Read Tabaa Zapotec Salmos 68 Bible Online

Salmos 68 - Tabaa Zapotec bible

Salmos 68

¹Guzé̱, Dios, ne be̱se dinnaj benne' ca' dxeledábague̱' Lue',ne be̱n xuluzrunnuj benne' ca' dxelecuídene̱' Lue'.

²Ca dxun tu be', dxulaga na zren chee̱ xi', ca' gulagu' benne' ca'.Ca dxuna xina' lu xi', ca' xelexenite benne' ca' lau Dios, benne' ca' dxelune̱' da zrinnaj.

³Xelebé benne' xrlátaje ca', ne xelezúe̱' lu da ba neza lau Dios,ne xelexrítequeze̱' lu xel-la' dxelebé chee̱'.

⁴¡Le gul-la chee̱ Dios!¡Le gul-la da du ca' chee̱ Láqueze̱'!¡Le gucá'ana szren Bénnea' dxe'e̱ xabáa, nazí le̱' Jah!¡Le be lau Le̱'!

⁵Ca xra bi dxé'enedu ca', ne ca benne' dxuxúe nu'ula ca' zaj zue̱' tuze,naca Dios lu lataj lá'azxa naga zúaqueze̱'.

⁶Dxun Dios xelezúa xrtia ljwezre bénneache quebe nu xrtia ljwezre̱' zaj zra'.Dxebéaje̱' benne' zaj xu'e̱ lu na' benne' zitu' ca' chee̱ xelezúe̱' lu da ba neza.Benne' ca' dxeledábaga Dios zaj zue̱' tu lu xe̱zr la xu bizre.

⁷Dios, gate bdxúaju' lau bénneache chiu',ne gudáu' lu xe̱zr la xu bizre na',

⁸na' guzrú' xe̱zr la xu na'. Cá'anqueze gúcale̱'e̱ xiuj lau Dios.Xi'a Sinaí guzrize na lau Dios,Dios chee̱ benne' Israel ca'.

⁹Gusel-lu' tu nisa xiuj zílale̱'e̱, Dios.Gate belexedú lazre' bénneache chiu', Lue' btipu' lazre̱'.

¹⁰Bénneache zaj naca chiu' zaj zúaqueze̱' lu xe̱zr la xu chiu'.Dute̱ da chawe' chiu', Dios, dxuxú' benne' xache' ca'.

¹¹Xránadxu Dios gusel-le̱' tu dizra' chawe',na' gulezrá' benne' zante̱, benne' buluzenne̱' bénneache ca naca dizra' chawe' na'.

¹²¡Buluzrúnnuje̱'!¡Buluzrunnuj wenná bea ca' nen ca naca benne' chee̱' dxjaque̱' wedil-la,na' benne' ca' zaj nagá'ana lu xu'u lizre̱' belexequé̱'e̱ da bulucá'ana benne' ca' buluzrúnnuje̱'.

¹³Lácala bcache cuínale naga dxuxúele zrila' ca',gacu zra lánale da naca na ca xrila bgúgudu ca' da zaj nazí lechítaje̱ na plata,na' dube' chee̱ xrílaba' ca' zaj nazí lechítaje̱ na oro.

¹⁴Gate be̱se dinnaj Dios zrente̱ wenná bea ca' lataj na',na' bexruj bezxe' da bgacu na xi'a Salmón.

¹⁵Tu xi'a zrente̱ naca xi'a Basán.Tu xi'a zri'a naca xi'a Basán na'.

¹⁶¿Bizr chee̱ na' dxenna'le, le'e, xi'a zri'a ca',xi'a na' naga dxaca lazre' Dios súaqueze̱'?Da líqueze súaqueze Xránadxu lu xi'a na' chadía chacanna.

¹⁷Da zaj naché̱' benne' ca' lu wedil-la da napa Dios zánete̱ cue' gaxúa zaj naca na.Xránadxu Dios zezé̱'e̱ xi'a Sinaí chee̱ sue̱' lataj lá'azxa chee̱'.

¹⁸Begüénu' xabáa, zeche̱'u benne' ca' bebéaju' lu na' xel-la' gute,na' guzi'u da chawe' ca' da belunna bénneache,ne cá'anqueze guzúa da be̱nnu' chee̱ benne' ca' guledábague̱' Lue',chee̱ súaquezu' ládujla bénneache, Dios, leu' Jah.

