Read Tabaa Zapotec Salmos 89 Bible Online

Salmos 89 - Tabaa Zapotec bible

Salmos 89

¹Tu gúl-lazqueza' chee̱ xel-la' zri'i lazre' chiu', Xran.Guzenda' tu cuen tu cuen zri'ine zre súantu' nacu' li lazre'.

²Nezda' tu súazqueze xel-la zri'i lazre' chiu',ne chadía chacanna zua xel-la li lazre' chiu', cáte̱ze zúaqueze xabáa.

³Lue' gunnáu': “Be̱na' xel-la wezría nen bénnea' ba gucá'a.Guche̱be lazra' chee̱ David, we̱n zrin chia',

⁴gunnia': Guna' tu cházqueze zri'ine zre su'.Guna' xelenná be'e̱ tu chí'izqueze lu waláz chiu'.”

⁵Benne' zaj zra' xabáa dxelúe lá'ane̱' Lue',ne̱ chee̱ da zrente̱ ca' da dxunu', Xran,ne ne̱ chee̱ xel-la' li lazre' chiu', naga zaj nazrague̱'.

⁶Quebe nu zua xabáa, benne' naque̱' ca Lue', Xran.Quebe nu zua benne' szrente̱, benne' naque̱' ca Lue'.

⁷Benne' zaj zra' xabáa dxelape̱' Dios ba lá'ana,na' xúgute̱ benne' ca' zaj nazraga chee̱' dxelezrebe̱' Le̱'.

⁸Xran, nacu' Dios chee̱ benne' zante̱, benne' zaj zra' xabáa.Quebe nu zua, benne' naque̱' ca Lue', Xran.Nacu' Benne' wál-late̱, ne tu nácazquezu' li lazre'.

⁹Xu'u lu na'u xeajxruza zren chee̱ nísadau'.Gate dxelasa xeajxruza ca' Lue' dxebeque zriu' na.

¹⁰Bchúchuju' benne' Egipto ca', na' belexegá'ane̱' ca tu da gate.Be̱se dínnaju' benne' ca' dxeledábague̱' lue' nen na'u wál-late̱.

¹¹Chiu' Lue' naca xabáa, ne chiu' Lué'queze naca xe̱zr la xu.Be̱nu' xe̱zr la xu nigá, ne da ca' zaj nnita lawe na.

¹²Be̱nu' da de̱ chalá'a naga za' be' zaga,ne da de̱ chalá'a naga dxedé gubizra beu' zaga ca'.Xel-la dxelebé dxelul-la chiu' xi'a Tabor, ne xi'a Hermón.

¹³Benne' wál-late̱ nacu' Lue'.Da zrente̱ naca xel-la waca chiu', ne nagá'ana szren na.

¹⁴Lu da xrlátaje, ne lu da li lazre' dxenná be'u.Lu xel-la zri'i lazre', ne lu da li lazre' zaj zua ca da dxunu'.

¹⁵Ba neza zrente̱ naca na chee̱ benne' ca' dxelul-le̱' da dxue lá'ana na Lue',ne zaj zue̱' lu xel-la naxaní' chiu', Xran.

¹⁶Ne̱ chiu' Lue' dxelebéle̱'e̱ne̱' du zra,ne dxulucá'ana szrene̱' Lue' ca naca da xrlátaje chiu'.

¹⁷Lué'queze nacu' xel-la wal-la chee̱ benne' ca', ne xel-la xrtan chee̱'.Dxúnnadxu' netu' xel-la' waca lawe' da ca' dxéquenu' xrlátaje.

¹⁸Xránadxu Dios dxucu'uje̱' dxi'u,na' Dios lá'azxa chee̱ benne' Israel ca' naque̱' Wenná Bea chee̱dxu.

¹⁹Nédxudaute̱ bchálaju' lu da blé'enu' benne' we̱n zrin chiu' ca', benne' zaj naque̱' li lazre', gunnáu':Ba gucá'a tu benne' wal-la ládujla bénneache chia',ne ba bzua' le̱' gaque̱' wenná bea, ne dxácale̱na' le̱'.

²⁰Ba gucá'a David, we̱n zrin chia'.Bzúaqueza' le̱' gaque̱' wenná bea.

²¹Neda' tu gácale̱zqueza' le̱'.Xel-la waca chia' gutípaqueza' lazre̱'.

²²Benne' ca' guledábague̱' Le̱' quebe xelezéquene̱' bi xelune̱' chee̱',na' benne' ca' dxelune̱' da cale̱la quebe xelezéquene̱' xuluchúchuje̱' le̱'.

²³Guchúchujqueza' benne' dxeledábague̱' Le̱', ne gucuasa' benne' ca' lau le̱'.Guna' we̱' benne' ca' dxelecuídene̱' le̱'.

²⁴Tu zrí'izqueza' le̱', ne gaca' li lazre' nen le̱',na' ne̱ chia' neda' gápadxe̱' xel-la' wal-la.

