Read Tabaa Zapotec San Marcos 14 Bible Online

San Marcos 14 - Tabaa Zapotec bible

San Marcos 14

¹Xechupa zra za zrin chee̱ xelune̱' laní chee̱ xulusá lazre̱' ca naca da be̱n Dios gate na' bebéaje̱' benne' Israel ca' lu xe̱zr la xu Egipto, laní na' dxelawe̱' xeta xtila da quebe nachixre cua zichaj chee̱ na. Na' benne' xíchaje̱ ca' chee̱ bxruze ca', ne benne' dxuluxuzájle̱'e̱ da nadxixruj bea Dios belilaj lazre̱' ájala xelune̱' chee̱ xele̱l-le̱' Jesús bagácheze chee̱ xelútie̱' Le̱'.

²Na' gulenné̱': ―Quegá gundxu na lu laní, chee̱ quebe dxe'ena zraga bénneache. Tu nu'ula dxegüé̱'e̱ da za xichaj Jesús

³Zua Jesús lu xe̱zre Betania, lu lizre tu benne' le̱' Simón, benne' guzríe̱' we̱' guzru'. Dxácate̱ zaj dxe'e̱ dxelawe̱' na', na' bzrin tu nu'ula nu'e̱ tu da dau' da naca na xiaj xrtan da nazí le na alabastro, ne nazrate̱ na da za da dxelá zixre chee̱ xiaj nardo, da zácale̱'e̱ na. Na' gulé̱'e̱ da dau' na', ne blálaje̱' da za na' xichaj Jesús.

⁴Bal-la benne' ca', benne' zaj zre̱'e̱ na', belezré̱'e̱, na' gulenné̱', dxelé̱ ljwezre̱': ―¿Bizr chee̱ na' be̱n ditaj nu'ula nigá da za na'?

⁵Waca ta'u da na' chee̱ sídxadxu ca lázrujdxu chee̱ tu iza, chee̱ gácale̱dxu benne' xache' ca'. Na' guledil-le̱' nu'ula'.

⁶Na' Jesús guzre̱' le̱': ―Quebe xe̱le nu'ula nigá ca'. ¿Bizr chee̱ na' dxunle le̱' ze̱de? Ca naca da be̱n nu'ula nigá chia' neda' naca na da cháwele̱'e̱.

⁷Benne' xache' ca' tu zrázqueze̱' ládujla le'e. Waca gunle benne' ca' chawe' gate dxaca lázrele, san neda' quegá tu súale̱za' le'e.

⁸Nu'ula nigá be̱ne̱' ca da guzéquene̱', gulu'e̱ da za be̱l-la' dxen chia' nédxula chee̱ zra gate gachia' lu xe̱dxu ba.

⁹Da li dxapa' le'e, gátete̱ze na' gaca lban chee̱ dizra' chawe' chia' lu xúgute̱ xe̱zre zaj nnita xe̱zr la xu nigá, cá'anqueze zrálajqueze ca naca da be̱n nu'ula nigá, chee̱ xulusá lazre̱' chee̱'. Judas dxexegá'ane̱' dizra' gudée̱' Jesús lu na' benne' ca' dxeledábague̱' Le̱'

¹⁰Nadxa Judas Iscariote, tu benne' chazrinnu ca' dxuse̱de Jesús, guxíaje̱' xeajchálajle̱ne̱' benne' xíchaje̱ ca' chee̱ bxruze ca' chee̱ xelexegá'ane̱' dizra' ájala gune̱' gudée̱' Jesús lu na' benne' ca'.

¹¹Ca belén benne' ca' ca gunná Judas, gulebéle̱'e̱ne̱', na' guleche̱be lazre̱' xulunézruje̱' le̱' dumí. Nadxa Judas guzú lawe̱' dxexílaje̱' ájala gudée̱' Jesús lu na' benne' ca'. Da dxágudxu chee̱ gusá lázredxu ca gute Jesús

¹²Zra nedxu chee̱ laní gate dxelawe̱' xeta xtila da quebe nachixre cua zichaj chee̱ na, ne dxelutie̱' zríla'dau' chee̱ Laní Pascua, gate na' dxulusá lazre̱' ca guca gate bebéaj Dios benne' Israel ca' lu xe̱zr la xu Egipto, na' benne' ca' dxuse̱de Jesús buluche̱be̱' Le̱': ―¿Gazra dxaca lazru' chéajntu' cheajcuézentu' da gágudxu Laní Pascua?

