Read Tabaa Zapotec Salmos 78 Bible Online

Salmos 78 - Tabaa Zapotec bible

Salmos 78

¹Le xen, le'e, bénneache chia', ca da dxusé̱deda'.Le xen xanne' ca da dxuchálaja'.

²Guchíneda' dizra' ca da dxuluchalaj benne' sina ca',na' guzéajni'ida' le'e da ca' gulezúa na bagácheze gate nate,

³da ca' bendxu, ne bé̱nbeadxu na,da ca' belixru be'e xra xrtáudxu ca' dxi'u.

⁴Quebe gucáchedxu na lau zrí'inedxu ca'.Guzénquezdxu zrí'inedxu ca' ca naca xel-la' szren chee̱ Xránadxu,ne ca naca xel-la' waca chee̱', ne ca zaj naca da zren ca' da be̱ne̱'.

⁵Bzue̱' tu da nadxixruj bea na da xelún benne' Israel ca',ne da bdxixruj be'ene̱' ca' da xelún zri'ine zre sua Jacob.Gunná bé'ene̱' xra xrtáudxu ca' xuluzenne̱' bi chee̱' ca' ca naca da gunná bé'ene̱',

⁶chee̱ xelúnbea zrí'ine̱' bidu ca' za xelálajbe' ca naca na,na' bi caní xuluzenbe' zrí'inebe' da na',

⁷chee̱ xuluxrén lázrebe' Dios,ne quebe xelal-la lázrebe' da ca' be̱n Dios,ne chee̱ xuluzúabe' dizra' da ca' gunná be'e̱.

⁸Quebe xelácabe' ca gulaca xra xrtáube' ca'.Benne' ca' quebe buluzúe̱' dizra' chee̱', ne guledábague̱' Le̱',ne quebe buluzúa chúchue̱' ca buluxrén lazre̱' Dios,ne quebe gulaque̱' li lazre' lu da naca chee̱ Dios lu be' zaj nácaqueze̱'.

⁹Benne' zrí'ine zre sua Efraín, benne' zaj nu'e̱ da dxuluchínene̱' lu wedil-labuluzrúnnuje̱' naga dxaca wedil-la.

¹⁰Quebe belune̱' ca naca xel-la' wezría da be̱n Dios,ne quebe buluzúe̱' dizra' da gunná bé'ene̱'.

¹¹Gulal-la lazre̱' da ca' be̱n Dios,ne xel-la' waca ca' blé'ene̱' Le̱'.

¹²Lau xra xrtawe̱' ca' be̱ne̱' xel-la' waca ca'lu xe̱zr la xu Egipto, ne lu xe̱zr la xu Zoán.

¹³Gusalje̱' neza lu nísadau' naga guledé benne' ca'.Be̱ne̱' nísadau' na' ca xi'a ca' chalá'a weaj.

¹⁴Te zra blé'ene̱' benne' ca' neza nen tu beuj bza da xjácale̱ne̱',ne chizrela nen beuj bza da naca na ca tu xi'.

¹⁵Gulé̱'e̱ xiaj ca' naga naca xu bizre,na' bxí'aje̱' benne' ca' nisa da gulaj na le̱'e̱ xiaj ca' ca tu xe̱gu nisa.

¹⁶Be̱ne̱' gulaj tu xe̱gu nisa le̱'e̱ xiaj na',na' bzriluj na ca tu xe̱gu zren.

¹⁷Lácala be̱ne̱' caní belúndxaqueze̱' dul-la lau Dios le̱'e̱ xixre' lawe' lataj,ne guledábague̱' Dios nape̱' dute̱ xel-la' szren.

¹⁸Gulegú'u lazre̱' xulu'zúa zrie̱' Dios.Gulenabe̱' xelawe̱' ca da dxelezá lazre' le̱'.

¹⁹Gulenné̱' chee̱ Dios, gulenné̱':¿Wazeque Dios na' gunne̱' da gágudxu le̱'e̱ xixre' nigá?

²⁰Da líqueze gulé̱'e̱ xiaj na', na' gulaj nisa na', na' bzriluj na ca tu xe̱gu zren.¿Wazéquequezne̱' gunne̱' dxi'u xeta, ne gunne̱' be̱la' da gágudxu?

²¹Chee̱ le̱ na' bzra'a Xránadxu gate benne̱' da na',ne gusel-le̱' xi' da bzezxe na bal-la bénneache chee̱',na' bsedxí'ule̱'e̱ xel-la' dxezrá'a chee̱' nen benne' Israel ca',

²²lawe' da quebe guléajle̱'e̱ chee̱ Dios,ne quebe buluxrén lazre̱' Le̱' guselé̱' le̱'.

²³Gunná bé'ene̱' beuj zran xabáa,ne gusálaje̱' dxa xu'u chee̱ xabáa,

²⁴na' be̱ne̱' bxinnaj xeta maná ca dxinnaj xiuj chee̱ gulagu benne' chee̱' na.Bnézruje̱' le̱' da naca ca zrua' chee̱ xabáa.

