Read Tabaa Zapotec San Lucas 1 Bible Online

San Lucas 1 - Tabaa Zapotec bible

San Lucas 1

¹Benne' zan ba belune̱' ca da gulezéquene̱' buluzúaje̱' cáte̱ze naca da guca ládujla dxi'u,

²cáte̱ze na' gulé̱ benne' ca', benne' belelé'ene̱' nédxudaute̱ ca naca da guca na, na' buluchálaje̱' dizra' chawe' na'.

³Cá'anqueze neda' ba bchi'a xánnia' xúgute̱ da ca' gulaca na nédxudaute̱, na' dxéqueda' chawe' guzúaja' da nigá chiu' cáte̱ze guca, bi nazrí'ite̱ lazra', lue', Teófilo.

⁴Dxuna' caní chee̱ nézenu' naca na da li ca da ba bululé'ene̱' lue'. Gubáz chee̱ xabáa dxuzenne̱' ca galaj Juan, benne' guchúe̱' bénneache nisa

⁵Gate na' naca Herodes wenná bea chee̱ xe̱zre ca' zaj nababa Judea, na' zua tu bxruze le̱' Zacarías, benne' nababe̱' cue' bxruze ca' gunná be'e Abías ca ni'te. Zru'ula Zacarías na' le̱' Elisabet, na' nácaqueze Zacarías na' zre sua benne' ca' gulebábale̱ bxruze Aarón.

⁶Zacarías ne zru'ule̱' Elisabet gulaque̱' xrlátaje lau Dios, ne dxelune̱' ca zaj naca da bdxixruj bea Xránadxu, ne ca da naxúaj na lu da gunné̱'. Ca'an guca, quebe nu guzeque gagu zria le̱' lau Dios.

⁷Quebe nu zrí'ine̱' chilá', lawe' da naca Elisabet na' nu'ula wizre, na' dxúpate̱' zaj bezúale̱'e̱ gula.

⁸Tu zra, gate belexala bxruze ca' naga nababa Zacarías xelune̱' zrin lu xel-la bxruze chee̱' lau Dios,

⁹cáte̱ze naca da dxelún bxruze ca', na' bexala Zacarías chu'e̱ lu lataj lá'azxa chee̱ Xránadxu lu xudau' chee̱ guzezxe̱' xala.

¹⁰Dxácate̱ na' dxezxe xala na', ca naca benne' ca' zaj zra' chalé'ajla dxuluchálajle̱ne̱' Dios.

¹¹Nadxa ble'e lau tu gubáz chee̱ xabáa chee̱ Xránadxu, ze̱' chalá'a xabe̱la chee̱ cugu naga zría xala dxezxe na.

¹²Ca ble'e Zacarías gubáz chee̱ xabáa na', guzúe̱' ste̱be, ne bzrébele̱'e̱.

¹³Gubáz chee̱ xabáa na' guzre̱' le̱': ―Zacarías, quebe zrebu', lawe' da ba ben Dios dizra' da dxuchálajle̱nu' Le̱', na' nu'ula chiu', Elisabet, walaj tu zri'ine̱', bi na' guzú' labe' Juan.

¹⁴Wabéle̱'e̱nu', ne gaca chiu' tu da ba neza zrente̱, na' benne' zan xelebene̱' lawe' da ba gulaj bidu na'.

¹⁵Ca'an gaca lawe' da gaca zri'inu' szrente̱ lau Dios. Quebe xí'ajbe' xrise uva wal-la, u da dxusuzre na bénneache, na' gate gálajte̱be' tu súale̱zqueze Be' Lá'azxa nen le̱be'.

¹⁶Ne̱ chee̱ le̱be' benne' zan xelexaque̱' bi chee̱ Xránadxu Dios.

¹⁷Juan nigá quia laube' lau Xránadxu, na' Be' na', ne xel-la waca da gulezúale̱ na Elías, bénnea' bchálaje̱' waláz chee̱ Dios gate nate, xelezúale̱ na le̱be', chee̱ guzúabe' tuze benne' ca' zaj naque̱' xra xrna nen zrí'ine̱', ne chee̱ gulé'ebe' benne' dxeledábague̱' Dios chee̱ xelune̱' ca dxenná xrtizra' Dios. Ca'an gaca, gucá'ana cháwebe' bénneache chee̱ xelezí' lu ne̱'e̱ Xránadxu.

