Read Tabaa Zapotec San Mateo 18 Bible Online

San Mateo 18 - Tabaa Zapotec bible

San Mateo 18

¹Tu lasa gulebiga benne' ca' dxuse̱de Jesús naga zue̱', na' buluche̱be̱' Le̱': ―¿Nuzra benne' nácadxe̱' blau naga dxenná bea Dios?

²Nadxa Jesús gunné̱' tu bidau', na' bze̱'-be' lau benne' ca' dxusé̱dene̱'.

³Dxenné̱': ―Da li dxapa' le'e, che quebe xexácale ca bidu nigá, québequeze chu'ule naga dxenná bea Dios xabáa.

⁴Ca'an naca, benne' nácadxe̱' blau naga dxenná bea Dios xabáa, naca benne' gaque̱' dxexruj lazre', ne xexaque̱' ca bidu nigá.

⁵Benne' gape̱' ba lá'ana tu bidau' caní lu La' neda', néda'queza' gape̱' ba lá'ana. Ca naca da dxun na gundxu dul-la

⁶Na' gunná Jesús: ―Nútete̱ze benne' gune̱' gun tu bidu caní dul-la, bi dxeajlí lázrebe' neda', cháwela guchéajladxu lbe̱'e̱ tu xiaj zi'i da dxutu, na' cheajchú'unadxu le̱' situj lu nísadau'.

⁷Edxugúa bénneache lawe' da dé̱le̱'e̱ da dxun na xelún bénneache dul-la. Tu gátazqueze da caní, na' edxugúa bénneache dxelune̱' xelún bénneache dul-la.

⁸Chee̱ le̱ na', che na'u u ni'u dxun na gunu' dul-la, guchugu na, ne gudxú'una na zitu'. Cháwedxa xexú'u lu xel-la' nabán li lazre' nadxugu ni'u u na'u, quézcala xelegú'e̱ lue' lataj ba xa', zua dxúpate̱ na'u, ne dxúpate̱ ni'u.

⁹Che xiaj lau' dxun na gunu' dul-la, guleaj na, ne gudxú'una na zitu'. Wenla chu'u lu xel-la' nabán li lazre' nen tuze xiaj lau', quézcala xelegú'e̱ lue' lu xi' gabila, zua dxúpate̱ xiaj lau'. Da dxulé'e na ca naca chee̱ zrila' naníteba'

¹⁰Na' gunná Jesús: ―Gutu guzú' chalá'ala netú bidu caní. Neda' dxapa' le'e, zaj zra' gubáz chee̱ xabáa chee̱ bidu caní lau Xra' xabáa.

¹¹Neda', Benne' Gulje̱' Bénneache, bla'a bedajselá' benne' zaj nanitie̱'.

¹²’¿Ájazra dxéquele le'e? Che tu benne' nape̱' tu gaxúa zrila', na' nite tuba', ¿quebe gucá'ane̱' be̱ tápalalaj che̱nnu na' le̱'e̱ xixre', na' cheajdilje̱' zrila' na' naníteba'?

¹³Gate ba bezrelne̱'-ba', wabéle̱'e̱dxene̱' chee̱ be̱ tu na' quézcala chee̱ be̱ tápalalaj che̱nnu ca' quebe guleníteba'.

¹⁴Cá'anqueze Xrale le'e, zue̱' xabáa, quebe dxaca lazre̱' nite netú bidu caní. Ca dxal-la' gunite laudxu chee̱ le sa' ljwézredxu

¹⁵Na' gunná Jesús: ―Che bi bichu' dxunbe' chiu' da cale̱la, bchálajle̱ tuze le̱be', chee̱ xúnbeabe' da cale̱la da be̱nbe'. Che xenbe' da dxu'u-be', na' ba bexacu' tuze bi bichu'.

¹⁶Che quebe xenbe' da dxu'u-be', guché̱' tu chupa benne' chee̱ gaca chupa u chunna benne' xelexeche̱be̱' ca naca da dxu'u-be'.

¹⁷Che quebe xenbe' chee̱ benne' ca', guzre ca naca benne' dxelezraga lu xudau'. Che quebe xenbe' chee̱ benne' ca', le guzúa-be' ca tu benne' quebe dxéajle̱'e̱ chee̱ Dios, u ca tu benne' dxuchízruje̱' waláz chee̱ benne' zitu' ca'.

