Read Tabaa Zapotec Salmos 80 Bible Online

Salmos 80 - Tabaa Zapotec bible

Salmos 80

¹Bene chee̱ntu', Lue' dxuxú' benne' Israel ca',Lue' na', dxuxú' zri'ine zre sua José ca zríla'du ca',ne dxe'u lataj blau chiu' da zua na láwela querubín ca'.

²Ble'e xel-la' szren chiu' lau zri'ine zre sua Efraín, ne Benjamín, ne Manasés.Ble'e xel-la' waca chiu', ne gudá guseláu' netu'.

³Beché̱' netu', Dios.Bexache lazre' netu', na' lantu'.

⁴Xránantu' Dios, napu' dute̱ xel-la' waca, ¿bata chajse̱queze zra'u netu',ne quebe xennu' ca da nábantu' Lue'?

⁵Bzúale̱'u netu' lu xel-la' dxewí'ine lazre',ne bzílale̱'u nisa dxebézrentu'.

⁶Be̱'u lataj xe̱zr la xu walizre ca' bulucá'ana dítaje̱' netu',na' benne' ca' dxeledábague̱' netu' belún le̱' chee̱ntu'.

⁷Beché̱' netu', Dios, napu' dute̱ xel-la' waca.Bexache lazre' netu', na' lantu'.

⁸Bebéaju' tu zrigu' lba uva lu xe̱zr la xu Egipto da naca na bénneache chiu'.Blagu' benne' xe̱zr la xu gulezré̱'e̱ nigá, na' guzu' nigá zrigu' lba uva na'.

⁹Gú'unu' lba uva na' chee̱ gula na.Bdéle̱'e̱ lue zrigu' lba uva na', na' gucu na xe̱zr la xu na'.

¹⁰Gulú'u na zrul-la xúgute̱ xi'a ca',na' zruze na ca' gulegú'u na zrul-la xaga cedro zren ca'.

¹¹Gulechiluj zruze na, belezrinte̱ na dxu'a nísadau',ne belezrinte̱ na dxu'a xe̱gu Eufrates.

¹²¿Bizr chee̱ na' gucá'u le'aj da naxechaj na le̱ na?Na'a xúgute̱ benne' dxeledé na' dxelebane̱' da zixre chee̱ na.

¹³Dxuluchuchu dxululéaj cuche xixre' ca' lba uva na',na' be̱ xixre' ca' dxeláguba' na.

¹⁴Bedá chee̱ntu', Dios, napu' dute̱ xel-la' waca.Gunná' netu' ga na' zu' xabáa, ne gudá xedajnná'u lba uva chiu'.

¹⁵Gudá, guseláu' lba uva nigá, da gúzaquezu'.Bechuj chee̱ lba uva na', ba bzua chuchu' gaca na chiu'.

¹⁶Benne' ca' dxeledábague̱' netu' ba gulechúgue̱' lba na', ne ba guládue̱' na xi'.Gunná' benne' ca' lu xel-la' dxezrá'a chiu', ne bzria xi' benne' ca'.

¹⁷Bzua chuchu, ne bxue benne' ca' ba guca'u,benne' xe̱zr la xu na' ba nuzúa chuchu'.

¹⁸Cabátadxa cueaj xíchajntu' Lue' xecha lasa.Bcache chawe' netu', naca bantu', na' güe lá'anantu' Lau'.

¹⁹Xránantu' Dios, napu' dute̱ xel-la' waca, beché̱' netu'.Bexache lazre' netu', na' lantu'.