Read Tabaa Zapotec San Mateo 22 Bible Online

San Mateo 22 - Tabaa Zapotec bible

San Mateo 22

¹Guzú lau Jesús dxuchálajle̱ne̱' benne' ca' xecha lasa tu da dxulé'e na, dxe̱'e̱ le̱':

²―Ca da gaca xabáa naga dxenná bea Dios naca na ca da guca gate tu benne' wenná bea be̱ne̱' tu laní wechaga na' chee̱ bi biu chee̱'.

³Gusel-le̱' benne' we̱n zrin chee̱' ca' cheajletupe̱' benne' ca'an gunné̱' lizre̱', san benne' ca' quebe gulaca lazre̱' xédajgaque̱'.

⁴Nadxa gusél-ladxe̱' benne' we̱n zrin chee̱' ca', benne' xula. Dxe̱'e̱ le̱': “Le xe̱ benne' ca' gunnía', ba nucueza' xel-la' wagu. Ba gunná be'eda' xelútie̱' be̱zre ca', ne be̱ dxelanne, na' ca naca na bache de̱. Dxal-la' xelelé̱'e̱ nigá naga zra' wechaga na'.”

⁵Benne' ca' gunné̱' quebe gulaca lazre̱' xédajgaque̱'. Tu benne' ca' guxíaje̱' lu xe̱zr la xu chee̱', ne xetú benne' guxíaje̱' we̱te.

⁶Xebal-la benne' ca' gule̱le̱' bi we̱n zrin ca' chee̱ wenná bea na', na' bulucháchale̱ne̱'-be', ne belútete̱'-be'.

⁷Nadxa wenná bea na' bzrá'ale̱'e̱, na' gusel-le̱' benne' chee̱' ca', benne' zjaca wedil-la xeajlegué̱tie̱' benne' we̱te benne' ca', ne xeajlezézxe'te̱' lazre' benne' ca'.

⁸Nadxa guzre̱' bi we̱n zrin chee̱' ca': “Bal-la bi de̱ ba de̱ chee̱ wechaga na', na' benne' ca' gunnía' quebe zaj naca chee̱' xelelé̱'e̱.

⁹Le chjaca neza zri'a ca', ne le nne̱ xúgute̱ benne' lé'ele, chee̱ xelelé̱'e̱ laní chee̱ wechaga na'.”

¹⁰Benne' we̱n zrin ca' xjaque̱' la neza ca', na' xeajletupe̱' xúgute̱ bénneache, benne' belelé'ene̱' zaj naque̱' benne' cale̱la, ne benne' xrlátaje. Ca'an guca guzrate̱ xu'u na' bénneache.

¹¹Nadxa wenná bea na' guxú'e̱ xeajné̱'e̱ benne' ca' gunné̱', na' blé'ene̱' tu benne' dxe'e̱ na', quebe nazi'e̱ zra lane̱' chee̱ laní chee̱ wechaga na'.

¹²Guzre̱' le̱': “Lue', benne', ¿ájazra guca guxú'u nigá, ne quebe nazi'u zra lanu' chee̱ laní wechaga na'?” Bénnea' gudxé'e̱ zrize.

¹³Nadxa wenná bea na' guzre̱' bi zaj zúabe' ga na', “Le guchéaj ni'a ne̱'e̱, ne le guzale̱' chalé'ajla naga naca chul-la, naga cuezre̱', ne xáguxa'ate̱ lazxe̱'.”

¹⁴Benne' zante̱ gunnía', na' bábaze̱' zaj naca chee̱' xelu'e̱ nigá. Ca naca chee̱ dumí da dxuluchízruje̱'

¹⁵Nadxa benne' fariseo ca' besiá'que̱', ne belune̱' tuze dizra' xelebéaje̱' Jesús dizra' chee̱ xelezéquene̱' xelawe̱' zría chee̱'.

¹⁶Nadxa gulesel-le̱' bal-la benne' ca' zaj naque̱' fariseo ca' tuze, ne bal-la benne' ca' zaj de̱'e̱ Herodes, chee̱ zeajlegue̱zre̱' Jesús: ―Benne' wese̱de, nézentu' dxenníu' da li, ne dxusé̱denu' da li da zaj naca chee̱ Dios, ne quebe dxezrebu' bi xelenná bénneache, ne quebe dxenná'u ca da zaj napa bénneache.

¹⁷Gunná xque. ¿Aja dxéquenu' lue'? ¿Dxun na ba xen quízrujdxu da dxuluchizruj benne' ca' nasel-la César, benne' zitu', che cabí?

¹⁸Jesús ba nézene̱' ca da dxelaca lazre̱' xelune̱' chee̱', na' guzre̱' benne' ca': ―Le'e, láweze dxunle da xrlátaje. ¿Bizr chee̱ na' dxuzúale da guzría xi na neda'?

¹⁹Le gulé'e neda' dumí na' da dxízrujle chee̱ wechizruj. Nadxa bulunézruje̱' Le̱' tu dumí chee̱ xe̱zre Roma.

²⁰Gate blé'ene̱' na, na' Jesús bche̱be̱' benne' ca': ―¿Nuzra lau ni, ne le̱' da naxúaj na nigá?

²¹Belexeche̱be̱': ―Chee̱ César na'. Na' guzre Jesús benne' ca': ―Le gunezruj chee̱ César da naca chee̱ César, ne le gunezruj chee̱ Dios da naca chee̱'.

