' chalá'ala,ne quebe guxeájle̱nu' benne' chee̱ntu' ca', benne' dxjaque' wedil-la?

¹¹Gúcale̱ netu' chee̱ séquentu' tíl-lale̱ntu' benne' ca' dxeledíl-lale̱ne̱' netu',lawe' da naca dácheze xelácale̱ bénneache netu'.

¹²Tu zren nen Dios gundxu tu da zrente̱,na' Le̱' gulague̱' benne' ca' dxeledíl-lale̱ne̱' dxi'u.