¹⁸’Da li dxapa' le'e, da guchéajle lu xe̱zr la xu nigá, naca na da ba nadxéajqueze na xabáa, ne da xesé̱zrele lu xe̱zr la xu nigá naca na da ba nazé̱zrequeze na xabáa.

¹⁹’Cá'anqueze dxapa' le'e, che chúpale le'e gácale tuze ca da nábale Dios, na' Xra' zua xabáa gunne̱' na.

²⁰Naga zaj zra' chúpabe', u chúnnabe' zaj nazrágabe' lu La' neda', na' zúaqueza' neda' laduj le̱be'.

²¹Nadxa Pedro bche̱be̱' Jesús: ―Xran, che bi bícha'dau' gunbe' chia' da cale̱la, ¿bal-la lasa dxun na ba xen gunite lawa' chee̱be'? ¿Gazre lasa?

²²Beche̱be Jesús: ―Dxapa' lue', quegá gazre lasa, san ga xun chi da gazre lasa. Benne' we̱n zrin quebe guca lazre̱' gunite lawe̱' chee̱ le sa' ljwezre̱'

²³Na' gunná Jesús: ―Da gaca naga dxenná bea Dios xabáa naca na ca da guca gate tu benne' dxenná bea guca lazre̱' gucá'ana chawe̱' da dxelal-la benne' we̱n zrin chee̱'.

²⁴Gate guzú lawe̱' dxucá'ana chawe̱' na, na' guleché̱'e̱ lau le̱' tu benne' dxebague̱' chee̱' zane' cue' chi gaxúa dumí.

²⁵Lawe' da quebe de̱ chee̱ benne' we̱n zrin na' da quízruje̱' xrane̱', na' gunná be'e xrane̱' ta'u benne' we̱n zrin na', ne zru'ule̱', ne zrí'ine̱' ca', ne ca nácaqueze da nape̱', chee̱ gazruj da na' dxebague̱'.

²⁶Nadxa bzu zribe benne' we̱n zrin na' lau xrane̱', na' guta' xuene̱' le̱', dxenné̱': “Xran, be̱n zren lazre' neda', na' quízrujqueza' ca naca na.”

²⁷Na' xrane̱' bexache lazre̱' le̱', ne bnite lawe̱' da na' dxebague̱' chee̱', ne bsane̱' le̱'.

²⁸Gate benne' we̱n zrin na' bedxúaje̱', na' bezrague̱' xetú benne' we̱n zrin ljwezre̱', benne' dxebague̱' chee̱' látedau'. Na' gude̱le̱' lba bénnea', ne guzú lawe̱' dxusézxuje̱' chi'i bénnea', dxe̱'e̱ le̱': “Gudizruj neda' da dxal-lu' chia'.”

²⁹Nadxa benne' we̱n zrin ljwezre̱' na' bzu zribe̱' lau le̱', ne guta' xuene̱' le̱', dxenné̱': “Be̱n zren lazre' neda', na' quízrujqueza' ca naca na.”

³⁰Bénnea' quebe guca lazre̱', na' guxíaje̱' xeajlu'e̱ we̱n zrin ljwezre̱' na' lizre xia dxácate̱ quízruje̱' da na' dxebague̱'.

³¹Gate benne' we̱n zrin ca' xezícala guleque bé'ene̱' da nigá, na' belewí'ine lázrele̱'e̱ne̱', na' xjaque̱' xeajlegue̱zre̱' xrane̱' xúgute̱ da ba guca.

³²Nadxa xrane̱' na' gunná bé'ene̱' xeajlenné̱' benne' we̱n zrin na', na' guzre̱' le̱': “Bi we̱n zrin cale̱la. Neda' bnite lawa' chiu' ca naca da na' dxebagu' chia' lawe' da guta' xúenu' neda'.

³³Cá'anqueze lue' dxal-la' xexache lazru' le sa' ljwezru' na' ca be̱na' neda' bexache lazra' lue'.”

³⁴Xrane̱' na' bzrá'ale̱'e̱ bénnea', na' bdee̱' le̱' xel-la' zi' dxácate̱ na' quízruje̱' ca naca da na' dxal-le̱' chee̱'.

³⁵Nadxa gunná Jesús: ―Cá'anqueze gun Xra' zua xabáa chee̱le le'e che quebe gunite laule dute̱ lázrdaule chee̱ le sa' ljwézrele.