Read Tabaa Zapotec Salmos 74 Bible Online

Salmos 74 - Tabaa Zapotec bible

Salmos 74

¹Dios, ¿tu chí'izqueze nuzú' netu' chalá'ala?¿Dxezra'u netu', nácantu' ca zrila' chiu' ca'?

²Bsá lazre' bénneache chiu', benne' ca' guzi'u nédxudaute̱.Benne' ca' bexa'u chee̱ gunu' xelaque̱' benne' cheé̱quezu',benne' ca' zaj zre̱'e̱ lu xi'a Sión nigá, naga zúaquezu' Lue'.

³Gudá xedajnná'u ca nabía xi' xe̱zre nigá,ne ca naca da cale̱la da belún benne' ca' dxeledábague̱' netu', lu lataj lá'azxa chiu'.

⁴Dxelebezre xa'a benne' ca' dxeledábague̱' Lue' laduj naga zaj nazraga bénneache chiu'.Zaj nuzúe̱' nigá da dxululé'e na xu'untu' lu na' benne' ca'.

⁵Buluzría xi'e̱ xe̱zre nigá,ca dxun tu benne' dxine̱' ca naca xaga zaj ze̱ tu xi'a.

⁶Na'a nen xa waga chee̱' ca', ne nen xaga chee̱' ca',ba buluzría xi'e̱ ca naca lechítaje̱ chee̱ xudau' chiu'.

⁷Ba buluzézxie̱' lataj lá'azxa chiu'.Bulucá'ana dítaje̱' xu'u lizru'. Buluchínnaje̱' na.

⁸Lu lázrdawe̱' gulenné̱': “Guzría xí'tegadxu na tu chi'ize.”Ba buluzézxie̱' xúgute̱ xu'u naga bezrágantu' chiu' lu xe̱zr la xu chiu'.

⁹Québedxa dxelé'entu' da la'axza ca' da dxululé'e na da guchísantu' lu xe̱zr la xu chee̱ntu'.Québedxa nu chilá' benne' guchálaje̱' waláz chiu',ne quebe nu zua ládujla netu', benne' nézene̱' bátaqueze lantu'.

¹⁰Dios, ¿Báta cueza na xulucháchale̱ benne' ca' netu', benne' ca' dxulusaca zi'e̱ netu'?¿Chadía chacanna welenné̱ benne' dxeledábague̱' lue' schanni' chee̱ Lau'?

¹¹¿Bizr chee̱ na' quebe dxebéaj lazru' benne' ca'?¿Bizr chee̱ na' quebe dxuzría xi'u benne' ca' dxelune̱' da cale̱la?

¹²Lue', Dios, nacu' Wenná Bea chia' nédxudaute̱.Lué'queze dxuseláu' bénneache dute̱ xe̱zr la xu.

¹³Xel-la' waca chiu' be̱nu' nísadau' chupa la'a.Gula'u xichaj be̱ schanni' ca' lu nísadau'.

¹⁴Bzúzruju' xichaj be̱ schanni' le̱ba' leviatán,Na' be̱nu' gulagu be̱ xixre' le̱ba', bea ca' zaj zraba' lu xu bizre.

¹⁵Be̱nu' gulaj nisa beaj, ne nisa xe̱gu ca'.Bsebizru' xe̱gu zri'a ca'.

¹⁶Chiu' Lue' naca te zra, ne cá'anqueze chiu' naca dxe̱la.Lue' bzu' beu', ne gubizra naga dxeledé na.

¹⁷Lue' bzu' tu chi'ize ca naca da zaj de̱ xe̱zr la xu nigá.Lue' be̱nu' beu' la ca', ne beu' zaga ca'.

¹⁸Bsa lazre' da nigá: Benne' ca' dxeledábague̱' lue' ba zaj nun le̱' chiu' Lue', Xran.Benne' xala ca' ba gulenné̱' schanni' chee̱ Lau'.

¹⁹Quebe gusanu' lu na' benne' zaj naque̱' ca be̱ snia ca' benne' ca' nazrí'iquezu',ne quebe gal-la lazru' tu chi'ize bénneache chiu' zaj zue̱' lu da ba xa'.

²⁰Gunná' ca naca xel-la' wezría da be̱nu',lawe' da gátete̱ze naca chul-la lu xe̱zr la xu,na' zaj zra' benne' ca' dxelune̱' da zrinnaj.

²¹Quebe gu'u lataj xelegá'ana lu xel-la' stu' benne' ca' zaj zue̱' lu da baxache'.Benne' dxelezaca zi'e̱, ne benne' dxelexázrjene̱' xelúe lá'ane̱' Lau'.

²²¡Guzé̱, Dios!¡Be̱n ca ba gunnáu'!¡Bsa lazre' ca dxelún benne' xala ca', dxelún le̱' chiu' te zra te zra!

²³Quebe gal-la lazru' ca da gulenná benne' ca' dxeledábague̱' lue'.Da schaga dxelún benne' ca' dxeledábague̱' Lue' tu dxénzqueze na.