¹⁸Zacarías na' bche̱be̱' gubáz chee̱ xabáa: ―¿Ájazra gaca nezda' gaca caní? Neda' ba nagúlale̱'a, ne cá'anqueze naca nu'ula chia'.

¹⁹Na' beche̱be gubáz chee̱ xabáa na': ―Neda' naca' Gabriel, ne naca' we̱n zrin chee̱ Dios. Le̱' gusel-le̱' neda' chee̱ guchálajle̱na' lue', ne guzenda' lue' dizra' chawe' nigá.

²⁰Na'a, lawe' da quebe guxéajle̱'u da gucha' lue', xegá'anu' quebe gaca nníu' cadxa galaj zri'inu'. Caní gaca na ca zrinte̱ zra chee̱ na.

²¹Dxácate̱ na' zaj zra' benne' ca' chalé'ajla, dxelebeze̱' Zacarías, ne dxelexebánene̱' lawe' da dxezréle̱'e̱ne̱', quebe dxedxúaje̱' lu lataj lá'azxa.

²²Gate bedxúaj Zacarías, québedxa dxaca nnie̱'. Nadxa guleque bé'ene̱' ba ble'e Zacarías tu da ble'e Dios le̱' lu lataj lá'azxa na'. Na' le̱' bta ná'ase̱', lawe' da quebe dxaca nnie̱'.

²³Ca xeajsé̱ chee̱ zra ca' dxal-la' gun Zacarías zrin chee̱ xudau', na' bezé̱'e̱ zexíaje̱' lizre̱'.

²⁴Ca gudé na' zru'ule̱' Elisabet ba zue̱' zi'i, na' quebe bdxúaje̱' lataj bchina' chie̱' ca gazxu' beu', na' dxenné̱' lu lázrdawe̱':

²⁵“Xrana' Dios ba be̱ne̱' chia' da nigá chee̱ québedxa xuluzúa bénneache neda' chalá'ala.” Gubáz chee̱ xabáa dxuzenne̱' ca galaj Jesús

²⁶Ca gudé xrupa beu' gate na' bchálajle̱ gubáz chee̱ xabáa na' Zacarías, na' Dios gusel-le̱' le̱' tu xe̱zre nababa Galilea nazí le na Nazaret,

²⁷chee̱ cheajchálajle̱ne̱' tu nu'ula cuíde'dau' le̱be' María. Le̱be' ba zua guchaga na'be' benne' biu na' le̱' José, benne' naque̱' zri'ine zre sua wenná bea David.

²⁸Gubáz chee̱ xabáa na' guxú'e̱ naga zua María na', na' guzre̱'-be': ―Padiuzre. Dios dxune̱' lue' tu culuén. Xránadxu zúale̱ne̱' lue'. Dios ba be̱ne̱' tu da cháwedxa chiu' quézcala chee̱ xúgute̱ nu'ula ca'.

²⁹Gate María na' ble'ebe' gubáz chee̱ xabáa na', bebánebe' ca naca dizra' na', na' gunabe' lu lázrdaube': ¿Bizr chee̱ na' dxugape̱' neda' diuzre caní?

³⁰Nadxa gunná gubáz chee̱ xabáa na': ―María, quebe zrebu' lawe' da ba bzrué'enu' tu culuén da dxun Dios chiu' lue'.

³¹Na'a, zua da gunna Dios chiu', na' galaj tu bidu biu chiu', na' guzú' labe' Jesús.

³²Le̱be' gácabe' szren, na' xelennáqueze̱' naque̱' Zri'ine Dios szrente̱, na' Xránadxu Dios gune̱' Le̱' wenná bea ca guca xra xrtawe̱' David,

³³chee̱ nna bé'etecaze̱' xe̱zr la xu Israel, na' xel-la dxenná bea chee̱' quebe cheajsé̱queze chee̱ na.

³⁴Nadxa María bché̱bebe' gubáz chee̱ xabáa: ―¿Ájazra gaca da nigá, lawe' da quebe nu benne' biu zúale̱na'?