¹³Nadxa Jesús gusel-le̱' chupa benne' ca' dxusé̱dene̱'. Dxe̱'e̱ le̱': ―Le chjaca lu xe̱zre Jerusalén, na' cheajxrácale tu benne' biu ze nu'e̱ tu dxe'e nisa. Le chjácale̱ne̱',

¹⁴na' naga xexu'e̱, xe̱le benne' xrane xu'u na': “Benne' Wese̱de chee̱dxu dxenné̱': ¿Gazra zua xu'u naga guna' Laní Pascua, chee̱ gawa' tu zren nen benne' ca' dxusé̱deda'?”

¹⁵Nadxa gulé'ene̱' le'e tu xu'u zren da naca na gudxupe' cuía sibe da bache nabeza na. Na' gucuézale da gágudxu.

¹⁶Nadxa benne' ca' dxusé̱dene̱' belexedxúaje̱' gusá'aque̱', na' belezrine̱' xe̱zre Jerusalén. Na' guca xúgute̱ ca da ba guzre Jesús le̱', na' bulucueze̱' da xelawe̱' lu Laní Pascua.

¹⁷Ca gula chizrela, na' bzrin Jesús nen benne' chazrinnu ca' dxusé̱dene̱'.

¹⁸Na' ca zaj dxe'e̱ dxelawe̱', na' gunná Jesús, dxe̱'e̱ le̱': ―Da li dxapa' le'e, tu benne' ládujla le'e, benne' dxawe̱' tu zren nen neda', gudée̱' neda' lu na' benne' ca' dxeledábague̱' neda'.

¹⁹Nadxa benne' ca' gulezúa xácheze̱', ne gulezú lawe̱' dxuluche̱be̱' Jesús tu tue̱': ―¿Neda' xca'? Na' xetúe̱' cá'anqueze guzre̱' Le̱': ―¿Neda' xca'?

²⁰Nadxa beche̱be Jesús, dxe̱'e̱ le̱': ―Tu benne' ládujla le'e chazrínnule, benne' dxawe̱' tu zren nen neda' lu xé'ena nigá.

²¹Da li gatia' neda', Benne' Gulje̱' Bénneache, ca da naxúaj na chia' lu xiche chee̱ Dios. Baxache' naca chee̱ benne' na' gudée̱' neda' lu na' benne' ca' dxeledábague̱' neda'. Cháwedxa gaca chee̱ bénnea' la ca gúlaje̱'.

²²Dxácate̱ zaj zre̱'e̱ dxelawe̱', na' gucá'a Jesús xeta xtila, ne guzre̱' Dios: “Xcalenu'.” Ca gudé bzúzruje̱' na, na' bnézruje̱' na chee̱ benne' ca', ne guzre̱' le̱': ―Le gagu na. Da nigá dxulé'e na ca gaca chee̱ be̱l-la' dxen chia'.

²³Nadxa guqué̱'e̱ tu da dxé'ajdxu, ne ca gudé guzre̱' Dios: “Xcalenu'”, na' bnézruje̱' na benne' ca', na' xúgute̱' gulé'aje̱' late' weaj da na'.

²⁴Nadxa Jesús guzre̱' le̱': ―Da nigá zéaje̱ na dxen chia' da dxucá'ana chawe na xel-la wezría cube. Dxen chia' nigá lalaj na ne̱ chee̱ benne' zan.

²⁵Da li dxapa' le'e, québedxa xí'aja' xrise uva caní ca zrindxa zra gate na' xí'aja' da cube naga dxenná bea Dios xabáa. Dxulé'e Jesús nna Pedro quebe núnbe̱'e̱ Jesús

²⁶Ca gudé belul-le̱' da gaca ba Dios, na' belegüene̱' lu Xi'a Xaga Olivo Ca'.