²²Gate belenne̱' da nigá, na' belexebánene̱', ne besiá'que̱' naga zua Jesús. Da buluche̱be̱' Jesús chee̱ benne' xelexebane̱' ládujla benne' gate

²³Zra ná'queze belezrín bal-la benne' saduceo ca' naga zua Jesús. Benne' saduceo ca' dxelenné̱' quebe xelexebán benne' gate. Gulé̱'e̱ Jesús:

²⁴―Benne' wese̱de, Moisés gunné̱' che tu benne' nuchaga ne̱'e̱ gatie̱', ne quebe nu bidu chee̱' chilá', na' bi biche̱' dxal-la' guchaga na'abe' nen nu'ula gute benne' biu chee̱' na' chee̱ sua tu bi chee̱ benne' ba gutie̱'.

²⁵Naga zúantu' gulezrá' gazre benne' gulácabe' zri'ine tuze benne'. Bi nedxu bchaga na'abe', na' gútebe'. Bi gudxupe' bchaga na'abe' nen nu'ula na' gute benne' biu chee̱' lawe' da quebe nu zri'ine bi nedxu na' gúlajbe'.

²⁶Cá'anqueze gúcaqueze na chee̱ bi gudxupe', na' gudé na' chee̱ bi guxunne', na' cá'anqueze guca chee̱ xúgute̱ bi gazre ca'.

²⁷Ca gudé na', na' gute nu'ula na'.

²⁸Gate xelexebán benne' gate, ¿nula bi gazre caní gácabe' benne' chee̱ nu'ula na' lawe' da tu tu bi gazre ca' bchaga na'abe' nen nu'ula na'?

²⁹Jesús beche̱be̱': ―Le'e dxeque zréajele lawe' da quebe núnbeale da naxúaj na lu xiche lá'azxa, ne ca naca xel-la' waca chee̱ Dios.

³⁰Gate zrin zra xelexebán benne' gate, québedxa xuluchaga na' bénneache, ne québedxa xelútie̱' bi nu'ula chee̱ xuluchaga na'abe'. Xelaque̱' ca zaj naca gubáz chee̱ xabáa chee̱ Dios.

³¹Ca naca na che dxal-la' xelexebán benne' gate, ¿quebe ne gulábale le'e ca gunná Dios? Gunné̱':

³²“Neda' naca' Dios chee̱ Abraham, ne Dios chee̱ Isaac, ne Dios chee̱ Jacob.” Dios quebe naque̱' Dios chee̱ benne' gate, san naque̱' Dios chee̱ benne' ban, benne' ca' ba gulatie̱' lu xe̱zr la xu nigá.

³³Gate belenne̱' da nigá, na' belexebane benne' ca' ca naca da dxuse̱de Jesús. Da gunná be'e Dios da naca blau

³⁴Gate benne' fariseo ca' guleque bé'ene̱' ba bzua zri Jesús benne' saduceo ca', na' belezrague̱'.

³⁵Tu benne' ca', benne' naque̱' benne' dxuxuzájle̱'e̱ da nadxixruj bea na, guca lazre̱' guxúe̱' ájala nne̱ Jesús. Bche̱be̱' Le̱':

³⁶―Benne' wese̱de, ¿bizrla da gunná be'e Dios naca blau?

³⁷Beché̱be Jesús: ―Dxal-la' zri'inu' Xranu' Dios dute̱ xichaj lázrda'u, ne dute̱ bénne'du xu'u, ne dute̱ xel-la' dxéajni'i chiu'.

³⁸Da nigá naca da nadxixruj bea da blaudxa, ne da dxundxa na ba xen.

³⁹Da nadxixruj bea da gudxupe' nácaqueze na ca', da dxenná na: Bzri'i le sa' ljwezru' ca nazrí'i cuinu'.

⁴⁰Che tu benne' dxune̱' ca zaj naca chupa da nadxixruj bea caní, dxune̱' ca naca xúgute̱ da nadxixruj bea da bzuaj Moisés, ne ca naca xúgute̱ da buluse̱de benne' ca' buluchálaje̱' waláz chee̱ Dios. ¿Nuzra zri'ine naca Cristo?

⁴¹Dxácate̱ ne zaj nazraga benne' fariseo ca' na',

⁴²Jesús bche̱be̱' le̱': ―¿Ájala dxéquele le'e chee̱ Cristo? ¿Nuzra zri'ine naque̱'? Benne' ca' gulé̱'e̱ Le̱': ―Zri'ine David na'.

⁴³Nadxa guzre Jesús benne' ca': ―¿Ájazra na' David gate bchálaje̱' chee̱ Cristo dxe̱'e̱ Le̱': Xran? Gate gunná David da nigá bchálaje̱' da ble'e Be' Lá'azxa le̱'. Caní naca da na' gunná David:

⁴⁴Xrana' Dios guzre̱' Xrana':“Gudxé'e chalá'a xabe̱la chia'cadxa guzúa' zran ni'u benne' ca' quebe chawe' dxelelé'ene̱' Lue'.”

⁴⁵¿Ájazra naca na naca Cristo zri'ine David, che David ná'queze dxe̱'e̱ Le̱': “Xrana'”?

⁴⁶Quebe nu benne' guca xeché̱bequeze̱' chee̱', na' ze lau zra na' netú québedxa nu bexazre bi guché̱bedxa Le̱'.