³⁵Gubáz chee̱ xabáa na' gunné̱': ―Be' Lá'azxa chee̱ Dios sue̱' xichaj lázrda'u, na' xel-la waca chee̱ Dios szrente̱ sua na nen lue'. Chee̱ le̱ na' bidu na' gálajbe' gácaquezebe' chee̱ Dios, na' sí'queze labe' Zri'ine Dios.

³⁶Cá'anqueze bila ljwezru' Elisabet wálajqueze bidu chee̱' lácala ba naque̱' benne' gula. Ca'an naca, nu'ula na' gulenné̱' naque̱' wizre, ba zeaj xrupa beu' bnezruj Dios chee̱'.

³⁷Quebe bi de̱ da quebe gaca gun Dios.

³⁸Nadxa gunná María: ―Neda' nácaqueza' we̱n zrin chee̱ Xránadxu. Gun Dios chia' ca da ba gunnáu'. Na' gubáz chee̱ xabáa na' bezé̱'e̱ naga zua María na'. María zeajxúebe' Elisabet

³⁹Ca lu zra na' María guzá'abe' zéajbe' tu xé̱zredau' da zua na laduj xi'a ca' chee̱ ga nababa Judea.

⁴⁰Na' guxú'ube' lizre Zacarías, ne bgápabe' diuzre Elisabet.

⁴¹Gate ben Elisabet dizra' da gunné̱ María, na' bidu na' xú'ube' le̱'e Elisabet guxrítebe', na' guzúale̱ Be' Lá'azxa le̱'.

⁴²Nadxa gunné̱' tu chi'e̱ zizraj: ―Dios ba be̱ne̱' tu da cháwedxa chiu' quézcala chee̱ xúgute̱ nu'ula ca', lawe' da ba zua da be̱nna Dios chiu'.

⁴³¿Núzraqueze naca' neda', za xrna Xrana' ga zua' neda'?

⁴⁴Cáte̱ze benda' dizra' da gunnéu', na' guxrite bidu chia' lu le̱'a lu xel-la dxebé chee̱be'.

⁴⁵Ba neza naca na chiu' guxéajle̱'u lawe' da gaca li ca da gunná Xránadxu.

⁴⁶Nadxa gunná María:Bénne'du xu'a dxue lá'ana na Xrana'.

⁴⁷Lázrdawa' dxebé na ca dxun Dios, weselá chia'.

⁴⁸Lawe' da gudxé' Dios gunne xue chia', nácaqueza' we̱n zrin chee̱'.Na'a su lau na, xúgute̱ benne' xelenné̱' nazi'a tu culuen zren chee̱ Dios.

⁴⁹Dios Szrente̱ ba be̱ne̱' tu da zrente̱ chia' neda'.Chee̱ le̱ na' lá'azxa naca La Le̱'.

⁵⁰Le̱' xexache lázrqueze̱' xúgute̱ benne' ca' dxelezrebe̱' Le̱'.

⁵¹Da zrente̱ ba be̱n Le̱'.Bzue̱' zrila benne' ca' dxulucá'ana szren cuine̱'.

⁵²Bebéaje̱' benne' blau ca' lu lataj chee̱',ne bechise̱' benne' dxexruj lazre' ca'.

⁵³Bnézrujle̱'e̱ da gulagu benne' dxeledún,na' benne' gunní'a ca' bca'ane̱' le̱' cá'aze.

⁵⁴Gúcale̱ne̱' benne' Israel, benne' we̱n zrin chee̱' ca'lawe' da bezrí lázrqueze̱' le̱',

⁵⁵ca da guche̱be lazre̱' chee̱ xra xrtáudxu ca',chee̱ Abraham, ne chee̱ benne' xrtie̱' ca' chadía chacanna.

⁵⁶María begá'anale̱be' Elisabet ca chunna beu', na' ca gudé na' bezrinbe' lízrebe'. Ca gulaj Juan, benne' bchue̱' bénneache nisa

⁵⁷Ca gudé na' guxá' beu' chee̱ Elisabet na' chee̱ galaj bidu chee̱', na' guzane̱' tu bi biu chee̱'.

⁵⁸Benne' walízr chee̱' ca', ne xrtia ljwezre̱' belezrine̱' dxelebene̱' nen le̱', gate belenne̱' Dios bezrí lázrele̱'e̱ le̱'.

