Read Tabaa Zapotec San Marcos 15 Bible Online

San Marcos 15 - Tabaa Zapotec bible

San Marcos 15

¹Ca guxaní' che zila, na' benne' xíchaje̱ ca' chee̱ bxruze ca' belexedupe̱' nen benne' gula sina ca', ne benne' ca' dxuluxuzájle̱'e̱ da nadxixruj bea Dios, ne xúgute̱ benne' chee̱ xu'u lawe' blau chee̱ judío ca'. Guleché̱'e̱ Jesús nadxéaje̱', na' buludée̱' Le̱' lu na' Pilato.

²Pilato gunábene̱' Jesús: ―¿Nacu' Lue' wenná bea chee̱ judío ca'? Na' beche̱be Jesús: ―Ca' naca na, ca ba gunnáu' lue'.

³Na' benne' xíchaje̱ ca' chee̱ bxruze ca' gulawe̱' zria Jesús da zante̱.

⁴Nadxa Pilato gunábene̱' Jesús xecha lasa: ―¿Quebe bi dizra' dxuzri'u? Gunná'xque ca da zánete̱ da dxelawe̱' zria Lue'.

⁵Jesús quebe bi dizra' ca buzri'e̱. Ca' guca, bebánele̱'e̱ Pilato. Dxelichaj be'e̱ gate Jesús

⁶Pilato zua tu da dxúnqueze̱' tu iza tu iza gate dxaca Laní Pascua. Dxusane̱' tu benne' xu'e̱ lizre xia, nútete̱ze benne' xelenaba bénneache ca' le̱'.

⁷Lu xu'u lizre xia na' xu'u tu benne' le̱' Barrabás, benne' nune̱' tu zren benne' ca' belutie̱' benne' ca', gate na' gudíl-lale̱ne̱' benne' Roma ca'.

⁸Na' belezrín lau Pilato benne' xe̱zre ca', ne gulezú lawe̱' dxelenabe̱' lau Pilato gune̱' ca dxúnqueze̱'.

⁹Na' beche̱be Pilato: ―¿Dxaca lázrele le'e gusana' bénnea' naque̱' wenná bea chee̱ judío ca'?

¹⁰Caní gunná Pilato lawe' da dxeque be'ene̱' buludée̱' benne' xíchaje̱ ca' chee̱ bxruze ca' Jesús lu ne̱'e̱ lawe' da dxelaque̱' zre'e lazre' Le̱'.

¹¹Na' benne' xíchaje̱ ca' chee̱ bxruze ca' beleché̱'e̱ benne' xe̱zre ca', ne gulegú'u xel-le̱' le̱' chee̱ xelexenabe̱' lau Pilato gusane̱' Barrabás.

¹²Nadxa Pilato gunábene̱' benne' ca': ―¿Bi dxaca lázrele le'e guna' chee̱ bénnea' naque̱' wenná bea chee̱ judío ca'?

¹³Nadxa belexeche̱be̱', gulenné̱' zizraj: ―Bde̱'e̱ xaga béguaj.

¹⁴Na' Pilato bche̱be̱' benne' ca': ―¿Bizra da cale̱la nun benne? Xecha lasa gulenné̱' zizraj: ―Bde̱'e̱ xaga béguaj.

¹⁵Nadxa Pilato bsane̱' Barrabás lawe' da dxaca lazre̱' xegá'ane̱' chawe' nen benne' xe̱zre ca'. Na' ca gudé na' bsebague̱' benne' ca' xeline̱' Jesús tu xide, na' bdee̱' Le̱' lu na' benne' ca' chee̱ xuludé̱'e̱ Le̱' xaga béguaj.

¹⁶Nadxa benne' dxjaque̱' wedil-la guleché̱'e̱ Jesús lu chale'aj xu'u lawe', na' bulutupe̱' xúgute̱ ljwezre' benne' dxjaque̱' wedil-la lataj na'.

¹⁷Na' bulugácue̱' Jesús tu ladxe' bzawe, ne buluzríe̱' xíchaje̱' tu da zaj nune̱' nen zruze xaga xeche'.

¹⁸Nadxa gulezú lawe̱' dxelenné̱' zizraj: ―¡Gaca ba wenná bea chee̱ judío ca'!

¹⁹Na' belú'e̱ xichaj Jesús nen tu xia xtila, ne buluzré̱'e̱ Le̱' zrene̱'. Na' buluzú zribe̱' lawe̱', dxelape̱' Le̱' ba lá'ana.

²⁰Ca gudé bulucá'ana dítaje̱' Le̱' caní, na' belexegu'e̱ ladxe' bzawe, na' buluxugácue̱' Le̱' zra lá'anaqueze̱'. Nadxa belexebéaje̱' Le̱' chee̱ chjaque̱' naga xuludé̱'e̱ Le̱' xaga béguaj. Dxuludé̱'e̱ Jesús xaga béguaj

²¹Tu benne' chee̱ xe̱zre Cirene le̱' Simón, xra Alejandro, ne Rufo, zezé̱'e̱ le̱'e̱ xixre', na' ca bedée̱' na', na' bulusebague̱' le̱' gu'e̱ xaga béguaj chee̱ Jesús.

²²Guleché̱'e̱ Jesús tu lataj nazí le na Gólgota, da zéaje̱ na “Lataj Chee̱ Zrita Xichaj Benne' Gate.”

²³Nadxa bulunézruje̱' Jesús xrise uva wal-la da nachixre da sla' chee̱ mirra. Jesús quebe gu'e̱ na.

²⁴Nadxa buludé̱'e̱ Le̱' xaga béguaj, na' benne' dxjaque̱' wedil-la gulebéaje̱' da gulé'e na nule̱' xelexale̱' zra lana Jesús, na' bila xelexúa tu tue̱'.