²⁵Gulawe̱' da dxelagu gubáz chee̱ xabáa ca'.Gusél-lale̱'e̱ da gulawe̱', na' gulélajte̱quezene̱'.

²⁶Be̱ne̱' guca be' da za' chalá'ala naga dxalaj gubizra,ne xel-la' waca chee̱' be̱ne̱' guca be' za' chalá'ala naga dxedé gubizra beu' zaga,

²⁷na' gusel-le̱' chee̱ benne' ca' be̱la' ca ze̱ bxrte xu,béadu zaj zua xrila naxanba' ca xuzre' da dxe' dxu'a tu xe̱gu zren.

²⁸Be̱ne̱' guléxrujba' chale'aj chee̱ benne' ca'.Guléxrujba' dúte̱queze naga zaj zua xu'u xide chee̱'.

²⁹Gulawe̱'-ba', ne gulélajquezene̱'.Dios bnézruje̱' chie̱' ca naca da gulaca lazre̱'.

³⁰Gate quebe ne xelélajene̱', ne ne dxelawe̱'-ba',

³¹bzra'a Dios benne' ca',na' be̱tie̱' benne' zaj nácadxe̱' benne' wal-la,ne benne' Israel ca' zaj nácadxe̱' benne' waca.

³²Láqueze be̱ne̱' caní, na' belúndxaqueze̱' dul-la,ne láqueze belelé'ene̱' xel-la' waca ca' da be̱ne̱', quebe buluxrén lazre̱' Le̱'.

³³Chee̱ le̱ na' guchugue̱' zra chee̱ benne' ca' ca tu be' dxecá'adxu,ne ca zaj naca iza da gulezúe̱', bdee̱' le̱' lu da zi' da xa'.

³⁴Gate be̱tie̱' bal-la benne' ca', na' xezícadxe̱' belexaque̱' chee̱ Dios.Belexebí'i lazre̱', ne du lazre̱' buluchálajle̱ne̱' Le̱'.

³⁵Xeajlesá lazre̱' naca Dios Benne' dxuxúe̱' le̱',ne Dios na' nape̱' dute̱ xel-la' szren naque̱' Bénnea' bxá'awene̱' le̱',

³⁶san quebe guca li lazre' da gulenné̱'lawe' da belún lazre̱' lau Dios.

³⁷Quebe gulaque̱' li lazre' nen Le̱',ne quebe belune̱' du lazre' ca naca xel-la' wezría chee̱'.

³⁸Dios bexache lazre̱' chee̱ benne' ca',ne bnite lawe̱' dul-la belune̱', ne quebe bzria xi'e̱ le̱'.Zane' lásate̱ bzue̱' chalá'ala xel-la' dxezrá'a chee̱',ne quebe bzre̱'e̱ le̱' dute̱ ca da dxéquene̱'.

³⁹Xeajsá lazre' Dios zaj naque̱' be̱la' dxen.Zaj naque̱' ca tu be' da dxedé na, ne quebe xezrín na.

⁴⁰Zane' lasa guledábague̱' Le̱' le̱'e̱ xixre' lawe' lataj na',ne zane' lasa buluzúe̱' Le̱' baxache'.

⁴¹Zane' lasa buluzúe̱' Dios chalá'ala,ne buluché̱'e̱ Dios lá'azxa chee̱ benne' Israel ca'.

⁴²Gulal-la lazre̱' ca naca xel-la' waca zren chee̱',ne ca be̱ne̱' lu zra na' bxá'awene̱' le̱' lu da zi' da xa',

⁴³gate be̱ne̱' xel-la' waca ca' lu xe̱zr la xu Egipto,ne blé'ene̱' da ca' da dxebánedxu lu xe̱zr la xu Zoán.

⁴⁴Bexune̱' xe̱gu chee̱' ca' dxen,na' québedxa guca da xele'aj benne' Egipto ca'.

⁴⁵Gusel-le̱' be̱'a ládujla benne' ca', be̱ buludeba' le̱' xel-la' zi'.Gusel-le̱' bluzru ca' buluzría xiba' xe̱zr la xu chee̱'.

⁴⁶Gusel-le̱' biche zu ca' guláguba' lina chee̱',ne buluzría xiba' da zaj zua lu xe̱zr la xu chee̱'.

⁴⁷Gusel-le̱' xiaj bezxe' zri'a da bzria xi na lba uva chee̱' ca',ne gusel-le̱' da zaga da bsebizre na xaga higo chee̱' ca'.

⁴⁸Gusel-le̱' xiaj bezxe' zri'a da be̱te na be̱ xixre' chee̱' ca',ne gusel-le̱' xesa da be̱te na zrila' chee̱' ca'.

