Read Tabaa Zapotec Salmos 77 Bible Online

Salmos 77 - Tabaa Zapotec bible

Salmos 77

¹Nen chi'a bláwizra' Dios.Bláwizra' Dios, na' Le̱' buzé̱ nague̱' chi'a.

²Guxu'a lau Xránadxu lu zra guzúa' lu da ba xa'.Chizrela guchisa na'a lau Le̱', ne quebe guzúa zria'.Quebe be̱'a lataj nu benne' xue zrene̱' neda'.

³Bsa lazra' chee̱ Dios, ne guzúa' ste̱be.Gudawa' zria lawe̱', ne bedú lazra'.

⁴Begúe̱' bchigala chia'.Guzúa' sté̱bele̱'e̱, ne quebe guca guchálaja'.

⁵Blaba lazra' ca naca zra nédxute̱.Ca naca iza zan ca' da ba guledé chee̱ na.

⁶Bsa lazra' ca naca da bil-la' chizrélala,ne blaba lázrequeza' ca zaj naca na, na' gunaba be' xu'a:

⁷¿Guzúa Xránadxu dxi'u chalá'ala tu chi'izene québedxa gácale̱ne̱' dxi'u?

⁸¿Cabátadxa xexache lazre̱' dxi'u?¿Cabátadxa gune̱' ca da guche̱be lazre̱'?

⁹¿Gul-la lázrequeze Dios xexache lazre̱' dxi'u?¿Dxezré̱'e̱ dxi'u, na' québedxa xexache lazre̱' dxi'u?

¹⁰Nadxa gunnía': Caní dxuna' lawe' da quebe chawe' zua'.Chee̱ le̱ na' cheajsá lazra' chee̱ xúgute̱ da zrente̱da be̱n Dios zrente̱ lu iza ba guledé chee̱ na.

¹¹Cheajsá lazra' chee̱ da zrente̱ ca' da be̱n Jah. Awe', cheajsá lazra' chee̱ da be̱nu' nédxudaute̱ da ca' dxexebánentu'.

¹²Gulaba lazra' ca naca xúgute̱ da ba be̱nu',ne guchálaja' ca zaj naca da nunu'.

¹³Dios, lá'azxa naca da dxusé̱denu' netu' ca guntu'.¿Zua xetú Dios naque̱' benne' zren ca naca Dios chee̱ntu'?

¹⁴Lue' nacu' Dios, dxunu' da ca' dxexebánentu'.Blé'enu' xúgute̱ bénneache lu xe̱zr la xu ca zrente̱ naca xel-la' waca chiu'.

¹⁵Nen xel-la' waca chiu' bexa'u bénneache chiu',zri'ine zre sua Jacob, ne zri'ine zre sua José.

¹⁶Xe̱gu nisa ca' belelé'en Lue', Dios.Belelé'e xe̱gu nisa ca' Lue', na' belezrébele̱'e̱ na.Cá'anqueze gulezúa ste̱be nísadau' situj ca'.

¹⁷Nisa xiuj zila bdxuaj na lu beuj bza ca',ne gulenné̱le̱'e̱ guziu', ne gulé̱pele̱'e̱ xesa.

¹⁸Lu be' bdunu' ben guziu' chiu' da gunné̱le̱'e̱ na.Bulusaní' xesa guziu' ca naca xe̱zr la xu.Guzúa ste̱be, ne guzrize xe̱zr la xu.

¹⁹Lawe' nísadau' guza'u,ne lawe' nisa zila ca' gudéquezu',ne quebe naca bea naga bléaju'.

²⁰Guche̱'u bénneache chiu' ca zrila' ca'lu na' Moisés, ne lu na' Aarón.