Read Tabaa Zapotec San Marcos 11 Bible Online

San Marcos 11 - Tabaa Zapotec bible

San Marcos 11

¹Gate belezrine̱' gáguze naga dxe' xe̱zre Jerusalén, ne zaj xu'e̱ la neza naga zaj dxe' xe̱zre Betfagé, ne xe̱zre Betania zran xi'a chee̱ xaga olivo ca', na' Jesús gusel-le̱' chupa benne' ca' dxusé̱dene̱',

²na' guzre̱' le̱': ―Le chjaca lu xé̱zredau' da dxe' tu chi na', na' gate zrinle na', cheajxrácale tu burro da'ba' xaga, bea na' netú benne' quebe ne cuie̱' le̱ba'. Le se̱zre-ba', ne le che̱'-ba' nigá.

³Che nu benne' nabe̱' le'e bizr chee̱ na' dxesé̱zrele-ba', xé̱gale le̱': “Xránadxu dxechine̱'-ba'”, na' la xesél-la'te̱' le̱ba'.

⁴Nadxa xjaque̱', ne xeajlexraque̱' burro na' da'ba' xaga dxu'a dxa xu'u cuita neza, na' gulesé̱zre̱'-ba'.

⁵Nadxa bal-la benne' zaj zre̱'e̱ na' gulé̱'e̱ le̱': ―¿Bizra' dxunle? ¿Bizr chee̱ na' dxesé̱zrele búrrua'?

⁶Nadxa le̱' gulé̱'e̱ benne' ca' ca ba gunnáqueze Jesús, na' belúe̱' le̱' lataj.

⁷La belexeché̱'e̱te̱' búrrua' lau Jesús, na' buluzríe̱' zra lane̱' cúzruba', na' guzría Jesús le̱ba'.

⁸Benne' zante̱ gulechíluje̱' xicha chee̱', ne xladxe̱' la neza, na' benne' xula gulechugue̱' zina' da gulíxrue̱' la neza.

⁹Na' benne' ca' zaj zrie̱' lawe', ne benne' ca' zjaque̱' bze̱be, gulezú lawe̱' dxelenné̱' zizraj: ―¡Gaca ba! ¡Lá'azxa naca benne' ze̱'e̱, nasel-la Xránadxu Dios Le̱'!

¹⁰¡Lá'azxa naca xel-la dxenná bea da za', xel-la dxenná bea chee̱ xradxu David! ¡Gaca ba Dios!

¹¹Ca'an guca gate na' guxú'u Jesús xe̱zre Jerusalén, na' guxú'e̱ lu xudau'. Ca gudé gunné̱'e̱ xúgute̱ da zaj nnita du cuite̱', na' bezé̱'e̱ zexíaje̱' xe̱zre Betania nen benne' chazrinnu ca' dxusé̱dene̱', lawe' da ba zeaj dxezré'. Jesús dxugu'e̱ de' xaga higo

¹²Gute xu zra xula gate na' gusá'aque̱' xe̱zre Betania, gudún Jesús.

¹³Na' blé'ene̱' zítu'la dxe' tu xaga higo zria na laga', na' xeajnné̱'e̱ che zria da zixre lu xaga na', san quebe bi zria na. Lágaze zria na lawe' da quebe ne zrin zra cuía na da zixre.

¹⁴Nadxa Jesús guzre̱' xaga higo na': ―Cabátadxa nu gagu da zixre chiu'. Benne' ca' dxuse̱de Jesús belénqueze̱' na. Jesús dxexún lbe̱'e̱ lu xudau'

¹⁵Ca gudé na' belexezrine̱' xe̱zre Jerusalén. Ca guxú'u Jesús lu xudau', guzú lawe̱' dxulague̱' lu xudau' benne' zaj zre̱'e̱ we̱te, ne benne' zaj zre̱'e̱ wewa'u na'. Na' bdxixre̱' blaga chee̱ benne' weche̱'e̱ dumí chee̱ benne' zitu', ne bdxixre̱' naga dxelebé' benne' we̱te bgúgudu ca'.

¹⁶Quebe be̱'e̱ lataj nu benne' xudée̱' xua ca' lu xudau'.

