Read Tabaa Zapotec San Lucas 12 Bible Online

San Lucas 12 - Tabaa Zapotec bible

San Lucas 12

¹Ca lu zra na' belezraga zane gaxúa benne' ca', na' dxululéajte̱ ljwezre̱'. Na' guzú lau Jesús dxe̱'e̱ benne' ca' dxusé̱dene̱': ―Le guxúe xanne' cuínale ca naca cua zichaj chee̱ xeta xtila chee̱ benne' xudau' fariseo ca', da naca na da dxulé'e na láweze da xrlátaje chee̱ benne' ca'.

²Quebe bi de̱ da dxundxu bagácheze da quebe gulé'e lawe', ne quebe bi de̱ da nagache da quebe nu neze.

³Chee̱ le̱ na', xúgute̱ da gunle lu da chul-la, xululé'e lawe' te zra, na' da gunle bagácheze lu xu'u naga naxézxujte̱ dxa xu'u, wénqueze na lau xúgute̱ bénneache. Nu dxal-la' zrébedxu

⁴Na' gunná Jesús: ―Dxapa' le'e, bi ljwézra'du ca', quebe dxal-la' zrébele benne' dxelute be̱la' dxen chee̱ bénneache, san gate te na', québedxa xelezéquene̱' bi xelune̱'.

⁵Na'a dxapa' le'e nu dxal-la' zrébele. Le zrebe Bénnea' gate te xequé̱'e̱ xel-la nabán chee̱ bénneache, nape̱' xel-la dxenná bea gudée̱' bénneache ca' lataj ba xa'. Awe', Le̱' le zrebe.

⁶’¿Quebe ta'u gazxu' bxínnedau' lawe' chupa dumí lásedau'? Dios quebe dxal-la lazre̱' netú bxínnedu ca'.

⁷Cá'anqueze xicha xíchajle le'e xúgute̱ na zaj nababa na lau Dios. Chee̱ le̱ na' quebe zrébele. Zácadxale le'e ca be̱ zante̱ bxínnedu ca'. Benne' dxelexeche̱be̱' zaj naque̱' chee̱ Jesús

⁸Na' gunná Jesús: ―Dxapa' le'e, xúgute̱ benne' xelexeche̱be̱' zaj naque̱' chia' neda' lau bénneache, cá'anqueze neda', Benne' Gulje̱' Bénneache, xeché̱bequeza' chee̱ benne' ca' lau gubáz chee̱ xabáa ca' chee̱ Dios,

⁹san benne' ca' quebe xelexeche̱be̱' chia' lau bénneache, néda'queza' quebe xeche̱ba' chee̱' lau gubáz chee̱ xabáa ca' chee̱ Dios.

¹⁰’Che nu benne' bi nnie̱' chia' neda', Benne' Gulje̱' Bénneache, gunite lau Dios chee̱', na' benne' nnie̱' chee̱ Be' Lá'azxa, quebe gunite lau Dios chee̱ bénnea'.

¹¹’Gate xeleché̱'e̱ le'e lau benne' xíchaje̱ chee̱ xudau', u lau benne' dxuchi'e̱ da dxaca, u lau benne' xu'u lawe', quebe cue'le gunne xue bi xeché̱bele u bi nnale,

¹²lawe' da gate zrin zra dxal-la' nne̱le, Be' Lá'azxa gulé'ene̱' le'e da dxal-la' nne̱le. Da ste̱be chee̱ xel-la gunní'a

¹³Tu benne' ládujla benne' ca' guzre̱' Jesús: ―Benne' Wese̱de, guzre bi bicha' gúnnabe' chia' da xexal-la' chee̱ da guca chee̱ xrantu'.

¹⁴Jesús guzre̱'-be': ―Benne', ¿zua nu bzua neda' ca benne' dxuchi'e̱ da dxaca u ca benne' le̱'e̱ xe̱zr la xu?

¹⁵Nadxa guzre̱' benne' ca': ―¡Le na' xque! ¡Le guxúe xanne' cuínale chee̱ quebe gucúdele! Xel-la nabán chee̱ nu benne' quebe zua na lu da nápale̱'e̱.

¹⁶Nadxa bchalaj Jesús da dxulé'e nigá, gunné̱': ―Guzúa tu benne' gunní'a, na' xe̱zr la xu chee̱' bnézrujle̱'e̱ na.

¹⁷Na' benne' gunní'a na' guzú lawe̱' dxenné̱': ¿Bizra guna'? Québedxa de̱ naga guzrá'a lina chia' nigá.

¹⁸Nadxa dxenné̱': “¡Ba nezda' ca da guna'! Guchínnaja' naga dxezrá' lina chia', chee̱ guna' da zrí'adxa, na' guzrá'a na' ca naca lina chia' nigá, ne ca naca da ba napa'.

¹⁹Nadxa nníqueza' néda'queza': Ba dé̱le̱'e̱ chiu' da zante̱ chee̱ zane' iza. Bezí' lazre'. Güe'e gudagu, ne gubé.”

