Read Tabaa Zapotec San Marcos 7 Bible Online

San Marcos 7 - Tabaa Zapotec bible

San Marcos 7

¹Benne' fariseo ca' nen bal-la benne' dxuluxuzájle̱'e̱ da bdxixruj be'e Moisés, benne' gusá'aque̱' Jerusalén, belezríne̱' lau Jesús.

²Benne' caní belelé'ene̱' ca dxelún bal-la benne' dxuse̱de Jesús, dxelawe̱' xeta ne quebe zaj naxibe ne̱'e̱ ca dxelenná bea benne' xudau' ca'. Chee̱ le̱ na' gulenná benne' Jerusalén ca': ―Zaj naca sban na' benne' ca' dxuse̱de Jesús. Nadxa gulezí tizre̱' le̱'.

³Caní gulenná benne' ca' lawe' da zjácale̱ benne' xudau' fariseo ca', ne xúgute̱ benne' judío ca' ca naca da belún xra xtau benne' ca', quebe dxelawe̱' xeta che quebe zaj naxibe ne̱'e̱ zane' lasa.

⁴Gate zjaque̱' lawe' xi'a wa'u, ca dxelexezrine̱' quebe dxelawe̱' xeta che quebe xelibe ne̱'e̱ ca zaj nadxixruj bea benne' xudau' ca'. Cá'anqueze de̱dxa da zante̱ da zjácale̱ne̱', ca xexadxe zriga' da dxelé'aje̱', ne zruaga, ne zriga xé'ena, ne da naga dxelásie̱'.

⁵Nadxa benne' fariseo ca', ne benne' ca' dxuluxuzájle̱'e̱ da bdxixruj be'e Moisés gulenábene̱' Jesús: ―¿Bizr chee̱ na' quebe zjácale̱ benne' ca' dxusé̱denu' ca naca da gulún benne' gula? Dxelawe̱' xeta, zaj naca sban ne̱'e̱.

⁶Na' beche̱be Jesús: ―Láweze dxunle da xrlátaje. Lu lázrdaule xu'ule da cale̱la. Cháwedau' bchálajqueze Isaías ca nácale le'e gate na' bzuaje̱' caní:Bénneache caní dxelúe lá'ane̱' neda' nen dxú'aze̱'.Xichaj lázrdawe̱' ca' zaj nacuasa na neda'.

⁷Níteze naca xel-la ba lá'ana da dxelu'e̱ neda',lawe' da dxulusé̱dene̱' da zaj nadxixruj bea bénneacheze.

⁸Caní naca xca', le'e dxuzúale chalá'ala ca da nadxixruj bea Dios, na' zéajle̱le ca naca da gulún bénneache ca dxíbele zruaga, ne zriga' chee̱le, ne zánete̱ da caní da dxunle.

⁹Na' gunnadxe̱', dxe̱'e̱ benne' ca': ―Chala'ala dxuzúale ca da nadxixruj bea Dios chee̱ zéajle̱le ca naca da tu dxúnzquezle.

¹⁰Caní gunná Moisés na': “Gudapa ba lá'ana xra xrna'u.” Cá'anqueze gunné̱': “Che tu benne' nne̱' schanni' chee̱ xre', che xrne'e̱, con gátequeze bénnea'.”

¹¹Le'e dxennale, “Che tu benne' xe̱'e̱ xra xrne̱'e̱: Corbán,” da zéaje̱ na, quebe gaca gácale̱na' le'e lawe' da bache bnézruja' chee̱ Dios ca naca da de̱ chia'.

¹²Che ca'an dxenné̱', nadxa le'e québedxa dxu'ule le̱' lataj gácale̱ne̱' xra xrne̱'e̱.

¹³Gate dxunle caní dxuzúale chalá'ala xrtizra Dios, chee̱ gunle ca da zéajle̱le. Na' zéajquezle dxunle zánete̱ da zaj naca na caní.

¹⁴Xecha lasa gunné̱ Jesús bénneache ca', na' gunné̱', dxe̱'e̱ le̱': ―Le guzé̱ nágale xúgute̱le, ne le chéajni'i.

¹⁵Netú da dxe'aj dxagu benne' quebe seque gucá'ana na le̱' sban. Da dxedxuaj na lu xichaj lázrdau bénneache, le̱ na' dxucá'ana na le̱' sban.

¹⁶Le'e zua nágale, le xene.

¹⁷Gate gucuasa Jesús naga zaj zra' benne' ca', na' guxú'e̱ lu xu'u. Nadxa benne' ca' dxusé̱dene̱' gulenábene̱' Le̱' ca naca chee̱ da dxulé'e nigá.

¹⁸Nadxa gunná Jesús, dxe̱'e̱ le̱': ―¿Cá'anqueze le'e quebe dxéajni'ile? ¿Quebe dxéajni'ile xúgute̱ da dxe'aj dxagu bénneache quebe seque gucá'ana na le̱' sban

¹⁹lawe' da quebe dxu'u na lu xichaj lázrdawe̱'. Dxu'u na lu le̱'e̱, na' dxedxuaj na? Cate' gunná Jesús caní blé'ene̱' zaj naca chawe' xúgute̱ da dxe'aj dxágudxu.