¹⁷Nadxa bsé̱dene̱' bénneache ca', dxenné̱': ―Lu xiche lá'azxa dxenná Dios: “Lizra' gaca na tu xu'u naga xuluchálajle̱ Dios benne' zá'aque̱' xúgute̱ xe̱zre.” Le'e ba nunle lizra' ca tu lizre benne' gubán ca'.

¹⁸Na' benne' xíchaje̱ ca' chee̱ bxruze ca', ne benne' dxuluxuzájle̱'e̱ ca da nadxixruj bea Dios belenne̱', na' gulezú lawe̱' dxelexíluje̱' ájala gaca xelútete̱' Jesús lawe' da dxelezrebe̱' Le̱'. Ca'an guca lawe' da dxelexebane xúgute̱ bénneache ca naca da dxuse̱de Jesús le̱'.

¹⁹Ca gula chizrela, Jesús bezé̱'e̱ lu xe̱zre. Dxebizre xaga higo

²⁰Ca gula zra xula che zílala, na' Jesús, ne benne' ca' dxusé̱dene̱' belexedée̱' na', na' belelé'ene̱' xaga higo na', ba nabizre na dute̱ lue na.

²¹Nadxa xeajsá lazre Pedro, na' guzre̱' Jesús: ―Benne' wese̱de, gunná'xque xaga higo nigá da gulú'u na de'. Bache gubizre na.

²²Jesús gunné̱': ―Le cheajlí lazre Dios.

²³Da li dxapa' le'e, che nútete̱zele nnale, xe̱le xi'a nigá: “Cuasa lue' nigá, xeajchú'u lu nísadau'”, ne che quebe dxun chupa lázrele, na' chéajle̱le waca da ba gunnale, na' gácaqueze na.

²⁴Chee̱ le̱ na' dxapa' le'e, xúgute̱ da nábale Dios gate dxuchálajle̱le Le̱', che chéajle̱le ba guzile na, ca'an gácaqueze.

²⁵Gate na' dxuchálajle̱le Dios, che dxezrá'ale nu benne', le gunite lau chee̱ bénnea' chee̱ cá'anqueze Xrale zue̱' xabáa gunite lawe̱' dul-la da nabágale.

²⁶Che quebe gunite laule chee̱ bénnea', Xrale zue̱' xabáa quebe gunite lawe̱' dul-la da nabágale. Ca naca xel-la dxenná bea da napa Jesús

²⁷Nadxa belexezrine̱' xe̱zre Jerusalén, na' ca dxedá Jesús le̱'aj xudau', na' gulebiga lau Le̱' benne' xíchaje̱ ca' chee̱ bxruze ca', ne benne' dxuluxuzájle̱'e̱ da nadxixruj bea Dios, ne benne' gula ca'.

²⁸Na' benne' caní gulenábene̱' Jesús: ―¿Bizra xel-la dxenná bea napu' dxunu' da caní? ¿Nuzra be̱nna lue' xel-la dxenná bea nigá?

²⁹Na' beche̱be Jesús: ―Cá'anqueze neda' de̱ tu da nábeda' le'e. Che xeché̱bele chia', nadxa xapa' le'e ca naca xel-la dxenná bea da napa' dxuna' da caní.

³⁰¿Nuzra gusel-la Juan bchue̱' bénneache nisa? ¿Dios che bénneache? Le xeche̱be na'a.

³¹Nadxa gulezú lau benne' ca' dxuluchálaje̱' le̱ze̱', dxelé̱ ljwezre̱': ―Che xe̱dxu Le̱', Dios gusel-le̱' le̱', na' nnáqueze̱': “¿Bizr chee̱ na' quebe guxéajle̱le chee̱'?”

³²Che nnadxu bénneache gulesel-le̱' le̱', dxal-la' zrébedxu da xelún benne' xe̱zre ca'. Caní gulenné̱' lawe' da xúgute̱ benne' xe̱zre nigá dxeléajle̱'e̱ guca Juan benne' bchálaje̱' waláz chee̱ Dios.

³³Ca'an guca, gulenná benne' ca', dxelé̱'e̱ Jesús: ―Quebe nézentu'. Nadxa gunná Jesús, dxe̱'e̱ le̱': ―Cá'anqueze neda' quebe nnia' ca naca xel-la dxenná bea da napa' dxuna' da caní.