²⁰Na' Dios guzre̱' bénnea': “Lue', benne' zide', lu zre' na'a zre' gatiu', na' da nuzrá' chawu', quebe nézenu' nu chee̱ gaca na.”

²¹Ca'an dxaca chee̱ benne' dxutupe̱' xel-la gunní'a da gaca cheé̱queze̱'. Naque̱' ca tu benne' xache' lau Dios. Dios dxuxúe̱' bi chee̱' ca'

²²Ca gudé na', Jesús guzre̱' benne' ca' dxusé̱dene̱': ―Dxapa' le'e, quebe cue'le gunne xue ca naca da gágule chee̱ gaca banle, ne ca naca zra lánale da gácule.

²³Xel-la nabán chee̱le zácadxa na ca da gágule, na' be̱l-la' dxen chee̱le zácadxa na ca zra lánale.

²⁴Le nna'xque ca dxaca chee̱ bxínnedu ca'. Quebe dxelázaba', ne quebe dxelelápaba', ne quebe zaj zua naga dxuluxuzraba', na' Diósqueze̱' dxuxi'aj dxugawe̱'-ba'. Zácadxale le'e ca bxínnedu ca'.

²⁵¿Núlale le'e séquele gusetunna cuínale xetú ben lawe' da dxebé'le̱'e̱le gunne xue?

²⁶Che quebe gaca gunle tu da naca da dauze, ¿bizr chee̱ na' dxebe'le gunne xue chee̱ da ca' xezícala?

²⁷’Le nna'xque ca dxelegula xiaj xrtandu ca'. Quebe dxelún na zrin, ne quebe dxelún na du ladxe', na' dxapa' le'e, wenná bea Salomón quebe gucue̱' da xrtandxa ca tu xiajdu caní.

²⁸Che Dios dxugacue̱' caní xíxre'du ca', da zaj zua na'a le̱'e̱ xixre', na' wxre xelezxe na, ¿quegá gundxe̱' chee̱le le'e, benne' dxeléajle̱'e̱ láteze chia'?

²⁹Chee̱ le̱ na', quebe cue'le gunne xue ca naca da gágule, u ca naca da xí'ajle, ne quebe súale ste̱be.

³⁰Ca' naca na, lawe' da ca naca benne' ca' zaj zre̱'e̱ xe̱zr la xu dxelexílaje̱' ca naca da caní, san le'e, zua Xrale xabáa ba nézene̱' nachínnele ca naca da caní.

³¹Le cue' gunne xue nna bea Dios lu xichaj lázrdaule, na' sile ca naca da caní. Da gunní'a da dxegú'u cháwedxu xabáa

³²Na' gunná Jesús: ―Quebe zrébele, zríla'du chia', bábaze nácale le'e. Xrale Dios dxezaca ba lazre̱' gunne̱' chee̱le lataj naga dxenná be'e̱.

³³Le gute da nápale, na' le gunezruj benne' xache' ca'. Ca'an gaca, guzrale na naga quebe te chee̱ na, na' gápale da gunní'a xabáa da quebe xedú, naga quebe gaca chu'u gubán, ne quebe gaca xelú'u béadu ca' xuluteba' na.

³⁴Naga nuzúale xel-la gunní'a chee̱le, na' súaqueze lázrdaule. Dxal-la' gupá'a cuínadxu

³⁵Na' gunná Jesús: ―Le gupá'a cuínale, ne le gugala xi' chee̱le.

³⁶Le gaca ca benne' we̱n zrin ca' dxelebeze̱' xrane̱' xezrine̱' lu laní chee̱ wechaga na', na' nne̱' dxu'a dxa xu'u na'.

³⁷Ba neza zrente̱ naca na chee̱ benne' we̱n zrin ca', benne' ca' xedajxraca xrane̱' le̱' dxelenaze̱' gate xezrine̱'. Da li dxapa' le'e, xrane̱' na' cueche̱' benne' ca' xelawe̱', na' guzúa cuine̱' chee̱ que̱'e̱ da xelagu benne' we̱n zrin ca'.

³⁸Lácala xezrine̱' dxe̱la u dxaní'sise̱', che xedajxraque̱' le̱' dxelennaze̱', ba neza naca na chee̱ benne' we̱n zrin ca'.

³⁹Dxal-la' nézele da nigá, che xrane xu'u gunézene̱' bi zra zrin gubán, na' quebe gasie̱' chee̱ quebe gu'e̱ lataj quíduje̱' lizre̱' chee̱ cuane̱' da nape̱'.

⁴⁰Cá'anqueze le'e, le sua ban lazre', lawe' da gate québela nézele, xelá'a neda', Benne' Gulje̱' Bénneache. Benne' we̱n zrin li lazre', ne benne' we̱n zrin quebe naque' li lazre'

⁴¹Nadxa Pedro bche̱be̱' Jesús: ―Xran, ¿bchálaju' da dxulé'e nigá chee̱ nétu'ze, che chee̱ xúgute̱ benne'?

