Read Tabaa Zapotec San Marcos 5 Bible Online

San Marcos 5 - Tabaa Zapotec bible

San Marcos 5

¹Bezrín Jesús, tu zren nen benne' ca' dxusé̱dene̱' xecha la'a nísadau' lu xe̱zr la xu chee̱ benne' Gadara ca'.

²Ca bedxúaj Jesús lu da dxedá lawe' nísadau', na' bzrin tu benne' xu'e̱ be' xriwe̱' naga zua Jesús. Bedxúaje̱' lu bluaj naga zaj nagache benne' gate ca'.

³Benne' biu nigá zúaqueze̱' lu bluaj na'. Quebe nu dxezúe guchéaj le̱be' chalásaze, lácala nu guchéaj le̱be' nen du xia.

⁴Zane' lasa buluchéaje̱' le̱be' nen du xia na'abe', ne ní'abe'. Bzúzrujbe' du xia ca', na' quegá nu guzeque nna bé'ene̱' le̱be'.

⁵Dxedáquezebe' te zra chizrela lu xi'a ca', ne lu bluaj ca' naga zaj nagache benne' gate. Dxebezre xa'abe', ne dxeajcházebe' lu xiaj ca', dxun we̱' cuínabe'.

⁶Gate ble'ebe' zítu'la ba za Jesús, na' guzá chégube', xeajzú zríbebe' lau Le̱'.

⁷Gunné̱ zizraj be' xriwe̱' xu'ube', dxe̱ na Jesús: ―¿Bizra dxaca chiu' nen neda', Jesús, Zri'ine Dios szrente̱? Lu La Xránadxu Dios, dxata' xueda' Lue', quebe gudéu' neda' xel-la zi'.

⁸Caní gunná na lawe' da gunná Jesús, dxe̱'e̱ na: ―Lue', da xriwe̱', bedxúaj lu be̱l-la' dxen chee̱ benne' nigá.

⁹Nadxa gunaba Jesús, dxe̱'e̱ na: ―¿Bi leu'? Na' beche̱be na: ―Da Zan lea', lawe' da naxantu'.

¹⁰Guta' xue na Jesús chee̱ quebe xesel-le̱' na, ne quebe gucuase̱' na zitu' lu xe̱zr la xu na'.

¹¹Zaj zra' gagu lu xi'a na' tu cue' cuche zaj zraba' dxeláguba'.

¹²Gulata' xue be' xriwe̱' ca' Jesús, gulenná na: ―Besel-la netu' lu cuche ca'. Be̱nna lataj chú'untu' le̱ba'.

¹³Nadxa Jesús be̱'e̱ na lataj. Na' be' xriwe̱' ca' beledxúaj na lu bénnea', na' gulú'u na cuche ca'. Zaj nácaba' ca galaj gaxúa cuche ca', na' buludxixre cuínaba' tu chejéa. Xeajlecháste̱ba' lu nísadau', ne gulátete̱ba' lu nisa na'.

¹⁴Benne' ca' dxuluxúe̱' cuche ca' buluxuzrúnnuje̱', na' xeajlezenne̱' benne' zaj zre̱'e̱ lu xe̱zre, ne benne' zaj zre̱'e̱ le̱'e̱ xixre'. Na' belezrín benne' ca' naga zua Jesús, benne' ca' belenne̱' ca da ba guca.

¹⁵Gate belezrín benne' ca' naga zua Jesús, na' belelé'ene̱' bénnea' guxú'ube' be' xriwe̱' ca', dxe'ebe' ga zua Jesús, nácube' tu ladze', ne ba bezúa xrlátaje lu xichaj lázrdaube', na' gulezrebe̱'.

¹⁶Benne' ca' belelé'e ca naca da guca chee̱ benne' guxú'ube' be' xriwe̱' ca', ne ca guca chee̱ cuche ca' buluchálaje̱' chee̱ da ba guca.

¹⁷Nadxa benne' xe̱zre ca' gulata' xuene̱' Jesús xedxúaje̱' lu xe̱zr la xu chee̱'.

¹⁸Ca bexú'u Jesús lu da dxedá lawe' nísadau', na' bénnea' guxú'ube' be' xriwe̱' ca' guta' xuebe' Jesús gu'e̱ lataj chéajle̱be' Le̱'.

¹⁹Quebe be̱' Jesús le̱be' lataj, san dxe̱'e̱ le̱be', gunné̱': ―Bexiaj lizru', ne xeajchálajle̱ xrtiu' ca' ca naca da zren ca' da be̱n Xranu' nen lue', ne ca bexache lazre̱' lue'.

²⁰Nadxa bezá'abe' zexíajbe', ne guzú laube' dxuchálajbe' lu xe̱zre ca' zaj nababa Decápolis ca naca da zren da be̱n Jesús nen le̱be'. Belexebánele̱'e̱ xúgute̱ benne' zaj zre̱'e̱ xe̱zre ca'. Bi nu'ula chee̱ Jairo, ne nu'ula na' xeajté̱' zra lana Jesús

²¹Begüén Jesús lu da dxedá lawe' nísadau', na' bezrine̱' xecha la'a nísadau'. Belezrín benne' zan naga ze̱', na' Le̱' begá'ane̱' dxu'a nísadau'.

