Read Tabaa Zapotec San Marcos 2 Bible Online

San Marcos 2 - Tabaa Zapotec bible

San Marcos 2

¹Ca gudé chupa chunna zra, na' guxú'u Jesús xecha lasa lu xe̱zre Capernaum. Belénne bénneache zua Jesús tu lu xu'u.

²La belezrágate̱ benne' zante̱ naga zua Jesús. Ca'an guca, québedxa guque lu xu'u, ne dxa xu'u. Bchalaj Jesús xrtizra Dios.

³Na' belezrín tapa benne' lu xu'u naga zua Jesús, zaj nu'e̱ tu benne' quebe gaca se̱'e̱.

⁴Lawe' da quebe gulezéquene̱' xelezrine̱' lau Jesús, lawe' da zaj zra' bénneache zante̱ ga na', na' gulesáluje̱' chju'u chee̱ xu'u naga zua Jesús. Na' bululétaje̱' da'a da zrua benne' na' quebe gaca se̱'e̱.

⁵Lawe' da dxeque be'e Jesús ca dxeleajlí lazre' benne' ca' Le̱', na' gunné̱', dxe̱'e̱ bénnea' quebe gaca se̱'e̱: ―Zrí'ina'dau', ba nanite lau dul-la da nabagu'.

⁶Zaj dxe'e bal-la benne' ga na', benne' dxuluxuzájle̱'e̱ da nadxixruj bea Dios, na' gulenné̱ lanze̱':

⁷―¿Bizr chee̱ na' dxuchalaj caní benne' nigá? Dxucá'ana dítaje̱' Xránadxu Dios. ¿Núzraqueze gaca gunite lau dul-la da zaj nabaga bénneache? Tuze Dios na'.

⁸Dxeque be'e Jesús lu lázrdawe̱' ca dxelenné̱ lane̱' chee̱', na' gunné̱': ―¿Bizr chee̱ na' dxéquele caní?

⁹¿Bizra dizra' quebe naca na sté̱bela xapa' benne' nigá quebe gaca se̱'e̱? ¿Naca na ste̱be xapa' le̱', ba nanite lau dul-la nabagu'? Cabí. ¿U che ste̱be xapa' le̱', bexasa, becá'a da denu', ne bexíaj?

¹⁰Na'a, chee̱ nézele le'e neda', Benne' Gulje̱' Bénneache, napa' xel-la dxenná bea lu xe̱zr la xu gunite lawa' dul-la da zaj nabaga bénneache. Na' gunná Jesús, dxe̱'e̱ bénnea'.

¹¹―Lue' dxapa', bexasa, becá'a da'a chiu', ne bexíaj lizru'.

¹²Ca'an guca, la bexásate̱', na' bequé̱'e̱ da'a chee̱', ne bedxúaje̱' lau xúgute̱ bénneache. Ca'an guca, xúgute̱ benne' ca' belexebánene̱', na' belúe lá'ane̱' Xránadxu Dios. Dxelenné̱': ―Cabata' ne lé'edxu gaca na ca guca da nigá. Dxenné̱ Jesús benne' le̱' Leví

¹³Ca gudé na' bedxúaj Jesús zéaje̱' dxu'a nísadau', na' xúgute̱ bénneache lu xe̱zre ca' belezrine̱' lau Le̱'. Nadxa bsé̱dene̱' benne' ca' xrtizra Dios.

¹⁴Ca gudé Jesús na', ble'ene' Leví, zri'ine Alfeo, dxe'e̱ lataj chee̱ wechizruj. Na' gunná Jesús, dxe̱'e̱ le̱': ―Be̱n neda' tuze. La guxásate̱ Leví, guxíajle̱ne̱' Jesús.

¹⁵Ca' guca, gate gudxé' Jesús dxawe̱' lizre Leví, na' zánete̱ benne' wechizruj, ne benne' dul-la ca' gulebé'e̱ dxelágule̱ne̱' tu zren nen Jesús, ne benne' ca' dxusé̱dene̱'. Caní naca lawe' da zjácale̱ benne' zante̱ Jesús.

