Read Tabaa Zapotec Salmos 75 Bible Online

Salmos 75 - Tabaa Zapotec bible

Salmos 75

¹“Xcalenu'”, dxe̱ntu' Lue', Dios: “Xcalenu'.”Dxuzentu' bénneache zúale̱nu' netu', ne ba nunu' da ca' dxexebánequezentu'.

²Dxenná Dios: “Ba nuzúa' zra guchi'a chee̱ bénneache.Guchi'a ca naca da xrlátaje.

³Lácala xru' dute̱ xe̱zr la xu, ne xelezrize xúgute̱ da zaj naca ban na,neda' gúxruqueza' ca naca lane xe̱zr la xu na'.

⁴Dxapa' benne' xala ca': Quebe gáwele.Dxapa' benne' ca' dxelune̱' da cale̱la: Quebe gucá'ana szren cuínale.

⁵Quebe guxrén lázrele xel-la' wal-la chee̱le.Quebe gácale benne' lázxdau zide'.”

⁶Quebe za xel-la' szren naga dxalaj gubizra, ne naga dxebía na,ne quebe za na le̱'e̱ xixre' lawe' lataj.

⁷Dios naque̱' Bénnea' guchi'e̱ chee̱ bénneache.Dxucá'ane̱' cá'aze tu benne', ne dxucá'ane̱' szren xetú benne'.

⁸Dios nuxre̱' tu zriga', da nazrate̱ na xrise uva wal-la, da zeaje na xel-la' dxezrá'a chee̱'.Dxulálaje̱' na chee̱ xele̱'aj benne' ca' dxelune̱' da cale̱la. Xelé̱'aje̱' na xebizrte̱ na.

⁹Neda' guzénquezda' bénneache,ne gul-la' da güe lá'ana' Dios chee̱ Jacob.

¹⁰Le̱' guchínnajqueze̱' xel-la' waca chee̱ benne' we̱n da cale̱la ca'.Gusezrendxe̱' xel-la' waca chee̱ benne' xrlátaje ca'.