²⁰Na' gunnadxe̱': ―Ca naca da dxedxuaj na lu xichaj lázrdau bénneache, le̱ na' dxucá'ana na le̱' sban

²¹lawe' da lu xichaj lázrdau bénnea' dxeledxúaj ca da cale̱la da dxuwía lazre̱', ne dul-la da dxucá'ana ditaj xel-la wechaga na', ne dul-la chee̱ da sban, ne we̱te benne',

²²ne xel-la gubán, ne da dxezá lazre' gapa da naca chee̱ benne' xula, ne da cale̱la ca', ne xel-la wezrí xe̱', ne da dxezá lazre' da sban, ne xel-la zre̱'e lazre', ne xel-la wechalaj dizra' bizruj, ne xel-la dxun szren cuina, ne xel-la dxuchalaj bigaze.

²³Xúgute̱ da cale̱la caní dxeledxúaj na lu xichaj lázrdau bénneache, ne dxuluxrinnaj na le̱'. Tu nu'ula quebe naca judío dxeajlí lazre̱' Jesús

²⁴Na' bezá'a Jesús naga zue̱', guxíaje̱' lu xe̱zre ca' zaj nababa xe̱zre Tiro, ne xe̱zre Sidón. Guxú'u Jesús tu lu xu'u, ne quegá guca lazre̱' nu xene. Quebe guca gache̱'.

²⁵La gunézete̱ tu nu'ula zua Jesús na'. Nu'ula nigá zua tu zrí'ine̱' nu'ula, xu'ube' be' xriwe̱'. Bla' nu'ula' naga zua Jesús, ne bzu zribe̱' lawe̱'.

²⁶Nu'ula nigá quebe naque̱' nu'ula judío. Naque̱' nu'ula chee̱ tu xe̱zre nababa xe̱zr la xu Sirofenicia. Bzrine̱' lau Jesús, na' gunabe̱' Le̱' xebéaje̱' be' xriwe̱' da xu'u zrí'ine̱' nu'ula.

²⁷Gunná Jesús, dxe̱'e̱ nu'ula': ―Be̱' lataj xelagu nedxu zri'ine benne' lu xu'u, lawe' da quebe naca chawe' cúadxu xeta xtila chee̱ bidu ca', ne gunézrujdxu na chee̱ bécudu ca'.

²⁸Na' gunná nu'ula': ―Awe', Xran, san bécudu ca' zaj zra' zran ga dxelágube' dxeláguquezba' xeta bizruj da dxuluzexruj bidu ca'.

²⁹Nadxa gunná Jesús: ―Ne̱ chee̱ dizra' da ba gunnéu', bexíaj na'a. Bache bedxúaj be' xriwe̱' lu be̱l-la' dxen chee̱ zri'inu' nu'ula.

³⁰Gate bezrín nu'ula' lizre̱', na' blé'ene̱' zrí'ine̱' nu'ula de̱be' lu da naga dxásebe', na' be' xriwe̱' ba bedxúaj na lu be̱l-la' dxen chee̱be'. Dxexún Jesús tu benne' nacuézrue̱', ne quebe dxaca nnie̱'

³¹Nadxa bedxúaj Jesús, bezé̱'e̱ naga nababa xe̱zre Tiro, na' gudétie̱' naga nababa xe̱zre Sidón, ne xe̱zre ca' zaj nababa Decápolis, na' bezrine̱' dxu'a nísadau' chee̱ xe̱zr la xu Galilea.

³²Nadxa bedajleguá' benne' ca' tu benne' nacuézrue̱', ne quebe dxaca nnie̱', na' gulenábe̱' Jesús xrua ne̱'e̱ benne' nigá.

³³Guché̱ Jesús benne' nigá chalá'ala naga zaj zra' benne' ca', na' bdie̱' zrube ne̱'e̱ lu naga bénnea', na' bzre̱'e̱ zrene̱', ne bte̱' lawe' luzre bénnea'.

³⁴Nadxa la gunná'te̱' xabáa, ne gucá'a lazre̱', gunné̱': ―Efata. Dizxa' nigá zéaje̱ na: Bxalaj.

³⁵Ca gunné̱' caní, na' bxalaj naga benne' cuezru nigá, ne bexaca luzre̱'. Nadxa guca bchálaje̱'.

³⁶Na' gunná Jesús, dxe̱'e̱ benne' ca' quebe nu xelé̱'e̱ ca da be̱ne̱'. Lácala gunná be'ene̱' le̱' caní, buluchílujdxe̱' dizra' ca da be̱ne̱'.

³⁷Benne' ca' zaj zra' na' belexebánele̱'e̱ne̱', dxelenné̱': ―Xúgute̱ dxune̱' cháwedau'. Dxexune̱' benne' cuezru ca', na' dxelénte̱ne̱', ne dxexune̱' benne' ca' quebe dxaca nnie̱', na' dxelenné̱tie̱'.