¹⁶Nadxa benne' ca' dxuluxuzájle̱'e̱ da nadxixruj bea Dios, ne benne' fariseo ca', gate belelé'ene̱' ca da dxun Jesús, dxágule̱ne̱' benne' wechizruj ca', ne benne' dul-la ca', na' gulenné̱', dxelé̱'e̱ benne' ca' dxuse̱de Jesús: ―¿Bizra da nigá? Dxagu dxé'ajle̱ne̱' benne' wechizruj ca', ne benne' dul-la ca'.

¹⁷Ca ben Jesús da nigá, gunné̱': ―Benne' chawe' ca' quebe dxelechínene̱' benne' dxexún bénneache. Benne' we̱' ca' dxelechínene̱' bénnea'. Quegá bla'a dxennéa' benne' xrlátaje ca'. Benne' dul-la ca' dxennéa'. Ca dxal-la' xelún bénneache gate dxelune̱' gubasa

¹⁸Ca guca lu zra na', belún gubasa benne' ca' dxuse̱de Juan, ne benne' ca' dxuluse̱de benne' fariseo ca'. Na' belezrín benne' ca', bedajlegue̱zre̱' Jesús: ―¿Bizr chee̱ na' dxelún gubasa benne' ca' dxuse̱de Juan, ne benne' ca' dxuluse̱de benne' fariseo ca', na' benne' ca' dxusé̱denu' Lue' quebe dxelune̱' gubasa? ¿Bizr chee̱ na'?

¹⁹Na' Jesús guzre̱' benne' ca': ―¿Waca xelún gubasa benne' zaj zre̱'e̱ laní chee̱ wechaga na' dxácate̱ na' zua benne' wechaga na' nen le̱'? Dxácate̱ na' zua wechaga na' nen le̱' quebe gaca xelune̱' gubasa.

²⁰Wazrín tu zra gate dua benne' wechaga na'. Lu zra na' xelune̱' gubasa.

²¹’Quegá nu benne' xudé̱'e̱ tu ladxe' cube le̱'e̱ zradxu gula. Che ca'an gune̱', ladxe' cube da xudé̱'e̱ wazrube xu na da gula, na' wachézadxa na.

²²Cá'anqueze, quegá nu benne' que̱'e̱ xrise uva wal-la cube lu bzude xide gula. Che ca'an gune̱', na' xrise uva wal-la cube na' wacheza na bzude xide gula, na' walalaj xrise uva wal-la, ne cuía xi bzude xide na'. Xrise uva wal-la cube lu bzude xide cube dxal-la' chuzruj na. Benne' ca' dxuse̱de Jesús dxelíchaje̱' dau chee̱ zrua' xtila zra dxulupá'ana judío ca'

²³Gate gudé Jesús naga ze̱ zrua' xtila zra dxulupá'ana benne' judío ca', ná'ate̱ na' benne' ca' dxuse̱de Jesús, ca zaj xu'e̱ neza, gulezú lawe̱' dxelíchaje̱' dau naga zria zrua' xtila.

²⁴Nadxa benne' fariseo ca' gulé̱'e̱ Jesús: ―Gunná'xque. ¿Bizr chee̱ na' dxelune̱' zrin da quebe dxal-la' xelune̱' zra dxupá'anadxu?

²⁵Jesús guzre̱' benne' ca': ―¿Cabata' ne gulábale ca da be̱n David gate gudune̱', ne bxázrjene̱' da gagu le̱', ne da gugawe̱' benne' ca' zaj zrále̱ne̱' le̱'?

²⁶Guxú'e̱ lu xu'u chee̱ Dios gate naca Abiatar bxruze blau, na' David gudawe̱' xeta xtila da dxelu'e̱ lau Dios, da quebe dxal-la' gagu benne' xula, san tuze bxruze ca' zaj naca chee̱' xelawe̱' na. Na' bnézrujte̱ David da gulagu benne' ca' zrále̱ne̱' le̱' chee̱ xeta xtila na'.

²⁷Cá'anqueze gunná Jesús, dxe̱'e̱ benne' ca': ―Dios gudíxruje̱' zra dxupá'anadxu chee̱ gaca ba neza chee̱ bénneache, quegá be̱ne̱' bénneache chee̱ xelune̱' zrin chee̱ zra dxupá'anadxu.

²⁸Chee̱ le̱ na', neda', Benne' Gulje̱' Bénneache, naca' xrane zra dxupá'anadxu.