Read Tabaa Zapotec Salmos 95 Bible Online

Salmos 95 - Tabaa Zapotec bible

Salmos 95

¹Le da, güe lá'anadxu Xránadxu Dios dute̱ xel-la' dxebé.Dute̱ xel-la' dxebé gúl-ladxu chee̱ Bénnea' nuzúa chúchue̱' dxi'u naga ladxu.

²Cheajdxu lau Le̱', ne xe̱dxu Le̱': Xcalenu'.Dute̱ xel-la' dxebé gúl-ladxu da güe lá'anadxu Le̱'.

³Naca Xránadxu tu Dios szrente̱,ne naque̱' Wenná Bea szrente̱ lawe' dios ca' chee̱ bénneache.

⁴Dxenná bé'ene̱' du gabí'i xe̱zr la xu,naga naca situj, ne naga naca sibe chee̱ xi'a ca'.

⁵Dxenná bé'ene̱' nísadau' da núnqueze Le̱',ne cá'anqueze xe̱zr la xu da be̱ne̱'.

⁶Le da, gucá'ana szrendxu Le̱', gátadxu sudxú'ala.Guzú zríbedxu lau Xránadxu, Bénnea' nune̱' dxi'u.

⁷Le̱' naque̱' Dios chee̱dxu.Nácadxu benne' ca' dxuxúequeze̱', ne nácadxu ca zríla'du ca' cheé̱queze̱'.

⁸Che dxenle chi'e̱ na'a zra, quebe gun zide' lázrdauleca belún xra xrtáule ca' naga nazí le na Meriba,ne ca belune̱' lu zra na' le̱'e̱ xixre' lawe' lataj naga nazí le na Masah,

⁹naga buluchá'a xra xrtáule neda', ne belune̱' neda' da ste̱belácala belelé'ene̱' xúgute̱ da be̱na'.

¹⁰Lawe' chua iza beditaj lazra' chee̱ benne' ca',na' gunnía': Zaj naque̱' benne' dxelebéaj xíchaje̱' neda',ne quebe dxelune̱' ca da dxulé'eda' le̱'.

¹¹Chee̱ le̱ na', dute̱ xel-la' dxezrá'a chia' bzetaj cuina' gunnía':Quebe xelexú'uqueze̱' naga xelexezí' lazre̱' nen neda'.