⁵⁹Gate guca xrunu' zra, belezrine̱' chee̱ xelechúgue̱' lu xpé̱labe' da gulé'e na naca be̱' bi chee̱ Dios, na' gulaca lazre̱' xuluzúe̱' labe' Zacarías ca le̱ xrabe'.

⁶⁰Na' gunná xrnabe': ―Quebe gaca. Dxal-la' si' labe' Juan.

⁶¹Na' gulé̱'e̱ le̱': ―¿Bizr chee̱ na'? Quebe nu chilá' xrtia ljwézrele le̱' ca'.

⁶²Na' buluche̱be̱' xra bidu na', bulutá ne̱'e̱ chee̱ xelenézene̱' ájazra guzúe̱' labe'.

⁶³Na' xrabe' na' gunabe̱' tu blágadau', na' bzuaje̱' le̱'e̱ na: Juan si' labe'. Na' xúgute̱ benne' ca' belexebánene̱'.

⁶⁴Ca' guca Zacarías benné̱', na' guzú lawe̱' dxue lá'ane̱' Dios.

⁶⁵Ca belelé'ene̱' da nigá, xúgute̱ benne' walízr chee̱' belexebánene̱', na' ca naca xe̱zre zaj nnita laduj xi'a ca ga nababa Judea, buluchálaje̱' ca da guca.

⁶⁶Xúgute̱ benne' belenne̱' na, gulezú lawe̱' dxelenné̱' lu lázrdawe̱', ne buluche̱be ljwezre̱' tue̱' xetúe̱': ―¿Ájazraqueze gun bi nigá? Naca bea na Xránadxu zúale̱ne̱'-be'. Ca da bil-la Zacarías

⁶⁷Na' Be' Lá'azxa guzúale̱ne̱' Zacarías, xra bidu nigá, na' bchálaje̱' waláz chee̱ Dios, gunné̱':

⁶⁸¡Gaca ba Xránadxu, Dios chee̱ xe̱zre Israel!Ba ble̱'e̱ naga zúadxu, bénneache chee̱', na' bselé̱' dxi'u.

⁶⁹Ba gusel-le̱' tu benne' wál-lale̱'e̱, weselá chee̱dxu.Bénnea' gulaj ládujla xrtia David, benne' we̱n zrin chee̱'.

⁷⁰Ca'an guche̱be lazre' Dios lu dxu'a benne' ca' buluchálaje̱' waláz chee̱' nédxudaute̱.

⁷¹Guche̱be lazre̱' guselé̱' dxi'u lu na' benne' dxelezré̱'e̱ dxi'u, ne lu na' benne' dxelecuídene̱' dxi'u.

⁷²Xezrí lazre̱' xra xrtáudxu ca',ne quebe gal-la lazre̱' xel-la wezría lá'azxa chee̱'.

⁷³Da nigá naca na da guche̱be lazre' Dios da bzua chache̱' nen xra xrtáudxu Abraham,da naca tu da gunne̱' chee̱dxu dxi'u.

⁷⁴Guche̱be lazre̱' guselé̱' dxi'u lu na' benne' dxelezré̱'e̱ dxi'uchee̱ gaca gundxu zrin chee̱', ne quebe zrébedxu,

⁷⁵ne gácadxu xrlátaje lau Le̱', ne gácadxu bi cheé̱queze̱' xúgute̱ zra naca bandxu.

⁷⁶Lue', zrí'ina'dau', sí'queze lau' bi guchálajqueze waláz chee̱ Dios szrente̱,lawe' da quia lau' lau Xránadxu, salju' neza chee̱ Xránadxu,

⁷⁷Guzénenu' bénneache chee̱', Le̱' gunite lawe̱' dul-la chee̱',ne guselé̱' benne' ca'.

⁷⁸Ca'an gaca lawe' da dxexezrí lazre' Dios dxi'u.Dxune̱' na'a dxalaj tu xi' chee̱ xabáa da dxusení' chee̱dxu,

⁷⁹na' gusení na naga zaj zra' benne' zaj zre̱'e̱ lu na' xel-la gute,chee̱ cu'u na dxi'u lu neza xrtante̱ lau Dios.

⁸⁰Bidu na' bgúlabe', ne bgula bénne'du xu'ube' chawe' lu da naca chee̱ Dios. Guzúaquezbe' le̱'e̱ xixre' lawe' lataj cadxa bzrin zra ble'e laube' xe̱zre Israel.