²²Ca'an guca bzrin tu benne' xíchaje̱ chee̱ xu'u naga dxelúe lá'ana judío ca' Dios, benne' le̱' Jairo. Gate blé'ene̱' Jesús, na' bzu zribe̱' zran ni'e̱.

²³Guta' xuene̱' Jesús, dxe̱'e̱ Le̱': ―¡Bi nu'ula chia' ba dxátebe'! ¡Gudá, bze̱ na'u le̱be' chee̱ xexácabe', ne xaca banbe'!

²⁴Nadxa guxíajle̱ Jesús bénnea', na' bénneache zan xjácale̱ne̱' Le̱', ne dxuluchítee̱' Le̱'.

²⁵Ládujla bénneache ca' za tu nu'ula quebe chawe' zue̱', ba zeaj chazrinnu iza nape̱' we̱' dxen.

²⁶Da zren da bulusaca benne' dxelexún bénneache ca' nu'ula nigá, na' bache be̱n dítaje̱' xúgute̱ da nape̱'. Quegá bi gúcale̱ na le̱', san bzáladxa we̱' chee̱'.

²⁷Gate ben nú'ula' dxuluchalaj bénneache ca naca chee̱ Jesús, na' bzrine̱' cúzrula Jesús ládujla bénneache, na' xeajté̱' zra lana Jesús.

²⁸Caní be̱ne̱' lawe' da gunné̱' lu xichaj lázrdawe̱': Cun cheajtaza' zra lana Jesús, na' xexácatea'.

²⁹La gulézate̱ xel-la we̱' chie̱', ne la guque bé'ete̱ne̱' ba bexaca be̱l-la' dxen chee̱' chee̱ xízrawe̱' na'.

³⁰Gúquebe'e Jesús be̱n zrin xel-la waca chee̱'. Chee̱ le̱ na' bexéchaje̱', dxenné̱'e̱ bénneache ca', na' gunábene̱' le̱': ―¿Nuzra bedajtá zra lana'?

³¹Nadxa benne' ca' dxuse̱de Jesús gulé̱'e̱ Le̱': ―Dxelé'equeznu' bénneache zan dxuluchíe̱' Lue'. ¿Bizr chee̱ na' dxenabu': “Nuzra bedajtá neda'?”

³²Jesús guzúe̱' dxenné̱'e̱ cuite̱' chee̱ lé'ene̱' nua' bedajtá Le̱'.

³³Nadxa guxíaj nu'ula nigá, dxezrízie̱' dxezrebe̱' lawe' da nézene̱' ca da ba guca chee̱', na' bzu zribe̱' lau Jesús, na' gunné̱' ca naca da li.

³⁴Nadxa gunná Jesús, dxe̱'e̱ nu'ula': ―Bi nú'uladau', ba bexacu' lawe' da guxeajlí lazru' neda'. Bexíaj, cútudxa zrebu'. Ba bexácate̱quezu' chee̱ xízrawe̱' da guzxacu'.

³⁵Ne dxuchálajte̱ Jesús gate belezrín benne' gusá'aca lizre benne' xíchaje̱ chee̱ xu'u naga dxelúe lá'ana judío ca' Dios, na' gulé̱'e̱ xra nú'uladau' na': ―Bi nú'uladau' chiu' ba gútebe'. ¿Bizr chee̱ na' dxunu' zé̱dedxa benne' dxuse̱de nigá?

³⁶Gate Jesús benne̱' ca da gulenná benne' caní, dxe̱'e̱ benne' xíchaje̱ chee̱ xu'u na', gunné̱': ―Quebe zrebu'. Guxeajlí lazre' neda'.

³⁷Quebe be̱'e̱ lataj chjácale̱ bénneache zan ca' Le̱'. Tuze be̱'e̱ lataj gusá'acale̱ Pedro, ne Jacobo, ne Juan, biche Jacobo nigá, nen Le̱'.

³⁸Ca belezrine̱' lizre benne' xíchaje̱ na', na' ble'e Jesús bénneache dxelún schaga. Dxelebezre benne', ne dxelebezre xa'ate̱'.

³⁹Nadxa guxú'u Jesús lu xu'u, na' dxe̱'e̱ benne' ca', gunné̱': ―¿Bizr chee̱ na' dxunle schaga? ¿Bizr chee̱ na' dxebézrele? Quegá nate bidau' nu'ula. Dxásezebe'.

⁴⁰Belún lala benne' ca' chee̱'. Nadxa Jesús bebéaje̱' xúgute̱ benne' ca', na' guché̱'e̱ xrabe', ne xrna bidau' nigá, ne benne' ca' zjácale̱ne̱' Le̱', na' guxú'e̱ naga de̱ nú'uladu na'.

⁴¹Bé̱xrue̱' na'be', ne guzre̱' le̱be': ―Bi nú'uladau', lue' dxapa': ¡Guxasa!

⁴²La bexásate̱ nú'uladu na', na' guzáte̱be' lawe' da ba zéajbe' chazrinnu iza. Na' benne' ca' zaj zre̱'e̱ lu xu'u na' belezrébele̱'e̱.

⁴³Jesús gunná bé'ene̱' benne' ca' chee̱ quebe nu xelé̱'e̱ ca da be̱ne̱'. Nadxa guzré̱' benne' ca' xulugawe̱' nú'uladu na'.