¹⁹¡Gaca ba Xránadxu!¡Tu zra tu zra dxusezrate̱' dxi'u da chawe' chee̱'!¡Naque̱' Dios, dxuselé̱' dxi'u!

²⁰Dios, Bénnea' naque̱' Dios chee̱dxu guselé̱' dxi'u.Lé̱queze Xránadxu Dios guselé̱' dxi'u lu na' xel-la' gute.

²¹Da líqueze Dios gune̱' we̱' xichaj benne' ca' dxeledábague̱' Le̱'.Gune̱' we̱' xichaj benne' quebe dxulusane̱' ca zaj naca dul-la da dxelune̱'.

²²Gunná Xránadxu: “Guna' xezrinle lázrele, xeza'ale lu xi'a Basán.Guna' xeza'ale lu da situj chee̱ nísadau', xezrinle lázrele,

²³lawe' da guna' guchuchu guléajle dxen chee̱ benne' ca' dxeledábague̱' le'e,na' xelelé̱'e̱ becu' chee̱le dxen chee̱ benne' ca'.”

²⁴Belelé'e bénneache ca guledá bénneache chiu' belúe lá'ane̱' Lue', Dios.Dute̱ xel-la' dxelebé gulu'e̱ lataj lá'azxa chiu', Dios, Wenná Bea chia'.

²⁵Benne' ca' dxelul-la zeajzrie̱' láwe'la,na' benne' zaj nu'e̱ da dxulucuezre̱' zja'aque̱' bzé̱bela.Ládujla zjaca nu'ula cuíde'du ca' zaj núxrube' da du ca' dxulusézxebe'.

²⁶Le güe lá'ana Dios naga zaj nazraga bénneache chee̱'.Le güe lá'ana Xránadxu, le'e nácale zri'ine zre sua Israel.

²⁷Zaj zra' zri'ine zre sua Benjamín na', guque̱' benne' cuídedxa, na' dxelenná be'e̱.Zaj nazraga benne' xíchaje̱ chee̱ zri'ine zre sua Judá na',ne benne' xíchaje̱ chee̱ zri'ine zre sua Zabulón,ne benne' xíchaje̱ chee̱ zri'ine zre sua Neftalí.

²⁸Dios, ble'e lau xel-la' wal-la chiu'.Bzua chacha, Dios, da na' be̱nu' chee̱ntu'.

²⁹Ne̱ chee̱ xel-la' szren chee̱ xudau' chiu' da zua na xe̱zre Jerusalén,xelegú'u benne' wenná bea ca' da xelunne̱' lau'.

³⁰Gudil-la benne' dxjaque̱' wedil-la chee̱ dute̱ xe̱zr la xu zaj nazrague̱' chee̱ xeledíl-lale̱ne̱' Lue',benne' ca' zaj naque̱' ca be̱zre zan ca' nen biadu chee̱ba' ca', cadxa xuluzúa xúgute̱' dizra' chiu',na' xelunne̱' ca naca xia plata da zaj nape̱'.Be̱se dinnaj benne' dute̱ xe̱zr la xu dxelexezaca ba lazre̱' xelezúe̱' lu wedil-la.

³¹Xelelá' benne' xíchaje̱ chee̱ xe̱zr la xu Egipto.Benne' xe̱zr la xu Etiopía xelune̱' ba xen xulucá'ana szrene̱' Dios.

³²¡Le gul-la chee̱ Dios, le'e zrale du gabí'i xe̱zr la xu!¡Le gul-la chee̱ Xránadxu!

³³¡Le gul-la chee̱ Bénnea' dxe'e̱ xabáa na'ala, da zua na nédxute̱!¡Le nna' xque, wanné̱', ne zízrajle̱'e̱ nne̱'!

³⁴¡Le nne̱ nápale̱'e̱ Dios xel-la' waca!¡Lu xel-la' szren chee̱' dxuxúequeze̱' benne' Israel ca',na' zran xabáa nalá' xel-la' waca chee̱'!

³⁵Benne' zrébentu' nacu' Lue', Dios, naga zu' lataj lá'azxa chiu'. Dios chee̱ benne' Israel ca', Lé̱queze̱' dxutipe̱' lazre' bénneache chee̱'.¡Gaca ba Dios!