²⁵Guca che zílala gate na' buludé̱'e̱ Jesús xaga béguaj.

²⁶Buludé̱'e̱ da naxúaj xichaj xaga béguaj chee̱ Jesús da dxulé'e na da nabague̱', da naxúaj na caní: “Wenná Bea Chee̱ Judío Ca'.”

²⁷Cuita Jesús buludé̱'e̱ le̱'e xaga béguaj ca' chupa benne' gubán, tue̱' chalá'a xabe̱la chee̱', ne xetúe̱' chalá'a xéglala chee̱'.

²⁸Ca'an guca, guca li ca da naxúaj na lu xiche chee̱ Dios naga dxenné̱' caní: “Buluzue̱' Le̱' tu zren nen benne' we̱n da zrinnaj ca'.”

²⁹Na' benne' dxeledée̱' na' gulenné̱' schanni' chee̱ Jesús, ne buluté̱' xíchaje̱', dxelenné̱': ―Awe'. Guchínnaju' Lue' xudau' chee̱ntu', na' gate gaca chunna zra, na' xechisu' na.

³⁰Bselá cuinu' na'a, ne bexetaj le̱'e xaga béguaj na'.

³¹Cá'anqueze belún benne' xíchaje̱ ca' chee̱ bxruze ca', ne benne' dxuluxuzájle̱'e̱ da nadxixruj bea Dios. Belún le̱' chee̱ Jesús, dxelé̱' ljwezre̱': ―Benne' xula bselá benne, san Le̱' québequeze dxezéquene̱' guselá cuine̱'.

³²Lue', Cristo, wenná bea chee̱ benne' Israel, bexetaj le̱'e̱ xaga béguaj na' chee̱ le'entu', na' chéajle̱ntu' chiu'. Cá'anqueze belún benne' ca' zaj de̱'e̱ le̱'e xaga béguaj ca' tu zren nen Jesús, gulenné̱' schanni' chee̱'. Dxate Jesús

³³Ca bzrin wagubizra, na' guchul-la dute̱ lu xe̱zr la xu nigá tu chi'i wal-la gula.

³⁴Ca gudé na', na' gunná Jesús zizraj: ―Eloi, Eloi, ¿lama sabactani? Da nigá zéaje̱ na: “Dios chia', Dios chia', ¿bizr chee̱ na' nusanu' neda'?”

³⁵Bal-la benne' ca' zaj zre̱'e̱ na' belenne̱' na, na' gulenné̱': ―Le xene. Dxenné̱' Elías, bénnea' bchálaje̱' waláz chee̱ Dios.

³⁶Nadxa tu benne' guzá chégüe̱', na' xeajlá'awaje̱' lu xrise uva zichaj tu da dxezrupe na nisa, na' bzue̱' na lawe' tu xia xtila da bcuene̱' dxu'a Jesús chee̱ xi'aje̱', na' gunná benne' nigá: ―Cuézadxu. Guxúexquedxu che wida Elías chee̱ xulétaje̱' Le̱'.

³⁷Nadxa Jesús gudxezre xe̱'e̱, na' gútete̱'.

³⁸Ca ná'queze gudxeza ladxe' da ze̱ lu xudau', guca na chúpala. Gucá'a na dxa'la, bedxúajte̱ na zri'la.

³⁹Na' benne' dxenná be'e̱ lu wedil-la, benne' ze̱' lau Jesús, gate na' blé'ene̱' ca gudxezre xe̱'e̱, ne ca guca gútete̱', na' gunné̱': ―Da líqueze benne' nigá guque̱' Zri'ine Dios.

⁴⁰Cá'anqueze zaj ze̱ na' bal-la nu'ula dxelenné̱'e̱ zítu'la. Ládujla nu'ula caní zaj ze̱ María Magdalena, ne Salomé, ne María, xrna Jacobo cuide' ne José.

⁴¹Nu'ula caní gusá'acale̱ne̱' Jesús, ne gulácale̱ne̱' Le̱' gate na' gudé̱' naga nababa Galilea. Cá'anqueze zaj ze̱ na' zánedxa nu'ula xula, nu'ula ca' belezrine̱' Jerusalén tu zren nen Jesús. Dxulucache̱' Jesús lu xe̱dxu ba

⁴²Ca za chizrela bzrin José, benne' Arimatea ga na'. Benne' nigá naque̱' benne' blau ládujla benne' ca' chee̱ xu'u lawe' blau chee̱ judío ca'. Cá'anqueze le̱' dxebeze̱' zra la' Dios chee̱ nna be'e̱. Lawe' da naca zra dxulucueze̱', zra nedxu chee̱ zra dxulupá'ane̱', du lazre̱' guxú'e̱ lau Pilato, na' gunabe̱' si'e̱ lataj xexu'e̱ Jesús.

⁴³

⁴⁴Bebánele̱'e̱ Pilato ca bénnene̱' ba gute Jesús, na' gunné̱' benne' dxenná be'e̱ lu wedil-la na' chee̱ gunabe̱' che ba guca ca'.

⁴⁵Gate bénnea' dxenná be'e̱ lu wedil-la gunné̱' ca'an guca, nadxa Pilato bnézruje̱' José lataj bexu'e̱ Jesús.

⁴⁶Nadxa José guzi'e̱ tu ladxe' xtila laga, na' bulétaje̱' Jesús, ne bulazre̱' Le̱' ladxe' xtila na'. Na' gúxrue̱' Jesús tu lu ba da ba gude̱ne̱' le̱'e̱ xiaj xre, na' bsézxuje̱' ba na' nen tu xiaj zren.

⁴⁷María Magdalena, ne María, xrna José belelé'equezne̱' naga bulucache̱' Jesús.