²⁷Nadxa gunná Jesús, dxe̱'e̱ le̱': ―Xúgute̱le le'e gusán lázrele neda' na'a xe̱la lawe' da naxúaj na lu xiche chee̱ Dios, dxenné̱': “Gutia' benne' dxuxúe̱' zrila' ca', na' zrila' ca' welase dínnajba'.”

²⁸Gate te xebana' lu xe̱dxu ba, wexá'a neda' nédxula ca le'e naga nababa Galilea.

²⁹Nadxa Pedro guzre̱' Jesús: ―Láqueze xúgute̱ benne' caní xulusán lazre̱' Lue', neda' québequeze guna' ca'.

³⁰Jesús guzre̱' le̱': ―Da li dxapa' lue', lu xe̱la nigaze, nédxula ca za cuezre xjeaj chupa lasa, nnau' chunna lasa quebe núnbe'u neda'.

³¹Na' dxennáqueze Pedro na', gunné̱': ―Láqueze gatia' tu zren nen Lue', québequeze nnia' quebe núnbe'a Lue'. Cá'anqueze gulenná xúgute̱'. Jesús dxuchálajle̱ne̱' Dios tu lataj nazí le na Getsemaní

³²Nadxa belezrine̱' tu lataj naga nazí le na Getsemaní, na' gunná Jesús, dxe̱'e̱ benne' ca' dxusé̱dene̱': ―Le cueza nigá dxácate̱ cha'a cheajchálajle̱na' Dios.

³³Nadxa Jesús guché̱'e̱ Pedro, ne Jacobo, ne Juan, na' guzú lau dxezúa xáche'le̱'e̱.

³⁴Na' dxe̱'e̱ benne' ca', dxenné̱': ―Ba dxunte̱ na watia' lawe' da zua xáche'le̱'a. Le xegá'ana le'e nigá, ne le sua ban lazre'.

³⁵Nadxa Jesús guzé̱'e̱ zéaje̱' xelate' ca na'la, na' guzúe̱' sudxú'ala, gunabe̱' Dios che gaca, quebe tée̱' xel-la zi' ca da dxal-la' saque̱' lu zra na'.

³⁶Ca dxuchálajle̱ne̱' Dios na', gunné̱': ―Xrae, xúgute̱ wazéquenu' Lue'. Bselá neda' chee̱ quebe saca zi'a lu da caní. Quebe gaca ca dxaca lázreza' neda', san ca dxaca lazru' Lue' gaca na.

³⁷Nadxa bezrine̱' naga zaj zra' benne' ca'an dxusé̱dene̱', ne xeajxraque̱' le̱' dxelásie̱'. Na' Jesús guzre' Pedro: ―Simón, ¿dxásequezu' nigá? ¿Quebe guzéquenu' gusebán lazru' tu chí'idau'ze?

³⁸Le sua ban lazre', ne le guchálajle̱ Dios chee̱ quebe gun zréaje da xriwe̱' le'e. Da li, lu xichaj lázrdaule dxaca lázrele gunle da xrlátaje, san lu be̱la' dxen chee̱le dxate ni'a na'le.

³⁹Nadxa Jesús guxíaje̱' da xula zeajchálajle̱ne̱' Dios, na' tuze ca dxenné̱'.

⁴⁰Nadxa ca bezrine̱', xecha lasa xeajxraque̱' benne' ca'an dxusé̱dene̱', dxelásie̱' lawe' da xu'u bchigala xiaj lawe̱'. Benne' caní quebe belexezrela lazre̱' bi xelé̱'e̱ Le̱'.

⁴¹Na' ca bezrín Jesús da guxunne' lasa, na' guzre̱' benne' ca': ―¡Le gase na'a, ne le xezí' lázre'! ¡Bache na! ¡Ba bzrin zra tea' neda', Benne' Gulje̱' Bénneache, lu na' benne' dul-la ca'!