⁴⁹Bdee̱' benne̱' Egipto ca' lu xel-la' zi' zren, lawe' da bzrá'ale̱'e̱ benne' ca',na' guca da ca' ca zánete̱ gubáz ca' chee̱ xel-la' gute.

⁵⁰Quebe bzague̱' xel-la' dxezrá'a chee̱',ne quebe bnite lawe̱' chee̱' chee̱ quebe xelátie̱', san be̱tie̱' le̱' nen tu xízrawe̱' wal-la.

⁵¹Be̱tie̱' bi biu nedxu chee̱ benne' ca',bi biu nedxu ca' chee̱ benne' Egipto ca'.

⁵²Nadxa beche̱'e̱ benne' chee̱' ca' ca tu benne' dxeche̱'e̱ zrila' ca',ne bsi'e̱ le̱' le̱'e̱ xixre' lawe' lataj.

⁵³Bsi'e̱ le̱' zri'a chawe', ne quebe bi belezrebe̱',san gulate benne' guledábague̱' Le̱' lu nísadau'.

⁵⁴Beche̱'e̱ le̱' lu xe̱zr la xu lá'azxa chee̱',naga zua xi'a nigá da guca cheé̱queze̱'.

⁵⁵Bebéaje̱' benne' zaj zre̱'e̱ lu xe̱zr la xu na' lau benne' chie̱' ca',na' gulé̱'e̱ xe̱zr la xu chee̱' cha chee̱ benne' Israel ca', ne bzre̱'e̱ le̱' lizre benne' ca' bebéaje̱'.

⁵⁶Da xula buluzúe̱' Dios chalá'ala, ne buluché̱'e̱ Dios, nape̱' dute̱ xel-la' szren.Quebe buluzúe̱' dizra' da ca' gunná be'ene̱' le̱'.

⁵⁷Da xula guledábague̱' Dios ca belún xra xrtawe̱' ca'.Gulaque̱' ca tu bdxeque' xala chee̱ xaga nalá xéche'ze.

⁵⁸Buluché̱'e̱ Le̱' ne̱ chee̱ lataj ca' naga bulucá'ana szrene̱' bedáu' xiaj xaga ca',ne ne̱ chee̱ bedáu' xiaj xaga chee̱' ca' bzrá'ale̱'e̱ Dios.

⁵⁹Bzra'a Dios gate blé'ene̱' na,na' gucuídele̱'e̱ne̱' benne' chee̱' ca', benne' Israel.

⁶⁰Guleaj xíchaje̱' xu'u xide lá'azxa chee̱' zua na xe̱zre Silo,xu'u xide na' guzuáqueze̱' ládujla benne' ca'.

⁶¹Be̱'e̱ lataj belecá'a benne' ca' dxeledábague̱' dxi'u xi'ina lá'azxa chee̱',da na' dxulé'e na xel-la' waca, ne xel-la' szren chee̱'.

⁶²Bzre̱'e̱ benne' chee̱' ca',na' bdee̱' le̱' lu na' benne' ca' belútie̱' le̱'.

⁶³Benne' wal-la ca' gulátie̱' lu wedil-la.Quebe nu zra' benne' wegu', benne' xelezúale̱ne̱' nu'ula wegu' ca'.

⁶⁴Cá'anqueze gulate bxruze ca' lu wedil-la,na' nu'ula chee̱ bxruze ca' quebe gulebezre xache̱' chee̱ bxruze ca'.

⁶⁵Nadxa guca Xránadxu ca tu benne' dxexebane̱' lu bchigala.Guque̱' ca tu benne' wal-la dxebezre xe̱'e̱ gate ba né'aje̱' xrise uva wal-la.

⁶⁶Na' blague̱' benne' guledábague̱' Le̱',ne bca'ane̱' le̱' cá'aze chadía chacanna.

⁶⁷Bzue̱' chalá'ala zri'ine zre sua José,ne quebe bequé̱'e̱ zri'ine zre sua Efraín,

⁶⁸san bequé̱'e̱ zri'ine zre sua Judá,ne xi'a Sión, da na' nazrí'ile̱'e̱ne̱'.

⁶⁹Lu xi'a na' be̱ne̱' xudau' lá'azxa chee̱', da guca na ca naca da zua na xabáa.Bzua chúchue̱' na chadía chacanna, ca nácaqueze xe̱zr la xu nigá.

⁷⁰Bequé̱'e̱ David, benne' we̱n zrin chee̱'.Bebéaje̱' le̱' naga zaj zra' zrila' ca'.

⁷¹Beche̱'e̱ le̱' naga zue̱' dxuxúe̱' zrila' ca' zaj nache̱'e̱ba' be̱dau',chee̱ gaque̱' wenná bea, benne' guxúe̱' bénneache chee̱', zri'ine zre sua Jacob, benne' zaj naque̱' benne' Israel ca'.

⁷²Dute̱ xel-la' du lazre' chee̱' bxue̱' benne' ca'.Bxue̱' le̱' dute̱ xel-la' waca zren chee̱'.