⁴²Xránadxu gunné̱': ―¿Nuzra naca we̱n zrin li lazre', bénnea' dxucá'ana xrane̱' lu ne̱'e̱ benne' zaj zra' lizre̱' chee̱ gunézruje̱' da xelagu benne' ca' gate zrin zra chee̱ na?

⁴³Ba neza naca na chee̱ benne' we̱n zrin na', gate xezrín xrane̱', xedajxraque̱' le̱' dxune̱' ca da nabague̱'.

⁴⁴Da li dxapa' le'e, xrane̱' gucá'ane̱' lu ne̱'e̱ xúgute̱ da nape̱'.

⁴⁵Che benne' we̱n zrin na' dxéquene̱' wazré xrane̱' xelé̱'e̱, ne su lawe̱' gusaca zi'e̱ benne' we̱n zrin xezica ca', ne nu'ula we̱n zrin ca', ne su lawe̱' xi'aj gawe̱', ne súzrene̱',

⁴⁶nadxa xrane̱' xelé̱'e̱ lu zra quebe dxebeze̱' le̱', ne lu zra quebe nézene̱', na' gusaca zí'le̱'e̱ le̱', ne chugue̱' chee̱' saque̱' ca xelezaca benne' ca' quebe zaj naque̱' chee̱ Dios.

⁴⁷’Benne' we̱n zrin na' nézene̱' ca da dxaca lazre' xrane̱' san quebe nucueze̱', ne quebe dxuzúe̱' dizra', benne' nigá gudée̱' le̱' ba xa'.

⁴⁸Benne' we̱n zrin na' quebe nézene̱' da na', ne dxune̱' da dxusebaga na le̱' zria, benne' nigá tée̱' láteze xel-la zi'. Che tu benne' dxezí'le̱'e̱ da dxunezruj Dios le̱', Dios wanábale̱'e̱ le̱, na' bénnea' Dios nuxrén lazre̱' le̱' da zrente̱, Dios wanné̱ xúele̱'e̱ne̱' le̱'. Dxelaca benne' chupa la'a ne̱ chee̱ Jesús

⁴⁹Na' gunná Jesús: ―Neda' bla'a guzrena' xi' lu xe̱zr la xu nigá, na' la guzreda' ba dxala xi' na'.

⁵⁰Dxal-la' chu'a lu xel-la gute ca dxu'u tu benne' lu nisa gate dxedxúe̱' nisa, na' téle̱'a xel-la zi' cadxa gácatequeze na.

⁵¹¿Dxéquele le'e za' neda' cu'a xel-la dxebeza zri lazre' lu xe̱zr la xu nigá? Dxapa' le'e: Cabí. Za'a chee̱ guna' benne' chupa la'a.

⁵²Na'a su lau, gazxu' benne' zaj zre̱'e̱ tu xu'u xelaque̱' chupa la'a. Chunne̱' xeledábague̱' chupe̱', na' chupe̱' xeledábague̱' chunne̱'.

⁵³Xra tu bi biu tábague̱' bi biu chee̱', na' bi biu na' tábagabe' xrabe'. Xrna tu bi nu'ula tábague̱' bi nu'ula chee̱', na' bi nu'ula na' tábagabe' xrnabe'. Tau zri'ine tu nu'ula tábague̱' zru'a lizre̱', na' zru'a lizre̱' na' tábague̱' tau zrí'ine̱'. Da dxululé'e na ca da gaca lu zra na'a zra

⁵⁴Na' Jesús guzre̱' benne' ca': ―Gate le'e dxelé'ele da' beuj naga dxebía gubizra, na' dxennale, waca xiuj, ne ca' dxaca.

⁵⁵Gate dxaca be' za na chalá'a naga dxedé gubizra beu' zaga ca', na' dxennale waca da la, ne dxaca ca'.

⁵⁶Le'e, benne' dxunle láweze da xrlátaje. Le'e nézele nnale ca da gaca zran xabáa, ne lu xe̱zr la xu nigá, san quebe dxezéquele xuzájla'ale da dxululé'e na ca gaca chee̱le lu zra na'a zra. Dxal-la' xezúadxu lu xel-la dxebeza zri lazre' nen benne' dxedábague̱' dxi'u

⁵⁷Na' gunná Jesús: ―¿Bizr chee̱ na' quebe dxeque be'ele da naca xrlátaje?

⁵⁸Che nu benne' dxaca lazre̱' guzúe̱' lue' lau benne' dxuchi'e̱, na' gate chéajle̱nu' le̱' chee̱ zrinle lau bénnea', be̱n ba xen xezú' lu xel-la dxebeza zri lazre' nen bénnea' dxácate̱ xu'ule neza, chee̱ quebe che̱'e̱ lue' lau bénnea', na' bénnea' gudée̱' lue' lu na' benne' gusézxuje̱' lue' lizre xia.

⁵⁹Dxapa' lue' quebe xedxúaju' na' cadxa quízruju' ca da dxebagu'.