⁴²¡Le chasa! ¡Le chu'u na'a! ¡Ba za benne' gudée̱' neda' lu na' benne' ca' dxeledábague̱' neda'! Dxele̱l-le̱' Jesús

⁴³Dxácate̱ dxuchalaj Jesús caní, na' bzrin Judas, tu benne' nabábale̱ne̱' benne' chazrinnu ca' dxuse̱de Jesús, na' zjácale̱ benne' zan le̱', zaj nu'e̱ xia nalá, ne xaga ca'. Zaj naque̱' benne' gulesel-la benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea Dios, ne benne' gula sina ca'.

⁴⁴Judas, benne' dxudée̱' Jesús lu na' benne' ca' dxeledábague̱' Le̱', ba blé'ene̱' benne' ca' tu da gune̱' da gaca bea na nule̱' naca Jesús, gunné̱': ―Bénnea' gunupa', benne' na' qué̱l-lale. Le xeché̱'e̱, ne le guxúe xanne' chee̱ quebe xelé̱'.

⁴⁵Na' ca bzrine̱' na', gubigue̱' lau Jesús, ne dxe̱'e̱ Le̱': ―Benne' Wese̱de. Na' bnupe̱' Le̱'.

⁴⁶Nadxa benne' ca' gule̱l-le̱' Jesús, ne belexeché̱'e̱ Le̱' ba nadxéaje̱'.

⁴⁷Tu benne' dxune̱' Jesús tu zren guléaje̱' xia nalá chee̱', na' guchugue̱' naga tu bi we̱n zrin chee̱ bxruze blau.

⁴⁸Nadxa Jesús guzre̱' benne' ca': ―¿Bdxuajle le'e zale nen xia nalá, ne xaga ca' chee̱ qué̱l-lale neda', dxugúnele neda' ca tu benne' gubán?

⁴⁹Xúgute̱ zra guzúa' neda' ládujla le'e dxusé̱deda' le'e lu xudau', na' cabata' gudé̱l-lale neda'. Da nigá dxaca na chee̱ gaca li ca da naxúaj na lu xiche chee̱ Dios.

⁵⁰Nadxa xúgute̱ benne' ca' dxuse̱de Jesús bulusán lazre̱' Le̱'. Buluzrúnnuje̱'. Dxuzrunnuj tu bi cuide'

⁵¹Tu bi cuide', bi zéajle̱be' Jesús, ne nácube' tu ladxe' laga, gule̱l-la benne' ca' le̱be'.

⁵²Na' bsanbe' ladxe' laga da nácube', na' bzrúnnujbe' gala xídezebe'. Dxezrín Jesús lau benne' ca' chee̱ xu'u lawe' blau chee̱ judío ca'

⁵³Nadxa beleché̱'e̱ Jesús lau bxruze blau, na' belezraga xúgute̱ benne' xíchaje̱ ca' chee̱ bxruze ca' ga na', ne benne' gula sina ca', ne benne' ca' dxuluxuzájle̱'e̱ da nadxixruj bea Dios.

⁵⁴Pedro nawe̱' Jesús zítu'la, na' bzrine̱' chale'aj chee̱ lizre bxruze blau, naga begá'ane̱' tu zren nen zruza ni'a na' benne' xu'u lawe' ca', dxuluxuché̱'e̱ dxu'a xi'.

⁵⁵Na' bxruze blau, ne xúgute̱ benne' chee̱ xu'u lawe' blau chee̱ judío ca' gulíl-laje̱' tu da gagu na zria Jesús chee̱ xelezéquene̱' xuluzría xi'e̱ Le̱' chee̱ gatie̱', na' quebe bi belezrélene̱'.

⁵⁶Benne' zante̱ belún lazre̱' chee̱ Jesús. Quebe bedxúaj dizra' chee̱' tuze ca dxelenné̱' tue̱' ne xetúe̱'.

⁵⁷Bal-le̱' belase̱', na' gulagu zría Jesús da we̱n lazre', dxelenné̱':

⁵⁸―Netu' ba bénnentu' chee̱', gunné̱': “Neda' guchínnaja' xudau' nigá da belún bénneache, na' ca gaca chunna zra xechisa' xetú xudau' da quebe xelún bénneache.”