²⁵Guna' nna be'e̱ dute̱ dxu'a nísadau' zren,ne dute̱ dxu'a xe̱gu Eufrates.

²⁶Le̱' xe̱'e̱ neda': “Lue' nacu' Xra'.Nacu' Dios chia', dxucu'uju' neda', ne dxuseláu' neda'.”

²⁷Neda' guzúa' le̱' ca zri'ina' blau,na' nna bé'ene̱' xúgute̱ benne' wenná bea zaj zre̱'e̱ lu xe̱zr la xu.

²⁸Tu chí'izqueze nuzúa' chee̱' xel-la' zri'i lazre' chia',na' ca naca xel-la' wezría chia' gaca líqueze na nen le̱'.

²⁹Guna' tu cházqueze zri'ine zre sue̱',na' xelenná be'e̱ lu waláz chee̱' dxácate̱ ne zua xabáa.

³⁰Che xulusán zri'ine zre sua David da nadxixruj be'a,ne che quebe xelune̱' ca da nuchi'a chee̱',

³¹ne che xelecuase̱' lu da dxenná be'a,ne che quebe xelune̱' ca da dxapa' le̱',

³²na' gu'a le̱' zrise lawe' da dxeledábague̱' neda',ne quina' le̱' xide lawe' da dxelune̱' da cale̱la.

³³Quebe gusana' ca nazrí'ida' David,ne quebe gusana' gaca' li lazre' nen le̱',

³⁴ne quebe gal-la lazra' xel-la' wezría da nuna',ne quebe guchá'a ca da ba gunnía'.

³⁵Tu lásaze bzetaj cuina' guche̱be lazra',na' cabata' gun lazra' chee̱ David,

³⁶gunnia': Tu cházqueze zri'ine zre sue̱',na' xelenná be'e̱ lu waláz chee̱' lawa' neda' dxácate̱ ne zua gubizra.

³⁷Xel-la' dxenná bea chee̱' tu sua chúchuzqueze na ca zua beu' zran xabáa.Tu sua chúchuzqueze na dxácate̱ ne zua xabáa.

³⁸Lue', Dios, guleaj xíchaju', ne bzu' chalá'ala bénnea' guca'u, ne dxezrá'le̱'u le̱'.

³⁹Nuzú' chalá'ala xel-la' wezría bé̱nle̱nu' David, we̱n zrin chiu',ne nucá'ana dítaju' xel-la' dxenná bea chee̱'.

⁴⁰Nuxrínnaju' ze'e da naxechaj na xe̱zre zréntau' chee̱',ne nuzría xi'u ca naca lataj wal-la chee̱' chee̱ wedil-la.

⁴¹Xúgute̱ bénneache, benne' dxeledaze ga na' dxelebane̱' chee̱ da zaj de̱ chee̱',na' benne' xe̱zre walízr chee̱' dxelún le̱' chee̱'.

⁴²Ba be̱nu' bedxúaj chawe' benne' guledábague̱' Le̱', na' dxelebéle̱'e̱ne̱'.

⁴³Be̱n dítaju' da ca' dxuchínene̱' lu wedil-la,ne quebe gúcale̱nu' le̱' lu wedil-la na'.

⁴⁴Ba gudú' ca naca da xrtante̱ chee̱',ne nucá'ana dítaju' xel-la' dxenná bea chee̱'.

⁴⁵Be̱nu' naque̱' ca tu benne' gula gate ne zue̱' iza cuide' chee̱', ne bsi'u le̱' xel-la' stu'.

⁴⁶Xrana' Dios, ¿bátaqueze quebe xennu' chee̱ntu'?¿Tu chí'izqueze dxezrá'aquezu' netu'?

⁴⁷Bsa lazre' látega sua' lu xe̱zr la xu.Látega nunu' xel-la' nabán chee̱ xúgute̱ bénneache.

⁴⁸Quebe zua nu benne' gaca bane̱' tu chí'izqueze.Xúgute̱' xelatie̱'.Quebe zua nu benne' le̱' lu na' xel-la' gute.

⁴⁹Xran, ¿ba bsanu' David, ne québedxa nazrí'inu' le̱',ca bzetaj cuinu' guche̱be lazru' zrí'iquezenu' le̱'?

⁵⁰Gunná' xque, Xran, ca dxelún le̱' chia' neda', we̱n zrin chiu',ne ca dxuchaga lawa' da dxelún lala benne' xúgute̱ xe̱zr la xu chia' neda'.

⁵¹Benne' ca' dxeledábague̱' lue' dxulucá'ana dítaje̱' bénnea' guca'u Lue', Xran.Dxulucá'ana dítaje̱' le̱' gátete̱ze zéaje̱'.

⁵²Ba neza zrente̱ gaca Xránadxu Dios chadía chacanna.Ca' naca na, ne ca' gaca na.