⁵⁹Cá'anqueze quebe butil-le ca da dxelenné̱'.

⁶⁰Nadxa bxruze blau guxase̱' ládujla xúgute̱ benne' ca', na' bche̱be̱' Jesús: ―¿Québequeze bi dizra' dxuxuzri'u Lue'? ¿Bizra da nigá dxelenné̱' chiu' Lue'?

⁶¹Jesús guzúe̱' zrize, ne gútuqueze bi dizra' buzri'e̱. Na' bxruze blau bche̱be̱' Le̱' xecha lasa, dxenné̱': ―¿Nacu' Lue' Cristo, Zri'ine Dios Lá'azxa?

⁶²Na' gunná Jesús, dxe̱'e̱ le̱': ―Awe', ca' naca'. Walé'ele neda', Benne' Gulje̱' Bénneache, dxe'a chalá'a xabe̱la chee̱ Dios, nape̱' dute̱ xel-la waca. Walé'ele neda' zezá'a lu beuj bza.

⁶³Nadxa bxruze blau gucheze̱' zra lane̱', na' gunné̱': ―¿Núzradxa nachínedxu benne' xelagu zria Le̱'?

⁶⁴Le'e bache bénquezle ca dxenné̱' schanni' chee̱ Dios. ¿Bi dxennale le'e xca'? Xúgute̱ benne' ca' gulenné̱': ―Nabía xi'e̱ dxal-la gatie̱'.

⁶⁵Nadxa bal-la benne' ca' gulezú lawe̱' dxuluzré̱'e̱ Le̱' zrene̱', na' bulucache̱' lau Jesús, ne buluzálaje̱' Le̱'. Dxelenné̱': ―Gunné̱ xa'a nuzra dxue Lue'. Na' benne' zruza ni'a na' benne' xu'u lawe' belú'e̱ lau Jesús. Dxenná Pedro quebe núnbe'e̱ Jesús

⁶⁶Pedro guzúe̱' lu chale'aj zrila, na' bzrin tu nu'ula we̱n zrin chee̱ bxruze blau,

⁶⁷na' ca ble'ebe' Pedro dxe'e̱ dxu'a xi' dxuxuché'e̱, na' gunná'abe' le̱', ne gúzrebe' le̱': ―Lue' dxedále̱quezu' Jesús, benne' Nazaret na'.

⁶⁸Na' beche̱be Pedro, dxenné̱': ―Quebe núnbe'a bénnea', ne quebe nezda' nu chee̱ na' dxuchálaju'. Na' bedxúaj Pedro chale'aj naga dxelu'e̱. Nadxa gudxezre xjeaj.

⁶⁹Nadxa nu'ula we̱n zrin chee̱ bxruze blau na' gunná'abe' Pedro xecha lasa, na' gunabe', dxe̱'e̱be' benne' ca' zaj zre̱'e̱ na': ―Benne' nigá naque̱' tuze benne' ca'an.

⁷⁰Pedro xecha lasa bzue̱' Jesús chalá'ala. Xetú chí'idau' benne' ca' zaj zre̱'e̱ na' gulé̱'e̱ Pedro xecha lasa: ―Da líqueze lue' nacu' tuze benne' ca'an lawe' da nacu' benne' chee̱ xe̱zre ca' zaj nababa Galilea. Ca dxuchálaju' naca bea na da na'.

⁷¹Nadxa Pedro guzú lawe̱' dxuzría xi' cuine̱', ne be̱n chúchue̱' xrtizre̱', gunné̱': ―Quebe núnbe'a bénnea' dxennale le'e ca'.

⁷²Ca'an guca, gudxezre xjeaj da gudxupe' lasa. Nadxa Pedro xeajsá lazre̱' ca da guzre Jesús le̱', gunné̱': “Nédxudxa ca za cuezre xjeaj chupa lasa, lue' nnau' chunna lasa quebe núnbe'u neda'.” Na' ca xeajsá lazre̱' da nigá, gudxézrele̱'e̱.